قاسىم-جومارت توقايەۆ جاقىندا پرەزيدەنت ترامپ پەن ءىرى تەحنولوگيالىق كومپانيالار باسشىلارى قول قويعان جاساندى ينتەللەكتىنىڭ وزىق تەحنولوگيالارىن قاۋىپسىز ءارى جاۋاپكەرشىلىكپەن دامىتۋ تۋرالى ەرىكتى كەلىسىمنىڭ ستراتەگيالىق سالماعىنا نازار اۋداردى.
- دەر كەزىندە كوتەرىلگەن وسى ماڭىزدى باستامانى قۇپتايمىن. جاساندى ينتەللەكتىگە قاتىستى قاۋىپ-قاتەرلەر ەشقانداي شەكاراعا باعىنبايتىنىن ءبارى تۇسىنەدى. سوندىقتان مەملەكەتتەر مەن بيزنەس قاۋىمداستىق تاراپىنان ۇيلەسىمدى ارەكەت قاجەت. ۆاشينگتوندا قول قويىلعان كەلىسىمدى ساراپشىلار مۇقيات زەردەلەگەن سوڭ مۇددەلى مەملەكەتتەر جاساندى ينتەللەكت سالاسىن جاھاندىق دەڭگەيدە رەتتەيتىن ۇلگى رەتىندە قاراستىرۋىنا بولادى. «ۆاشينگتون مودەلى» ب ۇ ۇ اياسىنداعى حالىقارالىق كەلىسىمگە نەگىز بولۋعا لايىق دەپ ويلايمىن. قازاقستان جاساندى ينتەللەكتىنى قاۋىپسىز ءارى جاۋاپكەرشىلىكپەن دامىتۋدى قولدايدى. وسى ورايدا، اتالعان ماسەلە بويىنشا سىندارلى حالىقارالىق ديالوگ جۇرگىزۋگە الاڭ ۇسىنا الامىز. كەڭەس ءىس جۇزىندە ماڭىزدى ەكەنىن كورسەتتى. سوندىقتان كەڭەس مۇشەلەرىنەن قىسقا مەرزىم ىشىندە قازاقستاننىڭ وسى سالاعا قاتىستى حالىقارالىق باستاماسىنا ناقتى ۇسىنىس بەرۋدى سۇرايمىن. ورتاق ۇستانىم بيىل جەلتوقسان ايىندا ماياميدە وتەتىن G20 سامميتىندە تانىستىرىلادى، - دەدى مەملەكەت باسشىسى.
ايتا كەتەيىك، جيىندا پرەمەر-ءمينيستردىڭ ورىنباسارى - جاساندى ينتەللەكت جانە سيفرلىق دامۋ ءمينيسترى جاسلان ماديەۆ، «سامۇرىق- قازىنا» ا ق باسقارما ءتوراعاسى نۇرلان جاقىپوۆ، ونەركاسىپ جانە قۇرىلىس ءمينيسترى ەرسايىن ناعاسپايەۆ، Sinovation Venture جانە 01.AI باس ديرەكتورى لي كاي-فۋ، ابۋ-دابي امىرلىگىنىڭ دەنساۋلىق ساقتاۋ دەپارتامەنتىنىڭ ءتوراعاسى، G42 International باس ديرەكتورى مانسۋر ءال-مانسۋري، Polynome Group نەگىزىن قالاۋشى الەكساندر حانين جانە شينحۋا ۋنيۆەرسيتەتى جانىنداعى ج ي-يندۋستريانى زەرتتەۋ ينستيتۋتىنىڭ نەگىزىن قالاۋشى ياچين جاڭ ءسوز سويلەدى.
فوتو: اقوردا