پرەزيدەنتتىك ورتالىقتا جاڭا ورگاننىڭ ۇيىمداستىرۋشىلىق وتىرىسىندا ساناق كوميسسياسىنىڭ ءتوراعاسى مۇرات ابەنوۆ جاسىرىن داۋىس بەرۋ ناتيجەسىن جاريالادى.
داۋىس بەرۋ جاشىگىنەن 121 بيۋللەتەن الىندى. جارامسىز بيۋللەتەن جوق. ەرلان قوشانوۆتىڭ كانديداتۋراسىن 120 ادام جاقتاعان. ءبىر ادام قالىس قالعان.
ايتا كەتەيىك، ەرلان جاقان ۇلى قوشانوۆ 64 جاستا. ول 1962-جىلى 14-تامىزدا قاراعاندى وبلىسىنىڭ شەت اۋدانىندا تۋعان. جەزقازعانداعى قاراعاندى پوليتەحنيكالىق ينستيتۋتىنىڭ فيليالىندا (ينجەنەر-مەحانيك) جانە قازاق مەملەكەتتىك باسقارۋ اكادەمياسىندا (حالىقارالىق ەكونوميست) ءبىلىم العان. ەڭبەك جولىن جەزقازعان كەن-مەتاللۋرگيا كومبيناتى بايىتۋ فابريكاسىنىڭ سلەسارى، شەبەرى بولىپ باستاعان.
كەيىنىرەك جەزقازعان وبلىستىق سىرتقى ەكونوميكالىق بايلانىستار كوميتەتىندە ءتۇرلى قىزمەتتەر اتقاردى، ق ر پارلامەنتى سەناتىنىڭ دەپۋتاتى، ۇكىمەتتىڭ پارلامەنتتەگى وكىلى، كولىك جانە كوممۋنيكاتسيا ۆيتسە-ءمينيسترى، ازاماتتىق اۆياتسيا كوميتەتىنىڭ ءتوراعاسى بولدى.
ءار جىلدارى ق ر پرەمەر-ءمينيسترى كەڭسەسى باسشىسىنىڭ ورىنباسارى - ۇكىمەتتىڭ پارلامەنتتەگى وكىلى، ق ر پرەمەر-ءمينيسترى كەڭسەسىنىڭ باسشىسى، قاراعاندى وبلىسىنىڭ اكىمى، ق ر پرەزيدەنتى اكىمشىلىگىنىڭ باسشىسى قىزمەتتەرىن اتقارىپ، 2022-جىلى ق ر پارلامەنتى ءماجىلىسىنىڭ ءتوراعاسى جانە «AMANAT» پارتياسىنىڭ ءتوراعاسى بولدى.
بۇعان دەيىن پرەزيدەنت قاسىم-جومارت توقايەۆ قازاقستان حالىق كەڭەسى ءتوراعاسى قىزمەتىنە ە. قوشانوۆتىڭ كانديداتۋراسىن ۇسىنعان ەدى.
ەسكە سالا كەتسەك، جىل باسىندا پرەزيدەنت قاسىم-جومارت توقايەۆ قىزىلورداداعى V ۇلتتىق قۇرىلتايدا حالىق كەڭەسى ينستيتۋتىنىڭ زاڭدىق مارتەبەسى قانداي بولاتىنىن ايتىپ بەردى.
كەشە پرەزيدەنت قاسىم-جومارت توقايەۆ قازاقستان حالىق كەڭەسىنىڭ 126 ادامنان تۇراتىن قۇرامىن بەكىتتى. وندا ەتنومادەني بىرلەستىكتەردەن – 42، قوعامدىق بىرلەستىكتەردەن – 42، ءماسليحاتتار مەن وڭىرلىك قوعامدىق كەڭەستەردەن - 42 وكىل بار.
قازاقستان حالىق كەڭەسىنىڭ ءبىرىنشى سەسسياسى 23-24-قىركۇيەك كۇندەرى وتەدى.