قازاقستان تاريحى تۋرالى 7 تومدىقتىڭ نەگىزگى جاڭالىقتارى قانداي

استانا. KAZINFORM - قازاقستان تاريحى بويىنشا جارىق كورەتىن جەتى تومدىقتا رەسەي، قىتاي، پارسى، ەۋروپا ارحيۆتەرىنەن تابىلعان تىڭ قۇجاتتار مەن دەرەكتەر پايدالانىلادى. بۇل تۋرالى مەملەكەتتىك كەڭەسشى ەرلان قارين دەپۋتات نارتاي ارالباي ۇلىنا بەرگەن سۇحباتىندا ايتتى.

مەملەكەتتىك كەڭەسشىنىڭ سوزىنشە، ازىرلەنىپ جاتقان قازاقستان تاريحى كوپتومدىعىنىڭ باستى ەرەكشەلىگى ادىستەمەلىك تۇرعىسىنان بولماق.

- بۇل كوپتومدىقتا وركەنيەتتىك تۇجىرىمداما قولدانىلادى. ياعني، قازاقستان تەك ەجەلگى مەملەكەتتەردىڭ مەكەن ەتكەن تەرريتورياسى عانا ەمەس، وزىندىك تۇتاس وركەنيەتتىڭ وشاعى مەن دامۋ ورتالىعى رەتىندە دە كورسەتىلەدى. ءبىز وسى ۋاقىتقا دەيىن «وسىنداي تەرريتوريادا وسىنداي مەملەكەت بولعان ەكەن» دەگەن تۇجىرىممەن عانا كەلدىك جانە سونى دالەلدەۋگە تىرىساتىنبىز. ءبىزدىڭ ويىمىزشا، بۇل دالەلدەۋدى قاجەت ەتپەيتىن تۇجىرىم. قازاقستان اۋماعىندا ءتۇرلى ەجەلگى مەملەكەتتەر بولعانى ونسىز دا بەلگىلى، - دەدى ە. قارين.

ول سونىمەن قاتار قازاقستان ۇلكەن كوشپەلى دالا وركەنيەتىنىڭ وشاعى ەكەنىن دە تىلگە تيەك ەتتى.

- ءبىز وسى تەرريتوريادا عانا ەمەس، ءبىزدىڭ تەرريتوريادان تىس اۋماقتارعا دا ءوزىمىزدىڭ مادەني، ساياسي ىقپالىمىزدى جۇرگىزگەنبىز. وسىنداي ۇلكەن ادىستەمەلىك جاڭالىعىمىز بولادى. مۇنى ءبىز جىل باسىندا قازاقستان تاريحشىلارى كونگرەسىندە تالقىلاعانبىز. سوعان سايكەس ادىستەمەلىك توپ قۇردىق. توپ ىشىندە بۇل تۇجىرىمداما تالقىلانىپ، ونى ءاربىر تومدا قولدانىپ جاتىرمىز. مىسالى ءبىز بۇرىن مەملەكەتتىلىك ءداۋىرىن تۇركى داۋىرىنەن باستاساق، قازىرگى زەرتتەۋلەرگە سايكەس، مەملەكەتتىلىكتى ساق داۋىرىنەن باستاۋعا ابدەن بولاتىنىن كورسەتتىك. ودان بولەك قازاقستان اۋماعىندا التاي، جەتىسۋ، ارال ماڭى، بوتاي مادەنيەتى سياقتى بىرنەشە وركەنيەتتىك ارەال بولعانىن دا كورسەتەمىز، - دەدى مەملەكەتتىك كەڭەسشى.

مىسالى كوپتومدىقتىڭ ەكىنشى تومىندا قازاقستان تەرريتورياسىندا ءارتۇرلى كەزەڭدە ءومىر سۇرگەن 14-15 تۇركى مەملەكەتىنىڭ تاريحى جازىلماق.

- ءۇشىنشى تومدا وتاندىق تاريح عىلىمىندا تۇڭعىش رەت تۇتاس التىن وردا ءداۋىرىن بولەك كەلتىرەتىن بولامىز. بۇعان كوپتەگەن جاڭا دەرەك قولدانىلادى. كەيىنگى جىلدارى جۇرگىزىلگەن شەتەلدەگى ارحيۆ جۇمىستارىنىڭ ناتيجەسىندە، بۇعان دەيىنگى دەرەك بويىنشا رەسەي، قىتاي، پارسى، ەۋروپا ارحيۆتەرىنەن بۇرىن-سوڭدى قولدانىلماعان 6 مىڭعا جۋىق ارحيۆتىك قۇجاتتار، كارتالار تابىلدى. بۇلار دا وسى كوپتومدىقتا جاريالانادى. سوندىقتان بۇل كوپتومدىقتىڭ جاڭالىقتارى كوپ بولادى ءارى كەڭىنەن تالقىلانادى، - دەپ تولىقتىردى ءسوزىن ەرلان قارين.

اۆتور

ايجان سەرىكجان قىزى