ەرلان قارين: ەلىمىزدە مادەني، تاريحي ەسكەرتكىشتى بۇلدىرگەندەرگە جازا كۇشەيدى

استانا. KAZINFORM - مەملەكەتتىك كەڭەسشى ەرلان قارين كەشە قابىلدانعان ءبىرقاتار جاڭا زاڭعا پىكىر ءبىلدىردى.

ەسكە سالا كەتەيىك، كەشە مەملەكەت باسشىسى اكىمشىلىك جاۋاپكەرشىلىكتى قاتايتاتىن ءبىرقاتار قۇجاتقا قول قويدى.

ونىڭ ىشىندە ۆانداليزم مەن قوعامدىق ءتارتىپتى بۇزعانى ءۇشىن جاۋاپكەرشىلىكتى كۇشەيتەتىن زاڭ دا بار.

ەرلان ءقاريننىڭ ايتۋىنشا، بۇل - ۇلتتىق قۇرىلتايدىڭ ءۇشىنشى وتىرىسىندا كوتەرىلگەن باستامالاردى جۇزەگە اسىرۋ اياسىندا قابىلدانعان ءتورتىنشى زاڭ.

«بۇدان بۇرىن ۆەيپتكە تىيىم سالۋعا، ايەلدەردىڭ قۇقىعىن قورعاۋعا جانە بالالاردىڭ قاۋىپسىزدىگىنە، «ايبىن» وردەنىنىڭ ءتۇرلى دارەجەلەرىنە باتىرلاردىڭ ەسىمىن بەرۋگە قاتىستى زاڭعا قول قويىلعان بولاتىن. مەملەكەت باسشىسى اتىراۋدا سويلەگەن سوزىندە تارتىپسىزدىك پەن مادەنيەتسىزدىك سىندى كەسەلدەرگە قارسى كۇرەسۋگە شاقىرىپ، ءۆانداليزمدى تەرىس قىلىق دەپ اتاپ ءوتتى»، - دەپ جازدى مەملەكەتتىك كەڭەسشى Telegram پاراقشاسىندا.

قول قويىلعان زاڭدا:

- قوعامدىق ورىنداردى لاستاۋ؛

- بوتەننىڭ مۇلكىن قاساقانا جويۋ نەمەسە ءبۇلدىرۋ؛

- تاريح، مادەنيەت ەسكەرتكىشتەرىن، تابيعي كەشەندەردى نەمەسە مەملەكەت قورعاۋعا العان وبەكتىلەردى، سونداي-اق ەرەكشە تاريحي، عىلىمي، كوركەمدىك نەمەسە مادەني قۇندىلىعى بار زاتتاردى نەمەسە قۇجاتتاردى قاساقانا جويۋ نەمەسە ءبۇلدىرۋ ءۇشىن جاۋاپكەرشىلىك كۇشەيتىلگەن.