پرەمەر-ءمينيستردىڭ ورىنباسارى الاكول كولىنىڭ جاعالاۋىنداعى دەمالىس ايماقتارىن تەكسەردى
تالدىقورعان. KAZINFORM - باسىمدىق بەرىلەتىن تۋريستىك باعىتتاردىڭ جاي-كۇيىن باعامداۋ ماقساتىندا وڭىرلەرگە جۇمىس ساپارىن جالعاستىرعان پرەمەر-ءمينيستردىڭ ورىنباسارى ەرمەك كوشەربايەۆ جەتىسۋ وبلىسىنداعى باستى تۋريستىك باعىتتاردىڭ ءبىرى سانالاتىن الاكول كولى جاعالاۋى ينفراقۇرىلىمىنىڭ جاعدايىمەن تانىستى.
وبلىس قۇرىلعاننان بەرى الاكول اۋدانىنا 4,8 ميلليون تۋريست كەلگەن، سونىڭ 1,8 ميلليوننى وتكەن جىلدىڭ ۇلەسىندە ەكەنىن ايتا كەتكەن ءجون.
ساپار بارىسىندا ۆيتسە-پرەمەر كوممۋنالدىق جاعاجايدا بولدى، مۇندا وزگە دە ايماقتارداعى سياقتى كەشەندى تۇرعىدا شەشۋدى قاجەت ەتەتىن كوپتەگەن جۇيەلى ماسەلەلەردىڭ بار ەكەنى انىقتالدى. باستاپقى شارتتار بار بولعانىمەن، اشىق جانە قولجەتىمدى اۋماقتاعى كوپتەگەن دەمالىس ورىندارىندا سانيتارلىق جاعداي، ينجەنەرلىك جانە ينفراقۇرىلىمدىق جاعىنان ءبىرقاتار تۇيتكىلدەر ساقتالىپ قالىپ وتىر.
- كوممۋنالدىق جاعاجايدا دەمالۋعا كەلەتىن ادامدار دا جەكەمەنشىك دەمالىس ايماقتارىنداعىداي بازالىق جايلىلىقپەن، قاۋىپسىزدىكپەن قامتاماسىز ەتىلۋى ءتيىس. بۇل - ادىلەتتىلىك قاعيداسى. ادام قاي جەردە دە تازا، ءتارتىپتى ءارى رەتتى ورتادا دەمالۋى كەرەك، - دەپ اتاپ ءوتتى ەرمەك كوشەربايەۆ.
پرەمەر-ءمينيستردىڭ ورىنباسارى اۋدان اكىمى مەن جاۋاپتى سالالارعا جاعاجايداعى سانيتارلىق جابدىقتاۋدى كۇشەيتۋ، قوسىمشا قوقىس جاشىكتەرىن ساتىپ الۋ، سۋداعى بەلگىلەر جەلىسىن ۇزارتۋ جانە شاعىن كولەمدى كەمەلەرگە ارنالعان قاۋىپسىز كىرۋ ايماقتارىن بەلگىلەۋ جونىندە ءبىرقاتار تاپسىرما بەردى. سونىمەن قاتار كيىم اۋىستىراتىن ورىندار، دۋش كابينالارىن ورناتۋ، اباتتاندىرۋ، سونىڭ ىشىندە بەلسەندى دەمالىس ايماقتارىن قالىپتاستىرۋ مۇمكىندىگىن قاراستىرۋ تاپسىرىلدى.
قوعامدىق قاۋىپسىزدىكتى قامتاماسىز ەتۋ ءۇشىن جاعالاۋ اۋماعىندا كەزەكشىلىك اتقاراتىن ت ج قىزمەتكەرلەرىنىڭ سانىن ارتتىرۋ ماسەلەسى قاراستىرىلاتىن بولادى. جاعاجايداعى جايما ساۋدا ماسەلەسىنە دە ەرەكشە نازار اۋدارىلدى. ۆيتسە- پرەمەر ساۋدا نۇكتەلەرى رەتىندە سۋ جانە ەلەكتر جەلىسىنە قوسىلعان تۇراقتى دۇڭگىرشەكتەر ورناتۋ كەرەكتىگىن جانە ولاردا سانيتارلىق-ەپيدەميولوگيالىق تالاپتاردىڭ قاتاڭ ساقتالۋى قاجەتتىگىن اتاپ ءوتتى.
- بۇل ماسەلەلەر تەك الاكولگە عانا ەمەس، ەلدەگى بارلىق وڭىرلەرگە ءتان. مۇنداي تۇيتكىلدەر ەلىمىزدىڭ دەمالىس ايماقتارىندا ءجيى تۋىندايدى. ءبىز بارلىق ۇسىنىستاردى جيناقتاپ، ۇزدىك تاجىريبەلەردى سارالاپ، تۋريزم جانە سپورت مينيسترلىگىندە جاۋاپتى مەملەكەتتىك ورگانداردىڭ قاتىسۋىمەن ارنايى كەڭەس وتكىزەتىن بولامىز. تۋريزم - تەك بيزنەس ەمەس، بۇل ەڭ الدىمەن ازاماتتاردىڭ ءومىر ءسۇرۋ ساپاسىنىڭ كورسەتكىشى، - دەدى ەرمەك كوشەربايەۆ.
ساپار اياسىندا ۆيتسە-پرەمەر اقشي اۋىلىنداعى تەمىرجول ۆوكزالىندا دا بولىپ، تۋريستەرمەن تىلدەستى. تۋريستەردىڭ پىكىرىنە قاراعاندا، مۇندا وڭ وزگەرىستەر بايقالادى، الايدا جاعاجايلاردىڭ كەيبىر ايماقتارىندا تۇيتكىلدى ماسەلەلەر دەمالىس ساپاسىنا ءالى دە كولەڭكە تۇسىرۋدە.
- الاكولگە وتباسىمىزبەن العاش رەت كەلىپ وتىرمىز. ۆوكزالدا دا، جاعاجايدا دا رەتتىلىك بار. جاعاجايلاردا، كيىم شەشەتىن ورىندار مەن دۋش كابينالارى كوبىرەك بولسا ەكەن دەيمىز، - دەدى پىكىرىن بىلدىرگەن دەمالۋشى گالينا چەپرىنا.
ال الماتىلىق تۋريستەر 8 جىلدان بەرى ءبىر جەرگە كەلىپ دەمالىپ جۇرگەنىن ايتادى. ولار مۇنداعى قىزمەت كورسەتۋ ساپاسى، اۋاسى، سۋى - ءبارى ۇنايتىنىن دا ءسوز ەتتى. سونداي-اق ءسوز سوڭىندا جاعاجاي ۋچاسكەسىنىڭ قاي-قايسىنىڭ دا، اسىرەسە تەگىن ايماقتاردىڭ ءبىر ستاندارتقا ساي بولعانىن قالايتىنىن جەتكىزدى.
بيىل كول جاعالاۋىندا ەلەكترمەن قامتاماسىز ەتۋ ماسەلەسى شەشىمىن تاپتى. بەسكولدەن اقشي اۋىلىنا دەيىن ۇزىندىعى 56,7 شاقىرىمدى قۇرايتىن جوعارى كەرنەۋلى ەلەكتر جەلىسى مەن جاڭا قوسالقى ستانسا سالىندى. ماۋسىم ايىنان باستاپ ەلەكتر ەنەرگياسى ۇزدىكسىز بەرىلىپ كەلەدى. جاعالاۋ اۋماعى ينتەرنەتپەن قامتىلعان، 16 بازالىق ستانسا جۇمىس ىستەپ تۇر، سونداي-اق تالشىقتى- وپتيكالىق بايلانىس جەلىسى تارتىلدى.
جۇمىس سالالىق مينيسترلىكتەرمەن ۇيلەستىرىلە وتىرىپ جۇرگىزىلدى. جۇمىس توبى قۇرامىنا ەنگەن بارلىق ۆيتسە-مينيسترلەر ءوزىنىڭ جاۋاپتى باعىتتارى بويىنشا دەمالىس ايماقتارىنا بارىپ، ونداعى جاعدايمەن تانىستى. ناتيجەسىندە ولار ۆيتسە-پرەمەرگە ولاردىڭ قازىرگى جاعدايى مەن قابىلدانۋى ءتيىس قاجەتتى شارالار تۋرالى ەسەپ بەردى.
- ءبىز ۋاقىتشا شەشىم قابىلداپ وتىرعان جوقپىز، ۇزاق مەرزىمدى، تۇراقتى جۇيە قالىپتاستىرىپ جاتىرمىز. قازاقستاننىڭ تۋريستىك ايماقتارى حالىقتىڭ ءۇمىتىن اقتاپ قانا قويماي، جاڭا ستاندارتتارعا ساي بولۋى ءتيىس. بۇل تەك تۋريستەر ءۇشىن ەمەس، ەڭ الدىمەن قازاقستاندىقتاردىڭ وزدەرى ءۇشىن ماڭىزدى. بارلىق وڭىرلەرگە جاسالعان ساپارلاردىڭ قورىتىندىسى بويىنشا ۇكىمەت دەڭگەيىندە جۇيەلى شەشىمدەر قابىلداناتىن بولادى، - دەدى ءسوزى قورىتىندىلاعان ەرمەك كوشەربايەۆ.
ەسكە سالا كەتەيىك، بۇعان دەيىن ەرمەك كوشەربايەۆتىڭ قاپشاعايدىڭ تۋريستىك ينفراقۇرىلىمىمەن تانىسقانىن جازعان ەدىك.