ءتيىستى بۇيرىق جوباسىن ق ر ەڭبەك جانە حالىقتى الەۋمەتتىك قورعاۋ مينيسترلىگى ازىرلەدى.
- جوبادا قازاقستان رەسپۋبليكاسىندا شەتەل ازاماتتارىنا تۇراقتى تۇرۋعا رۇقسات الۋ ءۇشىن سۇرانىسقا يە ماماندىقتار ءتىزىمىن ەل ەكونوميكاسىنىڭ قاجەتتىلىكتەرى مەن باسىم سالالاردى ەسكەرە وتىرىپ، 51 دەن 174 ماماندىققا دەيىن كەڭەيتۋ كوزدەلگەن، - دەلىنگەن قۇجاتتا.
ءتىزىمدى قالىپتاستىرۋ كەزىندە قازاقستان ەكونوميكاسى مەن باسىم سالالاردىڭ قاجەتتىلىكتەرى ەسكەرىلەدى. جوباعا سايكەس، بۇل وزگەرىستەر قازاقستانعا بىلىكتىلىگى جوعارى شەتەلدىك مامانداردى تارتۋعا قولايلى جاعداي جاساۋعا باعىتتالعان.
جوبا كوشى-قون ساياساتىن جەتىلدىرۋ جانە قازاقستاننىڭ 2030-جىلعا دەيىنگى كوشى-قون ساياساتى تۇجىرىمداماسىن ىسكە اسىرۋ اياسىندا ازىرلەنگەن.
قۇجات قابىلدانعان جاعدايدا جاڭا تالاپتار ەڭبەك جانە حالىقتى الەۋمەتتىك قورعاۋ ءمينيسترىنىڭ بۇيرىعى كۇشىنە ەنگەننەن كەيىن قولدانىلا باستايدى.
قازاقستان ازاماتتارى بۇيرىق جوباسىن 6-قازانعا دەيىن قوعامدىق تالقىلاۋعا قاتىسا الادى. قۇجاتپەن وسى جەردەن تانىسۋعا بولادى.
بۇعان دەيىن قازاقستاندا ەلگە تۇراقتى تۇرۋ ءۇشىن كەلگەن شەتەلدىكتەر مەن ازاماتتىعى جوق ادامدارمەن اڭگىمەلەسۋ وتكىزۋ ءتارتىبىنىڭ وزگەرگەنى حابارلانعان بولاتىن.