قازاقستان زاڭناماسى مۇنداي كولىكتەردى تاكسي رەتىندە پايدالانۋعا تىيىم سالادى.
ۇكىمەت وتىرىسىندا inDrive قازاقستان باس ديرەكتورى اراي بەكەمبايەۆ كومپانيا وڭ رۋلدى جانە قايتا جابدىقتالعان كولىكتەردى VIN- كود ارقىلى تەكسەرەتىنىن ايتتى. ەگەر اۆتوموبيل بەلگىلەنگەن تالاپتارعا سايكەس كەلمەسە، جۇرگىزۋشىنىڭ سەرۆيس ارقىلى تاپسىرىس قابىلداۋ مۇمكىندىگى بۇعاتتالادى.
نەلىكتەن وڭ ءرۋلدى كولىكپەن تاكسي قىزمەتىن كورسەتۋگە بولمايدى جانە مۇنداي اۆتوموبيلدەردىڭ جولداعى قاۋىپسىزدىگىنە قاتىستى قانداي تاۋەكەلدەر بار؟
زاڭ نە دەيدى؟
قازاقستاندا وڭ ءرۋلدى اۆتوكولىككە يەلىك ەتۋ مەن ونى تاكسي رەتىندە پايدالانۋ - ەكى بولەك ماسەلە. ەلدە بۇرىن تىركەلگەن مۇنداي كولىكتەر جول قوزعالىسىنا قاتىسا الادى، الايدا ولارمەن اقىلى تاكسي تاسىمالىن جۇزەگە اسىرۋعا رۇقسات جوق.
«اۆتوموبيل كولىگى تۋرالى» زاڭدا تاكسيمەن تاسىمالداۋ ءۇشىن كەمىندە ءتورت ەسىگى بار، سەريالى شىعارىلعان جەڭىل اۆتوموبيل پايدالانىلاتىنى كورسەتىلگەن. سونىمەن قاتار ارناۋلى باسقارىلاتىن، تولىقتاي قولمەن باسقارىلاتىن جانە ءرولى وڭ جاقتا ورنالاسقان اۆتوكولىكتەردى تاكسي رەتىندە پايدالانۋعا تىكەلەي تىيىم سالىنعان.
ءدال وسىنداي تالاپ اۆتوموبيل كولىگىمەن جولاۋشىلار مەن باگاجدى تاسىمالداۋ قاعيدالارىندا دا بار. ونىڭ 212-تارماعىندا وڭ جاق رۋلدى اۆتوكولىكتى تاكسي تاسىمالىنا پايدالانۋعا رۇقسات ەتىلمەيتىنى جازىلعان.
كولىك مينيسترلىگى دە تاسىمالداۋشىلارعا ارنالعان تۇسىندىرمەسىندە قازاقستان اۋماعىندا وڭ رۋلدى كولىكپەن جولاۋشىلار تاسىمالداۋ قىزمەتىنە تىيىم سالىنعانىن ەسكە سالعان.
نەگە وڭ رۋل قاۋىپتى دەپ ەسەپتەلەدى؟
ماسەلە رۋلدىڭ قاي جاعىندا تۇرعانىندا عانا ەمەس، اۆتوموبيل كونسترۋكسياسىنىڭ جول قوزعالىسى ۇيىمداستىرىلعان باعىتقا سايكەستىگىنە بايلانىستى.
قازاقستاندا كولىك قوزعالىسى جولدىڭ وڭ جاعىمەن جۇرەدى. مۇنداي جۇيەگە سول جاق رۋلدى اۆتوموبيلدەر بەيىمدەلگەن: جۇرگىزۋشى جولدىڭ ورتالىق بولىگىنە جاقىنىراق وتىرادى. ال وڭ رۋلدى كولىكتە جۇرگىزۋشى جول جيەگىنە قاراي ورنالاسادى.
بۇل ايىرماشىلىق اسىرەسە ەكى جولاقتى تاسجولدا الدا كەلە جاتقان كولىكتى باسىپ وزعاندا ماڭىزدى. جۇرگىزۋشى قارسى باعىتتاعى جولدى كورۋ ءۇشىن اۆتوموبيلدى جولدىڭ ورتاسىنا قاراي كوبىرەك شىعارۋعا ءماجبۇر بولۋى مۇمكىن. ياعني قارسى كەلە جاتقان كولىكتى بايقاۋعا ارنالعان كورۋ ايماعى شەكتەلەدى.
2026-جىلى Promet - TrafficTransportation عىلىمي جۋرنالىندا جاريالانعان زەرتتەۋدە ءدال وسى ماسەلە قاراستىرىلعان. عالىمدار وڭ جاق قوزعالىس جاعدايىندا وڭ رۋلدى جانە سول رۋلدى اۆتوموبيل جۇرگىزۋشىلەرىنىڭ باسىپ وزۋ كەزىندەگى كورۋ مۇمكىندىگىن سالىستىرعان. زەرتتەۋ وڭ رۋلدى اۆتوموبيلدەردە باسىپ وزۋ كەزىندە قارسى باعىتتى تىكەلەي باقىلاۋ مۇمكىندىگى شەكتەلەتىنىن كورسەتەدى. اۆتورلار مۇنداي جاعدايدا قوسىمشا جاناما كورۋ قۇرالدارىنىڭ قاجەتتىلىگىن دە زەرتتەگەن.
قالاارالىق تاسىمالداۋدا تاۋەكەل نەگە جوعارى؟
ماسەلە قالاارالىق باعىتتاردا ايرىقشا وزەكتى. مۇندا جۇرگىزۋشى جوعارى جىلدامدىقپەن قوزعالادى، ەكى جولاقتى تراسسالاردا قارسى جولاققا شىعىپ باسىپ وزۋ جيى كەزدەسەدى. سوندىقتان كورۋ قاشىقتىعى مەن قارسى كەلە جاتقان كولىكتى دەر كەزىندە بايقاۋ مۇمكىندىگى شەشۋشى مانگە يە.
كولىك مينيسترلىگى 2026-جىلدىڭ ماۋسىمىندا وتكىزىلگەن «قاۋىپسىز جول» رەسپۋبليكالىق اكسياسىندا دا وڭ رۋلدى Toyota Alphard ،Estima سەكىلدى كولىكتەرگە ەرەكشە نازار اۋدارىلاتىنىن حابارلاعان. رەيدتەردىڭ نەگىزگى ماقساتى جولاۋشىلار تاسىمالى كەزىندەگى قاۋىپسىزدىكتى قامتاماسىز ەتۋ جانە جول اپاتتارىنىڭ الدىن الۋ بولدى.
قۇقىقتىق ستاتيستيكا ورگاندارىنىڭ دەرەگىنە سايكەس، 2025-جىلى قازاقستاندا ادامداردىڭ قازا بولۋى نەمەسە جاراقات الۋىنا اكەلگەن 34146 جول-كولىك وقيعاسى تىركەلگەن.
جىلدامدىق تا نەگىزگى قاۋىپ فاكتورلارىنىڭ ءبىرى
جولاۋشىلار تاسىمالىنداعى قاۋىپ تەك كولىك كونسترۋكسياسىنا بايلانىستى ەمەس. جۇرگىزۋشىنىڭ جىلدامدىق رەجيمىن ساقتاۋى مەن دەمالىسى دا ماڭىزدى.
ءى ءى م مالىمەتىنشە، 2025-جىلدىڭ العاشقى جارتىسىندا قازاقستاندا جىلدامدىقتى اسىرۋدىڭ ءۇش ميلليوننان استام دەرەگى انىقتالعان. ەلدى مەكەندەردە جىلدامدىقتى ارتتىرۋ سالدارىنان 1129 جول اپاتى بولىپ، 95 ادام قازا تاپقان. رەسپۋبليكالىق جانە وبلىستىق ماڭىزى بار جولداردا وسى سەبەپتەن 986 ج ك و تىركەلىپ، 180 ادام كوز جۇمعان.
وسىعان بايلانىستى inDrive جۇرگىزۋشىلەردىڭ جەكە باسى مەن كولىگىن فوتوباقىلاۋ ارقىلى تەكسەرىپ، جىلدامدىق پەن جۇرگىزۋشىنىڭ رولدە ۇزاق وتىرۋىن باقىلاۋ جۇيەسىن ەنگىزگەن. كومپانيا مالىمەتىنشە، ناۋرىزدان بەرى Safety Hub قاۋىپسىزدىك ورتالىعى جۇمىس ىستەيدى.
ونىڭ وپەراتورلارى جىلدامدىقتى اسىرعان نەمەسە ۇزاق ۋاقىت كولىك جۇرگىزگەن جۇرگىزۋشىلەرگە حابارلاسادى. كومپانيا قابىلدانعان شارالاردان كەيىن جىلدامدىقتى اسىرۋ ۇلەسى 42 پايىزعا تومەندەگەنىن مالىمدەدى.