قازاقستان س ءى م باسشىسى يسلام ىنتىماقتاستىعى ۇيىمى سەسسياسىنا قاتىستى
استانا. KAZINFORM - قازاقستان رەسپۋبليكاسى پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋ كەشە يسلام ىنتىماقتاستىعى ۇيىمى سىرتقى ىستەر مينيسترلەرى كەڭەسىنىڭ 51- سەسسياسىنىڭ جۇمىسىنا قاتىستى.
كەزدەسۋ بارىسىندا دەلەگاتسيا باسشىلارى ي ى ۇ كەڭىستىگىندەگى ءتۇرلى اسكەري-ساياسي جانە گۋمانيتارلىق داعدارىستاردى رەتتەۋ جونىندەگى شارالاردى تالقىلاپ، يران-يزرايل قارۋلى قاقتىعىستى تەز ارادا شەشۋگە جانە گازا سەكتورىندا اتىستى دەرەۋ توقتاتۋعا شاقىردى.
«وزگەرمەلى الەمدەگى ي ى ۇ» ۇرانىمەن وتكەن فورۋمنىڭ كۇن تارتىبىنە ۇيىمدى ودان ءارى رەفورمالاۋعا، مۇشە ەلدەر اراسىنداعى كوپجاقتى ىنتىماقتاستىقتى نىعايتۋعا، الەمدەگى مۇسىلمان ازشىلىقتارىنىڭ جاعدايىنا، قارۋسىزدانۋ مەن يسلاموفوبياعا بايلانىستى ماسەلەلەر دە كىردى.
قازاقستان سىرتقى ىستەر ءمينيسترى ءوز سوزىندە يراننىڭ اينالاسىنداعى جاعدايدى دەەسكالاتسيالاۋدىڭ ماڭىزدىلىعىنا نازار اۋدارىپ، گازا سەكتورىنا ازىق-تۇلىك پەن ءدارى-دارمەك جەتكىزۋ ءۇشىن گۋمانيتارلىق دالىزدەردى اشۋعا شاقىردى.
- قازاقستان وڭىردەگى جاعدايدى تۇراقتاندىرۋ جانە قاۋىپسىزدىكتى قامتاماسىز ەتۋ جونىندەگى حالىقارالىق قوعامداستىقتىڭ كۇش-جىگەرىنە ءوزىنىڭ بەرىك قولداۋىن راستايدى جانە تاعى دا اتىستى دەرەۋ توقتاتۋعا جانە گازاعا گۋمانيتارلىق كومەكتى كەدەرگىسىز جەتكىزۋگە شاقىرادى، - دەدى مۇرات نۇرتىلەۋ.
سونىمەن قاتار ق ر س ءى م باسشىسى ي ى ۇ- نىڭ حالىقارالىق ارەناداعى ءرولىن نىعايتۋعا باعىتتالعان ءبىرقاتار ۇسىنىستاردى ايتىپ، قازاقستاننىڭ وسى پروتسەسكە ءوز ۇلەسىن قوسۋعا دايىن ەكەنىن ءبىلدىردى.
س ى م ك 51- سەسسياسى بارىسىندا ءارتۇرلى باعىتتار، ونىڭ ىشىندە ساياسي، ەكونوميكالىق، قۇقىقتىق، گۋمانيتارلىق جانە اكىمشىلىك- قارجىلىق ماسەلەلەر بويىنشا 100-دەن استام قارار تالقىلانىپ، قابىلداۋ جوسپارلانۋدا. قازاقستاندىق باستامالار س ى م ك- ءتىڭ ءتيىستى قۇجاتتارىنا ەنگىزىلدى.
سەسسيا بارىسىندا م. نۇرتىلەۋ تۇركيانىڭ سىرتقى ىستەر ءمينيسترى حاكان فيدانمەن، ازەربايجاننىڭ سىرتقى ىستەر ءمينيسترى دجەيحۋن بايراموۆپەن، ساۋد ارابياسىنىڭ سىرتقى ىستەر ءمينيسترى فەيسال بەن فارحان ءال ساۋدپەن، پاكىستاننىڭ سىرتقى ىستەر ءمينيسترى مۇحامماد يسحاق دارمەن، يراننىڭ سىرتقى ىستەر ءمينيسترى سەيەد ابباس اراكچيمەن جانە سيريانىڭ سىرتقى ىستەر ءمينيسترى اسااد حاسان اش- شيبانيمەن، سونداي-اق ب ۇ ۇ وركەنيەتتەر اليانسىنىڭ جوعارى وكىلى ميگەل انحەل موراتينوسپەن ەكىجاقتى كەزدەسۋلەر وتكىزدى. تاراپتار ەكىجاقتى جانە كوپجاقتى فورماتتاعى ىنتىماقتاستىقتى دامىتۋ جولدارىن، سونداي-اق ءوزارا قىزىعۋشىلىق تۋدىراتىن باسقا دا ماسەلەلەردى تالقىلادى.
اۆتور
نازىم بولەسوۆا