الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ XXIV وتىرىسى اياسىندا سەزد حاتشىلىعىنىڭ باسشىسى - ۆيتسە-پرەزيدەنت ەرلان قارين ءبىرقاتار ەكىجاقتى كەزدەسۋ وتكىزدى.
كەزدەسۋلەر بارىسىندا الداعى وتىرىستىڭ كۇن ءتارتىبى جانە سەزد اياسىنداعى ىنتىماقتاستىقتى ودان ءارى دامىتۋ ماسەلەلەرى تالقىلاندى.
كاۆكاز مۇسىلماندارى باسقارماسىنىڭ ءتوراعاسى شەيح-ۋل-يسلام اللاحشۇكىر پاشازادەمەن كەزدەسۋدە ونىڭ سەزدىڭ قالىپتاسۋى مەن ءدىنارالىق ديالوگتى دامىتۋعا قوسقان كوپجىلدىق جەكە ۇلەسى اتاپ ءوتىلدى. ەرلان قارين ونىڭ بەيبىتشىلىك، ءوزارا قۇرمەت پەن كەلىسىم يدەيالارىن ىلگەرىلەتۋدەگى ەڭبەگىنىڭ ماڭىزدىلىعىنا توقتالدى.
ءال-ازھار جوعارعى يمامىنىڭ حالىقارالىق ىنتىماقتاستىق جونىندەگى كەڭەسشىسى ابدۋلراحمان مۇسا قازاقستان پرەزيدەنتى قاسىم-جومارت توقايەۆقا جوعارعى يمامنىڭ سالەمى مەن ىزگى تىلەگىن جەتكىزدى. كەزدەسۋ بارىسىندا قازاقستاننىڭ ءال-ازھارمەن ءوزارا ءىس-قيمىلى، ونىڭ ىشىندە ءدىني ءبىلىم بەرۋ، اعارتۋ جانە ءدىنارالىق ديالوگ سالالارىنداعى ىنتىماقتاستىقتى دامىتۋ الەۋەتى تالقىلاندى.
بۇكىلالەمدىك يسلام ليگاسى باس حاتشىسىنىڭ ورىنباسارى ابدۋلراحمان ابدۋللا ءال-زايدپەن كەزدەسۋدە ليگانىڭ سەزد جۇمىسىنا كوپ جىلدان بەرى قاتىسىپ كەلە جاتقانى ءارى ءدىنارالىق ديالوگتى دامىتۋعا قوسقان ۇلەسى ءسوز بولدى. ەرلان قارين فورۋمنىڭ قىزمەتى مەن پراكتيكالىق باستامالارىن ودان ءارى قولداۋدىڭ ماڭىزدىلىعىن جەتكىزدى.
انگليكان قاۋىمداستىعى باس حاتشىسىنىڭ ورىنباسارى، ەپيسكوپ دجو بەيلي ۋەللسپەن كەزدەسۋدە قاۋىمداستىقتىڭ سەزد جۇمىسىنا بەلسەندى قاتىسقانى جانە فورۋمدى دامىتۋعا سىڭىرگەن ەڭبەگى اتاپ ءوتىلدى. سونداي-اق 2028 -جىلى استانادا ۇيىمداستىرىلاتىن سەزدىڭ IX وتىرىسىنا كەنتەربەري ارحيەپيسكوپى سارا ماللاليدىڭ قاتىسۋىنا تىلەكتەستىك ءبىلدىرىلدى.
سونىمەن قاتار شەتەلدىك قوناقتار قازاقستاندى جاڭا كونستيتۋتسيانىڭ قابىلدانۋىمەن قۇتتىقتادى.