پرەزيدەنت ارناۋلى وكىلگە اۋعانستانمەن ءوزارا ءتيىمدى ىقپالداستىقتى جولعا قويۋدى تاپسىردى
استانا. KAZINFORM - قاسىم-جومارت توقايەۆ پرەزيدەنتتىڭ اۋعانستان بويىنشا ارناۋلى وكىلى ەركىن تۇقىموۆتى قابىلدادى، دەپ حابارلايدى اقوردانىڭ باسپا ءسوز قىزمەتى.
مەملەكەت باسشىسى اۋعانستان بيلىگىمەن ەكىجاقتى قارىم-قاتىناستى نىعايتۋدا ارناۋلى وكىلدىڭ ەرەكشە ءرول اتقاراتىنىن اتاپ ءوتتى.
ارناۋلى وكىلگە اتالعان ەلمەن ساۋدا-ەكونوميكالىق جانە گۋمانيتارلىق سالالاردا ءوزارا ءتيىمدى ىقپالداستىقتى جولعا قويۋ تاپسىرىلدى.
پرەزيدەنت الماتى قالاسىندا اشىلعان ورتالىق ازيا مەن اۋعانستان ءۇشىن ورنىقتى دامۋ ماقساتتارى جونىندەگى ب ۇ ۇ ايماقتىق ورتالىعىنىڭ مۇمكىندىكتەرىن كەڭىنەن پايدالانۋدىڭ ماڭىزىنا توقتالدى.
قاسىم-جومارت توقايەۆتىڭ ايتۋىنشا، قازاقستان اۋعانستانداعى قاۋىپسىزدىك پەن تۇراقتىلىقتى ساقتاۋ ماقساتىندا گۋمانيتارلىق جانە ءبىلىم بەرۋ باستامالارىن جالعاستىرا بەرۋگە نيەتتى.
وسىعان دەيىن پرەمەر-ءمينيستردىڭ ورىنباسارى قانات بوزىمبايەۆتىڭ وڭىرلەردى دامىتۋ بويىنشا قولعا الىنعان شارالار تۋرالى پرەزيدەنتكە ەسەپ بەرگەنى جونىندە جازدىق.