رەسەيدەن مۇناي ونىمدەرىن باج سالىعىنسىز يمپورتتاۋدى كوزدەيتىن زاڭ جوباسى ازىرلەندى
استانا. KAZINFORM - اشىق نورماتيۆتىك-قۇقىقتىق اكتىلەر پورتالىندا «قازاقستان مەن رەسەي ۇكىمەتتەرى اراسىنداعى قازاقستان رەسپۋبليكاسىنا مۇناي جانە مۇناي ونىمدەرىن جەتكىزۋ سالاسىنداعى ساۋدا-ەكونوميكالىق ىنتىماقتاستىق تۋرالى كەلىسىمنىڭ قولدانىلۋىن قايتا باستاۋ جانە وعان وزگەرىستەر ەنگىزۋ تۋرالى حاتتاماسىن راتيفيكاتسيالاۋ تۋرالى» زاڭنىڭ جوباسى جاريالاندى.
زاڭ جوباسىن ازىرلەگەن ەلىمىزدىڭ ەنەرگەتيكا مينيسترلىگى قازاقستان ۇكىمەتى مەن رەسەي ۇكىمەتى اراسىنداعى مۇناي مەن مۇناي ونىمدەرىن جەتكىزۋ سالاسىنداعى ساۋدا-ەكونوميكالىق ىنتىماقتاستىق تۋرالى كەلىسىمدى قايتا جاڭعىرتۋ جونىندەگى حاتتاماعا 2024 -جىلعى 27 -قاراشادا استانا قالاسىندا قول قويىلعانىن اتاپ وتەدى.
- 2010 -جىلدان باستاپ قولدانىستا بولعان كەلىسىم رەسەيلىك مۇناي ونىمدەرىن باجسىز يمپورتتاۋعا مۇمكىندىك بەرەدى. بۇل قازاقستاننىڭ ىشكى نارىعىنىڭ تۇراقتىلىعىن قامتاماسىز ەتۋ ءۇشىن ماڭىزدى قادام سانالادى. 2025 -جىلعا ارنالعان ينديكاتيۆتىك بالانس اياسىندا 285 مىڭ توننا اۆتوبەنزين، 300 مىڭ توننا اۆياوتىن، 450 مىڭ توننا ديزەل وتىنى جانە تۇتىنۋ شارىقتاۋ كەزەڭدەرىندە 500 مىڭ توننا بيتۋم يمپورتتاۋ جوسپارلانعان، - دەپ اتاپ وتەدى مينيسترلىكتەن.
ۆەدومستۆو مالىمەتىنشە، وسى حالىقارالىق شارتقا قاتىستى زاڭ جوباسىن راتيفيكاتسيالاۋ قازاقستان رەسپۋبليكاسىنىڭ ستراتەگيالىق جانە باعدارلامالىق قۇجاتتارىنىڭ باسىم باعىتتارىنا سايكەس كەلەتىن بولادى. ەنەرگەتيكا مينيسترلىگى بۇل شەشىم تاۋەكەلدەردى بەلسەندى باسقارۋعا مۇمكىندىك بەرەتىنىن جانە كاسىپورىنداردىڭ سەنىمدى جۇمىس ىستەۋىن، سونداي-اق سالانىڭ تۇراقتى دامۋىن قامتاماسىز ەتەتىنىن اتاپ كورسەتەدى.
اتالعان جوبا قابىلدانعان جاعدايدا الەۋمەتتىك-ەكونوميكالىق جانە قۇقىقتىق جاعىمسىز سالدارعا الىپ كەلمەيدى جانە ۇلتتىق قاۋىپسىزدىككە اسەر ەتپەيدى.
ەستەرىڭىزگە سالا كەتسەك، وسى جىلدىڭ 29 -ناۋرىزىنان باستاپ قازاقستان اۋماعىنان مۇناي ونىمدەرىنىڭ جەكەلەگەن تۇرلەرىن اكەتۋگە التى اي مەرزىمگە تىيىم سالىنعان ەدى.
اۆتور
مارلان جيەمباي