قازاقستان رەسپۋبليكاسىنىڭ شەت ەلدەردەگى مەكەمەلەرى (بۇدان ءارى - شەت ەلدەردەگى مەكەمەلەر) ءتيىستى كونسۋلدىق وكرۋگتىڭ اۋماعىندا قازاقستان رەسپۋبليكاسىنان تىس جەردە تۇراقتى جانە ۋاقىتشا تۇراتىن قازاقستان رەسپۋبليكاسى ازاماتتارىنىڭ ەسەبىن جۇرگىزەدى.
مۇنداي تىركەۋدىڭ ماقساتى - ازاماتتاردىڭ قۇقىقتارى مەن زاڭدى مۇددەسىن قورعاۋ، سونداي-اق ولارعا قابىلداۋشى ەلدىڭ زاڭناماسىندا، حالىقارالىق شارتتاردا جانە حالىقارالىق ادەت-عۇرىپتاردا كوزدەلگەن قۇقىقتارىن جۇزەگە اسىرۋعا كومەكتەسۋ .
«قازاقستان رەسپۋبليكاسىنان تىس جەردە تۇراقتى جانە ۋاقىتشا تۇراتىن قازاقستان رەسپۋبليكاسىنىڭ ازاماتتارىن ەسەپكە قويۋ» مەملەكەتتىك قىزمەتىن الۋشى نەمەسە ونىڭ زاڭدى وكىلى شەت ەلدەگى مەكەمەگە ءبىرقاتار قۇجات ۇسىنادى. اتاپ ايتقاندا، قازاقستان رەسپۋبليكاسىنان تىس جەردە تۇراقتى تۇراتىن ازاماتتاردى ەسەپكە قويۋ مىناداي قۇجاتتار قاجەت:
- جەكە باسىن كۋالاندىراتىن قۇجات نەمەسە سيفرلىق قۇجاتتار سەرۆيسىنەن الىنعان ەلەكتروندىق قۇجات (جەكە باسىن سايكەستەندىرۋ ءۇشىن)؛
- قازاقستاننان تىس جەرگە تۇراقتى تۇرۋ ءۇشىن شىعۋعا ارنالعان قۇجاتتاردى رەسىمدەۋ تۋرالى شەشىم نەمەسە قازاقستاننان تىس جەرگە تۇراقتى تۇرۋ ءۇشىن شىعۋعا شەشىم رەسىمدەلگەنى تۋرالى حابارلاما (سالىستىرۋ ءۇشىن)؛
قازاقستاننان تىس جەردە تۇراقتى تۇراتىن قازاقستان رەسپۋبليكاسى ازاماتتارىن ەسەپكە الۋدىڭ تولتىرىلعان كارتوچكاسى (بۇدان ءارى - ەسەپكە الۋ كارتوچكاسى)؛
قازاقستاننان تىس جەردە ۋاقىتشا تۇراتىن قازاقستان رەسپۋبليكاسىنىڭ ازاماتتارىن ەسەپكە قويۋ ءۇشىن:
- جەكە باسىن كۋالاندىراتىن قۇجات نەمەسە سيفرلىق قۇجاتتار سەرۆيسىنەن الىنعان ەلەكتروندىق قۇجات (جەكە باسىن سايكەستەندىرۋ ءۇشىن)؛
- قازاقستاننان تىس جەردە ۋاقىتشا تۇراتىن قازاقستان رەسپۋبليكاسى ازاماتتارىن ەسەپكە الۋدىڭ تولتىرىلعان كارتوچكاسى (بۇدان ءارى - كارتوچكا).
باسقا مەملەكەتكە ۋاقىتشا تۇرۋ ءۇشىن شىعاتىن قازاقستان رەسپۋبليكاسىنىڭ ازاماتتارىنا شەت ەلدەردەگى مەكەمەلەرىنىڭ پەرسونالى، قازاقستان رەسپۋبليكاسىنا بەكىتىپ بەرىلگەن كۆوتالارعا سايكەس حالىقارالىق ۇيىمدار جانىنداعى بەيبىتشىلىك پەن قاۋىپسىزدىكتى ساقتاۋ جونىندەگى حالىقارالىق مىندەتتەمەلەردى ورىنداۋعا جىبەرىلگەن اسكەري قىزمەتشىلەر لاۋازىمدارعا تاعايىندالعان، شەتەلدە ۋاقىتشا ەڭبەك قىزمەتىن جۇزەگە اسىراتىن قازاقستان رەسپۋبليكاسىنىڭ ازاماتتارى، سونداي-اق، ۇيىمدار مەن جەكە ادامداردىڭ شاقىرۋى بويىنشا وقۋدا، ەمدەلۋدە، تۋريستىك جانە جەكە ساپاردا، شەت ەلدەردە قىزمەتتىك ءىسساپاردا جۇرگەن ادامدار جاتادى.
قازاقستان رەسپۋبليكاسىنىڭ ازاماتى شەت ەلدەردەگى مەكەمەدەن كەلەسى جاعدايدا ەسەپتەن شىعارىلادى:
- ءوزى نەمەسە ونىڭ زاڭدى وكىلى شەت ەلدەردەگى مەكەمەلەرگە ەسەپتەن شىعارۋ تۋرالى ەركىن نىساندا جاسالعان ءوتىنىش بەرسە؛
- ونىڭ قازاقستان رەسپۋبليكاسىنىڭ باسقا شەت ەلدەردەگى مەكەمەلەرىندە ەسەپكە قويىلعانى تۋرالى حابارلاما كەلسە؛
- ەسەپ كارتوچكاسىندا/كارتوچكادا كورسەتىلگەن كونسۋلدىق وكرۋگ اۋماعىنداعى، ۋاقىتشا ورنالاسۋ نەمەسە تۇراقتى تۇرۋ مەرزىمى اياقتالسا؛
- قايتىس بولسا، ونىڭ حابار-وشارسىز كەتكەنى نەمەسە قايتىس بولعانى تۋرالى سوت شەشىمى زاڭدى كۇشىنە ەنسە؛
- قازاقستان رەسپۋبليكاسىنىڭ ازاماتتىعى توقتاتىلسا.
بۇعان دەيىن ەلىمىزدە تۇراقتى تۇرۋعا مۇمكىندىك الاتىن شەتەلدىكتەر قاتارى كەڭەيۋى مۇمكىن ەكەنىن جازعان ەدىك.