پرەزيدەنت: ءبىز ۇلتتىق بولمىسىمىزدى بەكەمدەپ، ىنتىماق-بىرلىگىمىزدى نىعايتا بەرەمىز

استانا. KAZINFORM - ساياسي قۋعىن-سۇرگىن جانە اشارشىلىق قۇرباندارىن ەسكە الۋعا ارنالعان ءىس- شارادا ادىلەتتى قازاقستاندى قۇرۋ ءۇشىن اۋقىمدى رەفورمالار جاسالىپ جاتقانىن ايتتى.

- ءبىز ستراتەگيالىق باعدارىمىزدى بەرىك ۇستانىپ كەلەمىز. ادىلەتتى قازاقستاندى قۇرۋ ءۇشىن اۋقىمدى رەفورمالار جاساپ جاتىرمىز. ءۇش جىل بۇرىن جالپى ۇلتتىق رەفەرەندۋم وتكىزىپ، اتا زاڭىمىزعا وزگەرىستەر ەنگىزدىك. سول ارقىلى ەلىمىزدىڭ تۇراقتى دامۋىنا مىزعىماس نەگىز قالادىق. مەملەكەتتىڭ ساياسي جۇيەسىن تۇبەگەيلى جاڭعىرتىپ، پارلامەنتتىڭ قۇزىرەتىن كەڭەيتتىك، ۇكىمەتتىڭ جاۋاپكەرشىلىگىن كۇشەيتتىك. كونستيتۋتسيالىق سوت قۇرىلدى. ازاماتتاردىڭ مەملەكەتتىك ماڭىزى بار شەشىم قابىلداۋعا قاتىسۋ مۇمكىندىگى ەداۋىر ارتتى. اۋىل جانە اۋدان اكىمدەرى تىكەلەي سايلاناتىن بولدى. بۇل قادام قوعامنىڭ بيلىككە دەگەن سەنىمىن نىعايتا ءتۇستى.

زاڭ مەن ءتارتىپ ۇستەمدىگىن ورنىقتىرۋ، ايەلدەردىڭ قۇقىعى مەن بالالاردىڭ قاۋىپسىزدىگىن قامتاماسىز ەتۋ ءۇشىن جۇيەلى رەفورمالار جۇزەگە اسىرىلدى. وسى باعىتتا پارلامەنت ءتيىستى زاڭدار قابىلدادى. بۇل - ەلىمىزدى جان- جاقتى جاڭعىرتۋدى كوزدەيتىن اۋقىمدى جۇمىستىڭ ءبىر بولىگى عانا. الدىمىزدا قىرۋار شارۋا كۇتىپ تۇر. شىن مانىندە رەفورمالاردىڭ ناتيجەسىنە ۇلتىمىزدىڭ سانا سەزىمى، ءتىپتى بولمىسى وزگەرە باستادى، - دەدى ول.

پرەزيدەنت ەلدە جاڭا ساياسي جانە سايلاۋ مادەنيەتى ورنىعىپ كەلەتىنىن ايتتى.

- «تازا قازاقستان» جالپىۇلتتىق جوباسى - سونىڭ ايقىن دالەلى، حالىق بۇل ۇزاقمەرزىمدى ستراتەگيانى جاپپاي قولدادى. ءبىز قازىر ءبىر ەل بولىپ ادىلەتتى مەملەكەت پەن بەرەكەلى قوعام قۇرىپ جاتىرمىز. وسى ورتاق ىسكە ازاماتتارىمىز بەلسەنە قاتىسۋدا. حالقىمىزدىڭ رەفورمالارعا دەگەن سەنىمى زور. سەبەبى جۇرتىمىز - جاسامپاز ءارى جاڭاشىل.

ەلىمىزدە جاڭا ساياسي جانە سايلاۋ مادەنيەتى ورنىعىپ كەلەدى. قوعامدا ءار الۋان پىكىر بولسا دا، تۇتاس ەلدىڭ ماقسات- مۇراتى - ءبىر. جۇرتشىلىق ماسىل بولۋ، ورىنسىز سىن ايتىپ، ءمىن تاعۋ سەكىلدى تەرىس قاسيەتتەردەن جيرەنە باستادى. ءبىز ەڭبەكقور، ءبىلىمپاز جانە وزىق ۇلت بولۋعا ۇمتىلعان ەلمىز. «زاڭ جانە ءتارتىپ» مەملەكەتىمىزدىڭ باستى باعدارىنا اينالۋدا. ەلىمىزدە سانالى، ساپالى قوعام قالىپتاسۋدا. جۇرگىزىلىپ جاتقان رەفورمالاردىڭ ماقساتى دا - وسى. بۇل تاريحي ماعىناسى بار جۇمىس توقتامايدى، جالعاسا بەرەدى. ءبىز ۇلتتىق بولمىسىمىزدى بەكەمدەپ، ىنتىماق- بىرلىگىمىزدى نىعايتا بەرەمىز، - دەدى ول.

مەملەكەت باسشىسى ەڭ الدىمەن جاستارىمىز بۇلىڭعىر كەلەشەككە تولىق دايىن بولۋعا ءتيىس ەكەنىن اتاپ ءوتتى.

- بۇگىنگى جيىنعا جاستار دا قاتىسىپ وتىر. سىزدەرگە ايتارىم: ءتول تاريحىمىزدى تەرەڭ ءبىلۋ قاجەت. ءبىراق بۇل تەك وتكەن كۇنمەن ءومىر ءسۇرۋ دەگەن ءسوز ەمەس. ءاربىر جاس كەلەشەككە ايقىن كوزقاراسپەن قاراپ، نىق قادام باسۋى كەرەك.

قازىرگى زامان وتە كۇردەلى، بۇرىن بولماعان ۇردىستەر پايدا بولىپ جاتىر. جاساندى ينتەللەكتىنىڭ بۇكىل قوعامدىق دامۋعا قانداي ىقپالى بولماق ەكەنى ءالى تولىعىمەن زەرتتەلمەگەن. ادامزاتقا تونەتىن قاۋىپ- قاتەرلەر از بولمايدى. سوندىقتان ەڭ الدىمەن جاستارىمىز بۇلىڭعىر كەلەشەككە تولىق دايىن بولۋعا ءتيىس. بۇل ماقساتقا جەتۋ ءۇشىن وسكەلەڭ ۇرپاقتىڭ كوزى اشىق، كوكىرەگى وياۋ، ۇقىپتى، ءتارتىپتى، جيناقى بولۋى كەرەك. ابايشا ايتقاندا، «عىلىم تاپپاي ماقتانباۋى» قاجەت. ەگەمەن ەل بولۋدىڭ قادىر- قاسيەتىن ءتۇسىنىپ، تاۋەلسىزدىگىمىزدى قورعاۋعا قاشاندا دايىن بولۋى كەرەك. سوندا ءبىزدىڭ مەملەكەتتىلىگىمىز - مىعىم، بولاشاعىمىز - باياندى بولارى حاق. مەن وتانشىل ۇل- قىزدارىمىزدىڭ جاسامپاز كۇش- جىگەرىنە سەنەمىن. جولدارىڭىز ءاردايىم اشىق بولسىن! ەلىمىز امان، جۇرتىمىز تىنىش بولسىن، - دەدى قاسىم-جومارت توقايەۆ.

ايتا كەتەلىك پرەزيدەنت «الجير» ساياسي قۋعىن-سۇرگىن جانە توتاليتاريزم قۇرباندارىنىڭ مەموريالدى- مۇراجاي كەشەنىنە بارعان ەدى.