وتىرىستى اشا وتىرىپ، ەرلان قوشانوۆ ەل پرەزيدەنتى قاسىم-جومارت توقايەۆ قازاقستان حالىق كەڭەسىنىڭ الدىنا قوعامدىق كەلىسىم مەن بىرلىكتى نىعايتۋعا، ازاماتتاردىڭ مەملەكەتتىك باسقارۋعا قاتىسۋىن كەڭەيتۋگە، سونداي-اق قوعام مەن مەملەكەت اراسىنداعى ديالوگتى نىعايتۋعا باعىتتالعان مەملەكەتتىك اۋقىمداعى مىندەتتەر قويعانىن اتاپ ءوتتى. اتاپ ايتىلعانداي، ازاماتتار مەن بيلىك اراسىنداعى قاشىقتىقتى قىسقارتاتىن جانە حالىقتىڭ ءۇنىن اناعۇرلىم سالماقتى ەتەتىن جاڭا ينستيتۋتتىڭ تەرەڭ فيلوسوفياسى ءدال وسىندا جاتىر، سونداي-اق قازاقستان حالىق كەڭەسى پرەزيدەنتتىڭ سەنىم مانداتىن ناقتى جۇمىسپەن جانە ناقتى ناتيجەلەرمەن اقتاۋى ءتيىس ەكەنىن قوستى.
- بۇگىن ءبىز حالىق كەڭەسى ءتورالقاسىنىڭ العاشقى وتىرىسىن وتكىزىپ وتىرمىز. جۋىردا عانا بارشامىز ەل تاريحىنداعى ەلەۋلى وقيعانىڭ كۋاسى بولدىق. جاڭا كونستيتۋتسيالىق ينستيتۋت ءوز جۇمىسىن باستادى. مۇنىڭ ارتىندا مەملەكەت باسشىسىنىڭ سوڭعى جىلدارداعى اۋقىمدى، تاباندى ءارى ەسەلى ەڭبەگى تۇر. پرەزيدەنتىمىز حالىق كەڭەسىنىڭ الدىنا ماڭىزدى مىندەتتەر قويدى. ولار - بىرلىك پەن قوعامدىق كەلىسىمدى نىعايتۋ، ازاماتتاردىڭ مەملەكەت ىسىنە ارالاسۋ مۇمكىندىگىن كەڭەيتۋ، قوعام مەن مەملەكەتتىڭ ءوزارا بايلانىسىن جاڭا بەلەسكە كوتەرۋ. حالىق كەڭەسىنىڭ ءمانى دە، تاريحي ميسسياسى دا وسىندا. ەل پرەزيدەنتى ارتقان وسى زور سەنىمگە ءبىز ناقتى ىسپەن، ناتيجەلى جۇمىسپەن جاۋاپ بەرۋگە ءتيىسپىز، - دەدى ەرلان قوشانوۆ.
ءتورالقا وتىرىسىنىڭ بارىسىندا ءۇش نەگىزگى كوميتەتتىڭ قۇرامى بەكىتىلىپ، باسشىلارى تاعايىندالدى. قوعامدىق باستامالاردى دامىتۋ كوميتەتىن ۆەرا كيم، قوعامدىق كەلىسىم جانە جالپىۇلتتىق بىرلىك باعىتىن مارات ءازىلحانوۆ باسقارادى. ال وڭىرلىك دامۋ جانە جەرگىلىكتى ءوزىن- ءوزى باسقارۋ كوميتەتىنىڭ جەتەكشىسى بولىپ تابيعات زەينۇلقابدەن تاعايىندالدى.
كوميتەتتەردىڭ قۇرامىن بەكىتۋ جانە جەتەكشىلەرىن تاعايىنداۋ قازاقستان حالىق كەڭەسىنىڭ ستراتەگيالىق مىندەتتەرىن جۇيەلى، ساپالى جانە ءتيىمدى ىسكە اسىرۋدى قامتاماسىز ەتۋگە، سونداي-اق كونستيتۋتسيالىق كونسۋلتاتيۆتىك ورگان قىزمەتىنىڭ اسا ماڭىزدى باعىتتارى بويىنشا ساراپتامالىق جۇمىستى كۇشەيتۋگە باعىتتالعان.
وسىعان بايلانىستى، كوميتەتتەردىڭ قىزمەت ەرەكشەلىكتەرىن ەسكەرە وتىرىپ جانە عىلىمي-ساراپشىلىق قوعامداستىقتى تارتا وتىرىپ، الداعى كەزەڭگە ارنالعان نەگىزگى مىندەتتەردى ىسكە اسىرۋ توڭىرەگىندە پىكىر الماسۋ ءوتتى.
نەگىزگى نازار بىرلىك پەن كەلىسىمنىڭ جاڭا تۇجىرىمداماسىنا اۋدارىلدى. حالىق كەڭەسىنىڭ مۇشەلەرى بۇل جۇمىسقا بەلسەندى تۇردە ارالاسىپ، ەتنومادەني بىرلەستىكتەردى شوعىرلاندىرۋعا ىقپال ەتۋ سياقتى، بۇل ىسكە دە وزدەرىنىڭ مازمۇندى ۇلەستەرىن قوسۋ قاجەت دەگەن ورتاق پىكىرگە كەلدى.
وتىرىستا وڭىرلەرمەن ءوزارا ءىس-قيمىلدى كەڭەيتۋ، قوعامدىق باقىلاۋدى جۇزەگە اسىرۋ، ءماسليحاتتار مەن قوعامدىق كەڭەستەردى قولداۋ تەتىكتەرى دە تالقىلاندى.
وڭىرلەردەگى ازاماتتاردىڭ ۇسىنىستارىمەن جۇمىس ىستەۋ ماسەلەسىنە دە ايرىقشا ءمان بەرىلدى. قازاقستان حالىق كەڭەسىنىڭ مۇشەسى باعدات مۋسين اتاپ وتكەندەي، باستامالار لەگىنىڭ ارتۋى كۇتىلەتىندىكتەن، ولاردى جۇيەلى جيناۋ، وڭدەۋ جانە مونيتورينگىلەۋ ءۇشىن ءبىرىڭعاي اقپاراتتىق پلاتفورما ازىرلەۋ ۇسىنىلادى. بۇل جۇيە ءاربىر ءوتىنىشتىڭ قارالۋ بارىسىن جانە ول بويىنشا قابىلدانعان شەشىمدەردى قاداعالاپ وتىرۋعا مۇمكىندىك بەرەدى. سونىمەن قاتار اتالعان اقپاراتتىق جۇيە مەملەكەت باسشىسى بەلگىلەگەن نەگىزگى يدەولوگيالىق باعدارلاردى ىسكە اسىرۋدىڭ پارمەندى قۇرالدارىنىڭ بىرىنە اينالادى.
بۇدان بولەك، ازاماتتاردىڭ مەملەكەتتى باسقارۋعا تىكەلەي قاتىسۋىنىڭ جاڭا قۇرالدارىن قۇرۋ تۋرالى ءسوز بولدى. ساراپشىلاردىڭ پىكىرىنشە، بۇگىندە ەلدە كوپتەگەن قوعامدىق جانە كونسۋلتاتيۆتىك- كەڭەسشى ورگاندار جۇمىس ىستەيدى. ءبىراق ولاردىڭ جۇمىسى ءجيى شاشىراڭقى بولىپ كەلەدى، ال فۋنكتسيالارى ءبىر-بىرىمەن قايتالانادى. سوندىقتان بۇل جەردە حالىق كەڭەسى ءوز ءرولىن اتقارۋى ءتيىس: وسى الەۋەتتى بىرىكتىرىپ، ءوزارا ءىس-قيمىلدى جولعا قويۋ جانە جۇمىستى جۇيەلەۋ كەرەك. مۇنداي ءتاسىل جاڭا كونستيتۋتسياعا سايكەس زاماناۋي سىن-قاتەرلەرگە مەملەكەت پەن ازاماتتاردىڭ بىرلەسكەن جاۋاپتارىن ازىرلەۋدىڭ ءتيىمدى الاڭىنا اينالا وتىرىپ، ديالوگتىڭ جاڭا مادەنيەتىن قالىپتاستىرۋعا باعىتتالعان.
ورگاننىڭ جۇمىس ءتارتىبى زاڭنامامەن جانە ىشكى ەرەجەمەن رەگلامەنتتەلگەن، ال ونىڭ قۇرامى حالىق كەڭەسى مۇشەلەرىنىڭ اراسىنان جاساقتالادى.
ايتا كەتەيىك، ءتورالقا قۇرامىنا قازاقستان حالىق كەڭەسىنىڭ باسشىلىعىمەن جانە تۇراقتى كوميتەتتەردىڭ توراعالارىمەن قاتار بەكمۇرات ءجۇسىپوۆ، نارينە ميكاەليان، دەنيس رىپاكوۆ جانە نۇرتاي سابيليانوۆ كىردى.