جيىندا جاساندى ينتەللەكت پەن تسيفرلاندىرۋدى ەكونوميكانىڭ نەگىزگى سالالارىنا ەنگىزۋ باعىتتارى تالقىلانادى.
ستراتەگيا 10-ماۋسىمدا مەملەكەت باسشىسىنىڭ جارلىعىمەن بەكىتىلگەن. قۇجات قازاقستاننىڭ تەحنولوگيالىق دامۋىنىڭ نەگىزگى باعىتىن ايقىنداپ، جاساندى ينتەللەكتىنى كەڭىنەن ەنگىزۋگە، ونەركاسىپ، ەنەرگەتيكا، لوگيستيكا جانە جەر قويناۋىن پايدالانۋ سالالارىن سيفرلاندىرۋعا باعىتتالعان. بولجام بويىنشا، بۇل شارالار 2029-جىلدىڭ سوڭىنا قاراي ج ءى و وسىمىنە جىل سايىن ورتا ەسەپپەن 1,5 پايىزدىق تارماق قوسىپ، ءۇش جىل ىشىندە 10,5-16,5 ميلليارد دوللار كولەمىندە ينۆەستيتسيا تارتۋعا مۇمكىندىك بەرەدى.
ۇكىمەت وتىرىسىندا بۇدان بولەك، جىلۋ بەرۋ ماۋسىمىنا دايىندىق پەن كۇزگى جيىن- تەرىم بارىسى قارالدى. ءبىرقاتار وڭىردە جىلۋ بەرۋ ماۋسىمى باستالدى. جىلۋ جەلىلەرىنىڭ دايىندىعى 99 پايىزعا جەتتى. پرەمەر-مينيستر ولجاس بەكتەنوۆ الەۋمەتتىك نىسانداردى، سونىڭ ىشىندە مەكتەپتەر مەن اۋرۋحانالاردى جىلۋمەن ۋاقتىلى قامتاماسىز ەتۋدى تاپسىردى.
اۋىل شارۋاشىلىعى بويىنشا 13,5 ميلليون گەكتار ءداندى داقىل جينالىپ، 19,9 ميلليون توننا استىق باستىرىلدى. مايلى داقىلداردان رەكوردتىق 5 ميلليون توننادان استام ءونىم جينالادى دەپ كۇتىلۋدە. بيىل تەمىرجول ارقىلى 9,3 ميلليون توننا استىق تاسىمالدانسا، ونىڭ 7,2 ميلليون تونناسى ەكسپورتقا جونەلتىلگەن.
سونىمەن قاتار ۇكىمەت اۋىل شارۋاشىلىعى وندىرۋشىلەرىن ديزەل وتىنىمەن قامتاماسىز ەتۋ، استىقتى كەپتىرۋ جۇمىستارىنا جانارماي جەتكىزۋ، سۋ ۇنەمدەۋ تەحنولوگيالارىن ەنگىزۋ جانە كەلەسى جىلعى ەگىس ناۋقانىنا دايىندىق ماسەلەلەرىن تاپسىردى. وڭىرلەرگە كوكونىس پەن كارتوپ قورىن الدىن الا قالىپتاستىرىپ، ماۋسىمارالىق كەزەڭدە تاپشىلىق پەن باعانىڭ نەگىزسىز وسۋىنە جول بەرمەۋ مىندەتتەلدى.