قىتاي ەلشىسى ايماقتىق قاۋىپسىزدىكتىڭ ءۇش نەگىزگى قاتەرىن اتادى

استانا. KAZINFORM - ورتالىق ازيا ەلدەرى مەن قىتاي قاۋىپسىزدىك جانە قۇقىق قورعاۋ سالاسىنداعى ىنتىماقتاستىقتى نىعايتىپ كەلەدى.

بۇل تۋرالى استانادا وتكەن قىتاي مەن ورتالىق ازيا ەلدەرى اراسىنداعى 2025 -جىلعى گۋمانيتارلىق الماسۋ بويىنشا مەملەكەتتىك باسقارۋ جانە ديالوگ جونىندەگى سيمپوزيۋمدا ءسوز سويلەگەن قىتايدىڭ قازاقستانداعى توتەنشە جانە وكىلەتتى ەلشىسى حان چۋنلين مالىمدەدى.

ديپلوماتتىڭ ايتۋىنشا، بۇل سالادا ىنتىماقتاستىق گەوساياسي تاۋەكەلدەر مەن ترانسۇلتتىق قاتەرلەردى قوسا العاندا سىن- قاتەردىڭ ءوسۋى جاعدايىندا ەرەكشە ماڭىزدى بولىپ وتىر.

- قىتاي ءتۇرلى سىن- قاتەر الدىندا قىتاي ورتالىق ازيا مەملەكەتتەرىمەن بىرلەسىپ، «قىتاي- ورتالىق ازيا» مەحانيزمى اياسىندا كوپجاقتى پلاتفورمالاردى نىعايتىپ، قاۋىپسىزدىك سالاسىنننداعى جاھاندىق باستاماسىن جۇزەگە اسىرۋعا جاردەمدەسۋدى جانە ايماقتىق قاۋىپسىزدىك تەتىكتەرىن جەتىلدىرۋدى كوزدەپ وتىر، - دەدى حان چۋنلين.

ول راديكالدى اعىمدارمەن بىرلەسىپ كۇرەسۋدىڭ ماڭىزدىلىعىنا ەرەكشە توقتالىپ، ايماقتاعى تۇراقتىلىقتى قامتاماسىز ەتۋ ءۇشىن ۇجىمدىق كۇش- جىگەر قاجەتتىگىن اتاپ ءوتتى.

- ءبىز «ءۇش زۇلىم كۇش» دەپ اتالاتىن لاڭكەستىك، سەپاراتيزم جانە ەكسترەميزمگە قارسى بىرلەسكەن كۇرەستى كۇشەيتىپ، ايماقتىڭ تۇراقتى دامۋىنا قولداۋ كورسەتىپ، سەنىمدى قاۋىپسىزدىك قالقانىن بىرگە قۇرۋىمىز كەرەك، - دەپ اتاپ ءوتتى ديپلومات.

ءسوز سوڭىندا حان چۋنلين قيىن جاھاندىق كونتەكستە بىرلىكتىڭ ماڭىزدىلىعىن ەسكە سالدى.

- جاھاندىق تۇراقسىزدىق جاعدايىندا ءبىز كوپجاقتى ىنتىماقتاستىق جولىن بىرلەسىپ ۇستانۋىمىز كەرەك، - دەدى ول.

قىتاي تاراپىنىڭ پىكىرىنشە، ۇجىمدىق قاۋىپسىزدىكتى نىعايتۋ ايماقتاعى ستراتەگيالىق ارىپتەستىكتىڭ اجىراماس بولىگىنە اينالىپ وتىر.

اۆتور

زارينا تۋعانبايەۆا