قارۋ-جاراق ساۋداسى: ىشكى ىستەر مينيسترلىگىنىڭ ءبىرقاتار بۇيرىعى وزگەردى

استانا. KAZINFORM - ىشكى ىستەر مينيسترلىگى ازاماتتىق جانە قىزمەتتىك قارۋدىڭ اينالىمىنا قاتىستى ءبىرقاتار بۇيرىققا وزگەرىس ەنگىزدى. بۇل تۇزەتۋلەر قارۋ يەلەرىنە، ساتۋشىلار مەن جاساپ شىعارۋشىلارعا قاتىستى تالاپتاردى ناقتىلاپ، باقىلاۋ تەتىكتەرىن كۇشەيتۋدى كوزدەيدى.

جەڭىلدەتىلگەن تالاپتار

ەندى كونسترۋكتسياسى قارۋعا ۇقساس، ءبىراق ۇرلەمەلى قۋاتى 7,5 دج اسپايتىن، 4,5 م م كاليبرلى پنيەۆماتيكالىق قارۋ مەن دىبىس، جارىق جانە ءتۇتىن بەلگىلەرىن بەرۋ ءۇشىن پايدالانىلاتىن قارۋدى 18 جاسقا تولعان ازاماتتار ارنايى رۇقساتسىز ساتىپ الا الادى. بۇل رەتتە ساتىپ الۋشىدان سوتتىلىعىنىڭ بولماۋى جانە پسيحيكالىق دەنساۋلىعى تۋرالى انىقتاما تالاپ ەتىلەدى.

ارنايى مارتەبەسى بار تۇلعالارعا دا جەڭىلدىكتەر بەرىلدى. اتاپ ايتقاندا، قارۋلى كۇشتەر، قۇقىق قورعاۋ ورگاندارى مەن ارنايى مەملەكەتتىك قىزمەتكەرلەر (قىزمەت ورنىنان ءتيىستى قۇجات ۇسىنعان جاعدايدا) كەيبىر قارۋ تۇرلەرىن قوسىمشا انىقتاماسىز ساتىپ الا الادى.

دۇكەن مەن ساتۋشىعا قويىلاتىن تالاپتار

بۇل باعىتتاعى تالاپتار ناقتىلاندى. قارۋ ساتۋشىلار ارنايى دايىندىقتان ءوتىپ، ساتىپ الۋشىعا نۇسقامالىق جۇرگىزۋگە مىندەتتەلەدى. بارلىق ساۋدا ارنايى جۋرنالدا تىركەلىپ، ءتيىستى قۇجاتتار 10 جىلعا دەيىن ساقتالۋى ءتيىس. ەلەكتروندىق فورماتتا ساقتاۋ رۇقسات ەتىلەدى.

مەحانيكالىق توزاڭداتقىشتار مەن ءاەروزولدى قۇرالداردىڭ ساتىلۋ ءتارتىبى دە قايتا قارالدى. بۇل بۇيىمداردى ساتۋ كەزىندە دە ساتۋشى نۇسقامالىق جۇرگىزۋگە جانە ساتىپ الۋشىنىڭ جاسى مەن دەنساۋلىعىنا قاتىستى تالاپتاردىڭ ورىندالۋىن قاداعالاۋعا مىندەتتى.

وسىلايشا، قارۋدىڭ ساتىلۋى، ساقتالۋى، تاسىمالدانۋى، ەسەپكە الىنۋى جانە جويىلۋىنا قاتىستى قاعيدالار قايتا جازىلىپ، «جەكەلەگەن قارۋ تۇرلەرىنىڭ اينالىمىنا مەملەكەتتىك باقىلاۋ جاساۋ تۋرالى» زاڭ تالاپتارىمەن سايكەستەندىرىلدى. ماقسات - قارۋدىڭ زاڭسىز اينالىمىنا جول بەرمەي، قوعامدىق قاۋىپسىزدىكتى نىعايتۋ.