قازاقستاننىڭ قاشاعان مۇنايىنا تۇسكەن ءونىمنىڭ 2 پايىزىن عانا يەلەنىپ وتىرعانى راس پا - ءمينيستردىڭ جاۋابى

استانا. KAZINFORM - ەنەرگەتيكا ءمينيسترى ەرلان اقكەنجەنوۆ ۇكىمەت وتىرىسىنان كەيىن وتكەن باسپا ءسوز ءماسليحاتىندا قاشاعان جوباسىنداعى قازاقستاننىڭ ۇلەسى تۋرالى پىكىر ءبىلدىردى.

- حالىقارالىق زەرتتەۋشى جۋرناليستەر كونتسورتسيۋمى قاشاعان وپەراتورلار مەن قازاقستان اراسىنداعى حالىقارالىق تورەلىكتەگى ءىستىڭ قۇجاتتارىنا سۇيەنىپ، قازاقستان تارابىنىڭ ۇلەسى 2 پايىز عانا دەگەن مالىمەت تاراتتى. بۇل مالىمەتتى راستايسىز با، - دەپ سۇرادى جۋرناليست.

ءمينيستردىڭ سوزىنشە ول اقپارات شىندىققا جاناسپايدى.

- مەن سىزگە بىلاي جاۋاپ بەرەيىن. «قازمۇنايگاز» ۇلتتىق كومپانياسىنىڭ قولىندا قازىر بۇل جوبا بويىنشا 16,68 پايىز NCOC كونسورسيۋمىنىڭ اكسيالارى بار. سول ءۇشىن ول اقپارات دۇرىس ەمەس دەپ ويلايمىن. نەگە دەسەڭىز، 16 پايىز بولسا، جالپى ماتەماتيكالىق قيسىنعا كەلمەيدى. سول ءۇشىن بۇل راس ەمەس دەپ ويلايمىن، - دەدى ول.

مينيستر «قازمۇنايگاز» ۇلتتىق كومپانياسى قازاقستان ۇكىمەتىنە تيەسىلى كومپانيا دەگەن ءۋاج ايتتى.

- ال قازىرگى ۇلەس ادىلەتتى مە، ادىلەتتى ەمەس پە، مەن ول تۋرالى قازىر پىكىر بىلدىرە المايمىن. ويتكەنى ەنەرگەتيكا ءمينيسترى لاۋازىمىنداعى اداممىن. ال ەكى ارادا حالىقارالىق تورەلىكتە ءىس ءجۇرىپ جاتقاندىقتان، وسى ماسەلە بويىنشا ايتقان ءاربىر پىكىرىمىز تورەلىككە اسەر ەتۋى مۇمكىن، - دەدى ەرلان اقكەنجەنوۆ.

رەسمي مالىمەتكە سەنسەك، قاشاعان كەن ورنى ىسكە قوسىلعان ساتتەن باستاپ، 115 ميلليون توننادان استام ەكسپورتتىق مۇناي، 70 ميلليارد تەكشە مەتردەن استام گاز جانە 10 ميلليون توننادان استام كۇكىرت وندىرىلگەن.

اۆتور

ەسىمجان ناقتىباي