قازاقستاندا كيبەرشابۋىلدار كەزىندە ينتەرنەت ءوشىرىلۋى مۇمكىن
استانا. KAZINFORM - «كيبەرقاۋىپسىزدىك ينتسيدەنتتەرى انىقتالعان كەزدە بايلانىس قىزمەتتەرىن كورسەتۋدى توقتاتا تۇرۋ قاعيدالارىن بەكىتۋ تۋرالى» نورماتيۆتىك قۇقىقتىق اكتىنىڭ جوباسى اشىق ن ق ا پورتالىندا قوعامدىق تالقىلاۋعا ۇسىنىلدى.
قۇجاتتى جاساندى ينتەللەكت جانە سيفرلىق دامۋ مينيسترلىگى ازىرلەگەن. ۆەدومستۆو مالىمەتىنشە، تۇزەتۋلەر سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ قولدانىستاعى اكتىلەرىنە جۇرگىزىلگەن قۇقىقتىق مونيتورينگ ناتيجەسىندە ەنگىزىلگەن.
- قۇجاتتا بايلانىس جەلىلەرىندەگى كيبەرقاۋىپسىزدىك وقىس وقيعالارىن انىقتاۋ، كيبەرقاۋىپسىزدىكتى قامتاماسىز ەتۋ ورتالىقتارىنىڭ كيبەرقاۋىپسىزدىكتى ۇلتتىق ۇيلەستىرۋ ورتالىعىمەن ءوزارا ءىس-قيمىلى، بايلانىس قىزمەتتەرىن كورسەتۋدى ۋاقىتشا توقتاتا تۇرۋ تۋرالى شەشىم قابىلداۋ جانە ولاردى قالپىنا كەلتىرۋ ءتارتىبى ايقىندالادى، - دەلىنگەن جوبا ماتىنىندە.
ايتا كەتەيىك، بىلتىر مەملەكەت باسشىسى تۇركى مەملەكەتتەرى ۇيىمىنىڭ سامميتىندە ءسوز سويلەپ، ۇيىم اياسىندا كيبەرقاۋىپسىزدىك كەڭەسىن قۇرۋدى ۇسىنعان ەدى.
سونىمەن قاتار بيىل ناۋرىزدا قازاقستاندا دەرەكتەر مەن سيفرلىق ينفراقۇرىلىمدى قورعاۋدى كۇشەيتۋگە باعىتتالعان جاڭا ۇلتتىق ستاندارتتار بەكىتىلدى.