پرەزيدەنت قاسىم-جومارت توقايەۆ قازاقستان رەسپۋبليكاسىنىڭ قورعانىس مينيسترلىگىندەگى ىستەردىڭ جاي-كۇيىنە كەشەندى تەكسەرۋ جۇرگىزۋ جونىندەگى كوميسسيا مۇشەلەرىمەن كەڭەس وتكىزدى.
مەملەكەت باسشىسى اتقارىلعان جۇمىستىڭ العاشقى ناتيجەلەرى تۋرالى ەسەپتى تىڭدادى. كوميسسيا ءتوراعاسى، قاۋىپسىزدىك كەڭەسى ءتوراعاسىنىڭ ورىنباسارى ايدا بالايەۆا تەكسەرىستىڭ نەگىزگى باعىتتارى جونىندەگى قورىتىندىنى باياندادى.
جيىن بارىسىندا ماڭعىستاۋ وبلىسىنداعى قايعىلى وقيعا قارۋلى كۇشتەردە قوردالانعان جۇيەلىك پروبلەمالاردى اشكەرەلەگەنى اتاپ ءوتىلدى.
الدىن الا تەرگەۋ ناتيجەسى اسكەري ءىس-شارالاردى جوسپارلاۋ كەزىندە ورەسكەل قاتەلىكتەر جىبەرىلگەنىن جانە بۇعان دەيىنگى باسشىلىق تاراپىنان ءتيىستى قاداعالاۋ بولماعانىن كورسەتتى.
مەملەكەت باسشىسى العاشقى كادرلىق شەشىمدەر قابىلدانعانىن، الايدا اسكەري قىزمەتشىلەردىڭ قازاسىنا كىنالى لاۋازىمدى تۇلعالاردىڭ بارلىعى زاڭعا سايكەس جاۋاپكەرشىلىككە تارتىلۋعا ءتيىس ەكەنىن مالىمدەدى. اتالعان ماسەلە پرەزيدەنتتىڭ جەكە باقىلاۋىندا بولادى.
تەكسەرىستىڭ ءبىرىنشى كەزەڭىنىڭ قورىتىندىسى بويىنشا قىلمىستىق قۋدالاۋ ورگاندارى مەملەكەت مۇلكىن تالان-تاراجعا سالۋ، قىزمەتىن اسىرا پايدالانۋ فاكتىلەرىنە، سونداي-اق قورعانىس مينيسترلىگىنە قاراستى ۇيىمدار مەن قۇرىلىمدىق بولىمشەلەر قىزمەتىندەگى باسقا دا زاڭ بۇزۋشىلىقتارعا قاتىستى 13 قىلمىستىق ءىس قوزعادى.
ماڭعىستاۋ وبلىسىنداعى تراگەديانىڭ جاي-جاپسارىن زەرتتەۋ بارىسىندا وقۋ-جاتتىعۋ جيىندارىن دايىنداۋ جانە جوسپارلاۋ كەزىندە تاۋەكەلدەردى باعالاۋ، دەسانت ءتۇسىرۋدى ۇيىمداستىرۋ جانە اسكەريلەردىڭ قاۋىپسىزدىگىن قامتاماسىز ەتۋگە قاتىستى ەلەۋلى كەمشىلىكتەرگە جول بەرىلگەنى انىقتالدى.
قولباسشىلىق قۇرامنىڭ قىلمىسقا پاراپار سالعىرتتىعى بويىنشا سوتقا دەيىنگى تەرگەۋ امالدارى جالعاسىپ جاتىر. بەس لاۋازىمدى تۇلعا تۇتقىندالدى. تەرگەۋ اياقتالعان سوڭ ولاردىڭ ارەكەتىنە تۇبەگەيلى قۇقىقتىق باعا بەرىلەدى.
سونىمەن قاتار اسكەري ءتارتىپ پەن الدىن الۋ جۇمىستارىندا ءبىرشاما كەمشىلىك بارى انىقتالدى. اسكەريلەرگە الىمجەتتىك جاساۋ، جارعىعا قايشى ارەكەت ەتۋ فاكتىلەرى اشكەرەلەنىپ، قىلمىستىق ىستەر قوزعالدى.
قاۋىپسىزدىك تالاپتارىن، اسكەري قىزمەتتى وتكەرۋ شارتتارىن ساقتاۋ، تىلدى قامتاماسىز ەتۋ جانە جەكە قۇراممەن تاربيە جۇمىسىن ۇيىمداستىرۋ ماسەلەلەرىنە ايرىقشا ءمان بەرىلىپ وتىر.
قاسىم-جومارت توقايەۆ كوميسسياعا قورعانىس مينيسترلىگىنىڭ جاڭا باسشىلىعىمەن بىرلەسىپ، انىقتالعان كەمشىلىكتەردى جويۋ جونىندە ناقتى ۇسىنىستار ازىرلەۋدى تاپسىردى.
تەكسەرىس ناتيجەسى قارۋلى كۇشتەردى رەفورمالاۋ جوسپارىن دايىنداۋ كەزىندە ەسكەرىلۋگە ءتيىس.
جيىندا قازىرگى زاماننىڭ سىن-قاتەرلەرىنە قارسى ءتيىمدى ارەكەت ەتەتىن جاڭا تۇرپاتتى ارميا قالىپتاستىرۋ قاجەتتىگىنە باسا ءمان بەرىلدى. جاڭعىرۋ بەلگىلەرى اسكەري ءتارتىپتىڭ كۇشەيۋىنەن، اسكەري قىزمەتشىلەرگە بورىشىن وتەۋ كەزىندە ءتيىستى جاعداي جاساۋدان جانە قاۋىپسىزدىك دەڭگەيىنىڭ ارتقانىنان بايقالۋعا ءتيىس.
سونىمەن قاتار كەشەندى تەكسەرىس وبەكتيۆتى تۇردە جۇرگىزىلىپ، اسكەردىڭ جاۋىنگەرلىك ازىرلىگىنە نۇقسان كەلتىرمەۋ قاجەتتىگى اتاپ ءوتىلدى.
قارۋلى كۇشتەر قاتارىندا كونستيتۋتسياداعى «زاڭ مەن ءتارتىپ» قاعيداتى مۇلتىكسىز ساقتالۋى كەرەك.
كوميسسيا جۇمىسى جالعاسىپ جاتىر.
ايتا كەتەلىك پرەزيدەنت قورعانىس مينيسترلىگىندەگى اۋقىمدى اۋديتتى جالعاستىرۋدى تاپسىرعان ەدى.