قاسىم-جومارت توقايەۆ ورتالىق ازيا-قىتاي گۋمانيتارلىق فورۋمىنا قۇتتىقتاۋ جولدادى
استانا. KAZINFORM - ق ر مەملەكەتتىك كەڭەسشىسى ەرلان قارين قىتاي مەن ورتالىق ازيانىڭ «تاتۋ كورشىلىك جانە دوستىق: بولاشاققا بىرگە قادام» اتتى گۋمانيتارلىق الماسۋ فورۋمىندا مەملەكەت باسشىسى قاسىم-جومارت توقايەۆتىڭ قۇتتىقتاۋ حاتىن وقىپ بەردى.
- قادىرلى قاۋىم! سىزدەردى ورتالىق ازيا - قىتاي گۋمانيتارلىق فورۋمىنىڭ اشىلۋىمەن قۇتتىقتايمىن! قىتاي حالىق رەسپۋبليكاسىنىڭ ءتوراعاسى شي جينپيڭ مىرزانىڭ استانا ساپارى اياسىندا وسىنداي القالى جيىن وتكىزۋ يگى داستۇرگە اينالدى. «تاتۋ كورشىلىك جانە دوستىق: بولاشاققا بىرگە قادام» دەگەن تاقىرىپپەن ءوتىپ جاتقان باسقوسۋ - ەلدەرىمىزدىڭ قارىم-قاتىناسىن نىعايتا تۇسەتىن تاعى ءبىر ماڭىزدى ءىس-شارا. قازاقستان مەن قىتاي اراسىنداعى ىنتىماقتاستىق تاتۋ كورشىلىك پەن ماڭگى دوستىق رۋحىندا دامىپ كەلەدى. تەرەڭنەن تامىر تارتاتىن شىنايى سەرىكتەستىگىمىز بۇگىندە ستراتەگيالىق سيپات الىپ، مۇلدەم جاڭا دەڭگەيگە كوتەرىلدى. مادەنيەت - حالىقتار مەن وركەنيەتتەردى جالعايتىن التىن كوپىر. ەكى ەلدىڭ بىرلىگىن بەكەمدەۋ جولىندا مادەني-گۋمانيتارلىق بايلانىستار ايرىقشا ءرول اتقارادى. سوندىقتان ءبىز وسى باعىتتاعى ءوزارا ىنتىماقتاستىعىمىزدى كۇشەيتۋگە ەرەكشە ءمان بەرەمىز. بۇگىنگى جيىندا قوس حالىقتىڭ مىزعىماس قۇندىلىقتارى، ءومىر سالتى مەن اقپاراتتىق قاۋىپسىزدىگى جايىندا تولىمدى وي-پىكىرلەر ايتىلادى دەپ سەنەمىن. بارشاڭىزعا تولاعاي تابىس، باق-بەرەكە تىلەيمىن. فورۋم جۇمىسى جەمىستى بولسىن! - دەلىنگەن پرەزيدەنت قاسىم-جومارت توقايەۆتىڭ قۇتتىقتاۋ حاتىندا.
بۇعان دەيىن پرەزيدەنت قاسىم-جومارت توقايەۆ قىتاي حالىق رەسپۋبليكاسىنىڭ ءتوراعاسى شي جينپيڭدى استانا اۋەجايىنان قارسى العانىن جازعان ەدىك.
اۆتور
ايجان سەرىكجان قىزى