قورقىت اتا جاڭا ارنايى ەكونوميكالىق ايماعى قۇرىلدى

استانا، KAZINFORM - ەلىمىزدە «قورقىت اتا» جاڭا ارنايى ەكونوميكالىق ايماعى (ا ە ا) قۇرىلدى. ءتيىستى قاۋلىعا پرەمەر-مينيستر ولجاس بەكتەنوۆ قول قويدى. بۇل تۋرالى ۇكىمەتتىڭ باسپا ءسوز قىزمەتى حابارلادى.

قۇجاتقا سايكەس، ا ە ا قىزىلوردا وبلىسىندا «باتىس ەۋروپا - باتىس قىتاي» حالىقارالىق كولىك دالىزىنە جاقىن 550 گەكتار اۋماقتا ورنالاسادى. ارنايى ەكونوميكالىق ايماق اۋماعىندا زاماناۋي ونىمدىلىگى جوعارى، باسەكەگە قابىلەتتى وندىرىستەردى جەدەل دامىتۋ، قىزمەت كورسەتۋدىڭ ساپالى جاڭا دەڭگەيىن قالىپتاستىرۋ، ينۆەستيتسيا تارتۋ، ەكونوميكا سالاسىندا جاڭا تەحنولوگيالار ەنگىزۋ، سونداي-اق حالىقتى جۇمىسپەن قامتۋدى ارتتىرۋ ءۇشىن مۇمكىندىكتەر جاساۋ جوسپارلانىپ وتىر.

ا ە ا- نىڭ «باتىس ەۋروپا - باتىس قىتاي» حالىقارالىق كولىك دالىزىنە جاقىندىعى قازاقستان مەن ورتالىق ازيا نارىقتارىندا ءونىمدى ءتيىمدى وتكىزۋگە مۇمكىندىك بەرەدى. ا ە ا اۋماعىندا سالىقتىق جانە كەدەندىك جەڭىلدىكتەر ۇسىنا وتىرىپ، ارنايى قۇقىقتىق رەجيم ارەكەت ەتەتىن بولادى.

2049-جىلعا قاراي ا ە ا- عا سالىناتىن ينۆەستيتسيانىڭ جالپى كولەمىن 150 ميلليارد تەڭگەگە، شەتەلدىك سالىمداردى - 80 ميلليارد تەڭگەگە دەيىن جەتكىزۋ جوسپارلانىپ وتىر. تاۋارلار ءوندىرۋ مەن قىزمەت كورسەتۋ كولەمى 500 ميلليارد تەڭگە دەڭگەيىندە بولجانىپ وتىر.

قازاقستاندىق قامتۋ ۇلەسى - � عا دەيىن جەتەدى. 25 جىل ىشىندە ا ە ا كاسىپورىندارىندا 3366 جاڭا جۇمىس ورنىن اشۋ كوزدەلگەن، قاتىسۋشى كومپانيالاردىڭ سانى 39 عا جەتكىزىلەدى.

سونداي-اق مۋلتيمودالدى اۋە حابتارىن قۇرۋ جونىندەگى ءىس-شارالاردى ىسكە اسىرۋ شەڭبەرىندە جانە كەدەن زاڭناماسىنىڭ تالاپتارىنا سايكەس، اتالعان قاۋلىمەن «وڭتۇستىك»، «استانا - تەحنوپوليس»، «سارىارقا»، «Alatau» جانە «اقتوبە» ا ە ا- عا پورت ايماقتارى مارتەبەسى بەرىلدى.

ارنايى ەكونوميكالىق ايماقتار ينستيتۋتى ءالى كۇنگە دەيىن ءتيىستى دەڭگەيدە دامىماي وتىر. بۇل تۋرالى ۇكىمەت وتىرىسىندا پرەمەر-مينيستر ولجاس بەكتەنوۆ ايتقان ەدى.