مينيستر ب ۇ ۇ باس حاتشىسىنا قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ سالەمىن جەتكىزىپ، مەملەكەت باسشىسىنىڭ اتىنان كۇردەلى حالىقارالىق جاعدايداعى ا. گۋتەرريشتىڭ قىزمەتىنە، ونىڭ كوپجاقتىلىق قاعيداتتارى مەن ب ۇ ۇ جارعىسىنا دايەكتى بەيىلدىلىگىنە، سونداي-اق قازاقستان رەسپۋبليكاسى مەن ب ۇ ۇ اراسىنداعى جان-جاقتى ىنتىماقتاستىقتى نىعايتۋعا قوسقان جەكە ۇلەسىنە جوعارى باعا بەردى.
تاراپتار حالىقارالىق كۇن تارتىبىندەگى وزەكتى ماسەلەلەردى جانە ب ۇ ۇ باس اسسامبلەياسىنىڭ 81-سەسسياسى اياسىنداعى ءوزارا ءىس-قيمىلدىڭ باسىم باعىتتارىن تالقىلادى.
م. تىلەۋبەردى باس حاتشىنىڭ ۇيىم قىزمەتىنىڭ تيىمدىلىگىن ارتتىرۋ جونىندەگى كۇش-جىگەرىن قولدايتىنىن راستادى. وسى تۇرعىدا الماتىداعى ورتالىق ازيا مەن اۋعانستان ءۇشىن تۇراقتى دامۋ ماقساتتارى جونىندەگى ب ۇ ۇ وڭىرلىك ورتالىعىنىڭ قىزمەتىنە كوپجاقتى ىنتىماقتاستىقتىڭ وڭىرلىك ولشەمىندەگى نەگىزگى الاڭ رەتىندە ەرەكشە نازار اۋدارىلدى.
باس حاتشى قالىپتاسىپ كەلە جاتقان كوپپوليارلى الەمدەگى قازاقستاننىڭ ءرولىنىڭ ارتىپ كەلە جاتقانىن ەرەكشە اتاپ ءوتىپ، ەلىمىزدى «كوپىرلەر سالۋشى» رەتىندە باعالادى جانە قازاقستاننىڭ نەگىزگى حالىقارالىق سەرىكتەستەرمەن سىندارلى قارىم-قاتىناستاردى ساقتاي الۋ قابىلەتىنە نازار اۋداردى.
كەزدەسۋ بارىسىندا مينيستر بۇۇ قۇرمەتتى قوناقتار كىتابىنا جازبا قالدىرىپ، باس حاتشىنىڭ كوپجاقتىلىقتى نىعايتۋعا قوسقان ۇلەسىن اتاپ ءوتتى جانە قازاقستاننىڭ ۇيىم اياسىنداعى ودان ءارى ءوزارا ءىس-قيمىلعا دەگەن وزگەرمەس بەيىلدىلىگىن ءبىلدىردى.
سونداي-اق سىرتقى ىستەر ءمينيسترى ب ۇ ۇ باس اسسامبلەياسىنىڭ 81-سەسسياسى اياسىندا كيپر، گرۋزيا جانە رۋمىنيانىڭ سىرتقى ىستەر مينيسترلەرىمەن ءبىرقاتار ەكىجاقتى كەزدەسۋ وتكىزدى.
كەزدەسۋلەر قورىتىندىسى بويىنشا مينيسترلەر بىرىككەن ۇلتتار ۇيىمى جانە باسقا دا كوپجاقتى الاڭدار اياسىندا تىعىز ۇيلەستىرۋدى جالعاستىرۋعا دايىن ەكەندىكتەرىن راستادى. سونىمەن قاتار حالىقارالىق جانە وڭىرلىك كۇن تارتىبىندەگى وزەكتى ماسەلەلەر جونىندە پىكىر الماستى.
ايتا كەتەيىك، بۇعان دەيىن قازاقستان مەن بەنين ءوزارا ۆيزالىق تالاپتاردان بوساتۋ تۋرالى كەلىسىمگە قول قويعانىن حابارلادىق.