مادەنيەت مينيسترلىگى ەرمەك تۇرسىنوۆتىڭ ەلدەن كەتۋىنە قاتىستى: بۇل - ونىڭ جەكە شەشىمى

استانا. KAZINFORM - مادەنيەت جانە اقپارات مينيسترلىگى قازاقستاندىق كينورەجيسسەر ەرمەك تۇرسىنوۆتىڭ ەلدەن شەتەلگە كوشۋىنە قاتىستى پىكىر ءبىلدىردى.

- ەرمەك تۇرسىنوۆتىڭ شەتەلگە كەتۋىنە قاتىستى ءبىز تۇسىنىكتەمە بەرە المايمىز، ويتكەنى بۇل ونىڭ جەكە شەشىمى، كونستيتۋتسيا وعان قۇقىق بەرەدى. ءيا، مەملەكەت ءاردايىم ەرمەك تۇرسىنوۆتى قولداپ كەلدى، كوپتەگەن فيلم ءتۇسىرىلدى، جوبالار «قازاق فيلم» اياسىندا دا، ۇلتتىق كينو ورتالىعى اياسىندا دا جۇزەگە اسىرىلدى. الداعى ۋاقىتتا دا قولداۋعا دايىن بولاتىن، ءبىراق بۇل ونىڭ تاڭداۋى، - دەپ جاۋاپ بەردى عاني مۇراتوۆ ب ا ق وكىلدەرىنىڭ ساۋالىنا.

وسى ورايدا مينيسترلىك وكىلى كونستيتۋتسيا ءار ازاماتقا ءسوز بەن شىعارماشىلىق ەركىندىگىنە كەپىلدىك بەرەتىنىن تاعى ەسكە سالدى.

- ول كونسەرتتەر وتكىزدى، كىتاپتار جازدى. مىسالى، وعان كىتاپ باسۋعا نەمەسە كونسەرت وتكىزۋگە تىيىم سالىنعانىن مەن ەستىگەن جوقپىن. وتكەن جىلى ول كوپتەگەن شىعارماشىلىق كەش وتكىزدى. بارلىعى تىنىش ءوتتى، ەشكىم تىيىم سالعان جوق، - دەپ تولىقتىردى باسقارما باسشىسى.

ونىڭ ايتۋىنشا، بيىل ەرمەك تۇرسىنوۆ ۇلتتىق كينو ورتالىعىنا ءۇش جوبانىڭ سەناريىن ۇسىندى.

- دەمەك، ول قاتىسىپ جاتىر. ءبىز ەشقانداي تىيىم كورىپ تۇرعان جوقپىز، - دەيدى عاني مۇراتوۆ.

ەسكە سالايىق، وتكەن جىلى مادەنيەت جانە اقپارات مينيسترلىگى ەرمەك تۇرسىنوۆ 500 ميلليون تەڭگە الىپ، كينو تۇسىرمەگەن دەگەن مالىمدەمە جاساعان ەدى.

ايتا كەتەيىك، 18-مامىردا انتيكور ەرمەك تۇرسىنوۆتىڭ ەلدەن كەتۋىنە بايلانىستى پىكىر ءبىلدىردى.