قىتاي، تۇركيا، يوردانيا، اراب ەلدەرى: ەلىمىزدىڭ ارگوونەركاسىبىنە قاي ەلدەر قىزىعىپ وتىر

استانا. KAZINFORM - اۋىل شارۋاشىلىعى مينيسترلىگى شەتەلدىك جانە ترانسۇلتتىق ءىرى كومپانيالاردى ەلگە تارتۋ بويىنشا دا بەلسەندى جۇمىس ىستەپ جاتىر. ونىڭ ناتيجەسى تۋرالى اۋىل شارۋاشىلىعى ۆيتسە-ءمينيسترى ەرمەك كەنجەحان ۇلى ايتىپ بەردى.

- بۇگىندە تۇركيالىق «Alsera» كومپانياسى «قازاقستاندا جىلىجاي كەشەنىن سالۋ» جوباسى بويىنشا شىمكەنت قالاسىندا قول قويىلدى. كەشەن جىلىنا 155 مىڭ توننا قىزاناق وندىرەدى، ونىڭ قۇنى 650 ميلليون ا ق ش دوللار. سونىمەن قاتار اراب ەلدەرىنىڭ «QazaqArab Sugar» كومپانياسىمەن الماتى وبلىسىندا «قازاقستاندا قانت زاۋىتىن سالۋ» جوباسى بويىنشا كەلىسىم جاسالدى. زاۋىتتىڭ قۋاتتىلىعى 5 ميلليون توننا قانت قىزىلشاسىن وڭدەپ، جىلىنا 500 مىڭ توننا اق قانت ءوندىرۋدى جوسپارلاپ وتىر. جوبانىڭ قۇنى 580 ميلليون ا ق ش دوللارى، - دەدى ەرمەك كەنجەحان ۇلى ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ودان بولەك، ۆيتسە-ءمينيستردىڭ مالىمدەۋىنشە، بيىل 8 جوبا بويىنشا ينۆەستيتسيالىق كەلىسىمدەرگە قول قويۋ مۇمكىندىگى پىسىقتالىپ جاتىر. اتاپ ايتقاندا:

- قىتايلىق «Fufeng Group» جانە «Shengtai Biotech» كومپانيالارى جامبىل وبلىسىندا «جۇگەرىنى تەرەڭ وڭدەيتىن تىك ينتەگراتسيالانعان ونەركاسىپتىك پارك سالۋ» جوباسى، قۋاتى جىلىنا 1 ميلليون توننا، قۇنى 350 ميلليون اقش دوللارى؛

- امەريكالىق «PepsiCo» كومپانياسى الماتى وبلىسىندا «تۇزدى تىسكەباسارلار شىعاراتىن زاۋىت قۇرىلىسى» جوباسى، قۋاتتىلىعى 210 مىڭ توننا، 70 مىڭ توننا دايىن ءونىم، قۇنى 376 ميلليون ا ق ش دوللارى؛

- ماجارلىق «UBM Group» كومپانياسى قاراعاندى وبلىسىندا (جەم)، الماتى وبلىسىندا (قۇراما جەم)، الماتى قالاسىندا (پرەميكس) 3 قۇراما جەم زاۋىتى مەن 1 پرەميكس زاۋىتىن سالۋ جوباسى، قۋاتتىلىعى 48 مىڭ توننا پرەميكس، 300 مىڭ توننا قۇراما جەم، جالپى قۇنى 62 ميلليون ا ق ش دوللارى؛

- قىتايلىق «Dalian Hesheng Holdings Group» كومپانياسى اقمولا وبلىسىندا «ءداندى داقىلداردى تەرەڭ وڭدەۋ زاۋىتىن سالۋ» جوباسى، قۋاتتىلىعى 400 مىڭ توننا، قۇنى 650 ميلليون ا ق ش دوللارى؛

- تۇركيالىق «Tiryaki Holding» كومپانياسى استانا قالاسىندا «ءداندى جانە بۇرشاقتى داقىلداردى تەرەڭ وڭدەۋگە ارنالعان اگروونەركاسىپتىك كەشەن سالۋ» جوباسى، قۋاتتىلىعى 240 مىڭ توننا، بۇرشاق وڭدەۋ 80 مىڭ توننا قۇنى 320 ميلليون ا ق ش دوللارى؛

- دات كومپانياسى «Carlsberg Group» الماتى وبلىسىندا «الكوگولسىز سۋسىندار ءوندىرۋ» جوباسى، قۋاتى 370 ميلليون ليتر، قۇنى 300 ميلليون ا ق ش دوللارى؛

- پولشا كومپانياسى «Fabe Agro» شىمكەنت قالاسىندا «زاماناۋي جىلىجاي كەشەنىن سالۋ» جوباسى، قۋاتى 36 مىڭ توننا قىزاناق پەن قيار، قۇنى 120 ميلليون ا ق ش دوللارى؛

- يوردانيالىق «AL JAZEERA AGRICULTURE COMPANY» جانە «ايتاس ك ز» ج ش س بىرلەسىپ الماتى وبلىسىندا «قۇس ەتىن وندىرەتىن زاۋىت سالۋ» جوباسى، قۋاتى 35 ميلليون جۇمىرتقا جانە 1000 توننا برويلەر ەتى، قۇنى 15 ميلليون ا ق ش دوللارى.

- اگروونەركاسىپ كەشەنى سالاسىنا ينۆەستيتسيا تارتۋ جۇمىسى مەملەكەتتىك جانە جەرگىلىكتى اتقارۋشى ورگاندارمەن بىرلەسە وتىرىپ ودان ءارى جالعاسىن تابادى، - دەپ قوستى ءمينيستردىڭ ورىنباسارى.

ايتا كەتەيىك، بيىل ءتورت ايدا اگروونەركاسىپ كەشەنىنە 213 ميلليارد تەڭگە ينۆەستيتسيا تارتىلدى.

بۇعان دەيىن بيىل ەل اۋماعىندا ىسكە قوسىلاتىن اگرو-جوبالاردى ءتىزىپ شىققان ەدىك.