ۇكىمەتتە اۋىل حالقىنىڭ دەنساۋلىعىن جاقسارتۋعا باعىتتالعان جوبا ناتيجەسى قارالادى

استانا. KAZINFORM - بۇگىن ساعات 10:00-دە ۇكىمەتتىڭ كەزەكتى وتىرىسى وتەدى. وندا مينيسترلەر كابينەتىنىڭ مۇشەلەرى 2 ماسەلەنى تالقىعا سالۋدى كوزدەپ وتىر.

ناقتىراق ايتقاندا، ۇكىمەت وتىرىسىنىڭ كۇن تارتىبىنە مىنا ماسەلەلەر شىعارىلادى:

- «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسىنىڭ ىسكە اسىرىلۋ بارىسى؛

- قۇرىلىس سالاسىن سيفرلاندىرۋ جانە قالا قۇرىلىسى كاداسترى.

ءبىرىنشى ماسەلە بويىنشا دەنساۋلىق ساقتاۋ ءمينيسترى اقمارال ءالنازاروۆا نەگىزگى بايانداما جاسايدى.

اقمارال ءشارىپباي قىزى اۋىلدىق ەلدى مەكەندەردە مەديتسينالىق-سانيتاريالىق العاشقى كومەك كورسەتۋ ۇيىمدارى نىساندارىن سالۋ بارىسى جايلى جان-جاقتى ەسەپ بەرىپ، وڭىرلەردى تاپشى ماماندارمەن قامتاماسىز ەتۋ جانە الەۋمەتتىك قولداۋ ماسەلەسىنە توقتالادى. «التىن ۋاقىت» قاعيداتى بويىنشا شۇعىل مەديتسينالىق كومەك كورسەتۋ ماقساتىندا بارلىق كوپبەيىندى ورتالىق اۋداندىق اۋرۋحانالار جوعارى تەحنولوگيالىق مەديتسينالىق تەحنيكامەن قامتاماسىز ەتىلەتىنىن اتاپ وتەدى.

اۋىل تۇرعىندارى ءۇشىن مەديتسينالىق كومەكتى جاقسارتۋ جوباسى اياسىندا اۋرۋلاردى ەرتە انىقتاۋ ماقساتىندا بۇيرەكتىڭ، اسقازان-ىشەك جولدارىنىڭ، تىنىس الۋ اعزالارىنىڭ، قۋىقاستى وبىرىنىڭ كەڭەيتىلگەن سكرينينگى ەنگىزىلدى. شالعايداعى اۋىلدار مەن ستانسيالاردىڭ تۇرعىندارى جىلجىمالى مەديتسينالىق كەشەندەردىڭ قىزمەتتەرىن پايدالانا الدى. ولار مامانداردىڭ 1,4 ميلليون كونسۋلتاتسياسىن الدى، 107 مىڭ ناۋقاس انىقتالدى. دارىلىك زاتتار مەن مەديتسينالىق بۇيىمداردىڭ قولجەتىمدىلىگىن قامتاماسىز ەتۋ ءۇشىن باستاۋىش مەديتسينالىق ۇيىمداردىڭ بازاسىندا 72 ءدارىحانا پۋنكتى جانە اۋىلدا 161 جەكە ءدارىحانا اشىلدى.

دەنساۋلىق ساقتاۋ ۇيىمدارى جەلىسىنىڭ مەملەكەتتىك ءنورماتيۆى قايتا قارالدى. سونىڭ ارقاسىندا 50 ادامعا دەيىنگى اۋىلدىق ەلدى مەكەندەر ءبىر مەديتسينا قىزمەتكەرىمەن قامتاماسىز ەتىلدى، تۇرعىنداردىڭ سانى 500 ادامنان اساتىن اۋىلداردا مەديتسينالىق پەرسونال سانى ءۇش بىرلىككە دەيىن ۇلعايدى.

ال ونەركاسىپ جانە قۇرىلىس ۆيتسە-ءمينيسترى قۋاندىق قاجكەنوۆ قۇرىلىس سالاسىنداعى ءبىرىڭعاي سيفرلىق ەكوجۇيەنىڭ قالىپتاسۋىنا جانە ساپاسى مەن اشىقتىعىن ارتتىرۋعا سەپتىگىن تيگىزەتىن شارالارعا توقتالادى. ونىڭ ىشىندە قۇرىلىس اينالىمىنىڭ ومىرلىك سيكلى كەزەڭدەرىن قامتيتىن ءبىرىڭعاي پورتال قۇرۋعا، قالا قۇرىلىسى قىزمەتىنىڭ اشىقتىعىن، قالا جوبالارىن ازىرلەۋ مەن ىسكە اسىرۋدىڭ سايكەستىگىن قامتاماسىز ەتۋ ماقساتىندا نىساننىڭ بىرەگەي ءنومىرىن ەنگىزۋگە، E-Qurylys مۇمكىندىگىنە قاتىستى جايتتار ءسوز بولادى.

ەستەرىڭىزدە بولسا، وتكەن جىلدىڭ 7-اقپانىندا وتكەن ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ ەلىمىزدى ەكونوميكالىق-الەۋمەتتىك دامىتۋ ىسىندە ماڭىزدى ءرول اتقاراتىن قۇرىلىس سالاسىنىڭ ءتيىمسىز باسقارىلۋى وتە وزەكتى ماسەلە بولىپ تۇرعانىنا نازار اۋدارتقان ەدى.

- قازىر قۇرىلىس سالاسىندا بىرنەشە اقپاراتتىق جۇيە بار. وسىنداي تاسىلدەر ارقىلى بولىنگەن قاراجاتتىڭ ماقساتقا ساي جۇمسالۋىن قامتاماسىز ەتۋ قاجەت، ياعني بارىنشا اشىق جانە قاتاڭ باقىلاۋ بولۋعا ءتيىس. بۇل - وتە ماڭىزدى ماسەلە. سەبەبى قارجىنىڭ ۇرلانۋى، ەڭ الدىمەن، قۇرىلىستىڭ ساپاسىنا اسەر ەتەدى جانە بيۋدجەتكە قوسىمشا سالماق سالادى. اقشاعا تسيفرلىق تەڭگە ارقىلى ەن سالۋ جانە ونى قاداعالاۋ، باسقاشا ايتقاندا، «اقشانى بوياۋ» بيۋدجەت قاراجاتىنىڭ جۇمسالۋىن باقىلايتىن وتە ماڭىزدى تەتىك بولۋى مۇمكىن. بۇگىندە تسيفرلىق ۆاليۋتانى قولدانۋعا قاتىستى پيلوتتىق جوبالار ءتيىمدى جۇزەگە اسىرىلىپ جاتىر. سىبايلاس جەمقورلىققا قارسى ءىس-قيمىل اگەنتتىگىنە ۇكىمەتپەن جانە ۇلتتىق بانكپەن بىرلەسىپ، وسىنداي جوبالاردىڭ اۋقىمىن كەڭەيتۋدى، ونىڭ ىشىندە قۇرىلىس سالاسىنا بارىنشا ەنگىزۋدى تاپسىرامىن، - دەگەن ەدى پرەزيدەنت.

وتىرىس بىتكەننەن كەيىن باسپا ءسوز ءماسليحاتى وتكىزىلەدى. وندا دەنساۋلىق ساقتاۋ ءمينيسترى اقمارال ءالنازاروۆا مەن ونەركاسىپ جانە قۇرىلىس ۆيتسە-ءمينيسترى قۋاندىق قاجكەنوۆ ب ا ق وكىلدەرىنىڭ ساۋالدارىنا جاۋاپ بەرەدى.

ۇكىمەت وتىرىسىنىڭ تىكەلەي تاراتىلىمىن PrimeMinister.kz سايتىنان، YouTube رەسمي ارناسىنان، Facebook الەۋمەتتىك جەلىسىنەن، سونداي-اق UKIMET Telegram-كانالىنان كورۋگە بولادى.

باسپا ءسوز كونفەرەنسياسىنىڭ تىكەلەي تاراتىلىمى YouTube رەسمي ارناسى مەن Facebook الەۋمەتتىك جەلىسىنەن كورسەتىلەدى.

ايتا كەتەيىك، وتكەن اپتاداعى ۇكىمەت وتىرىسىندا گاز سالاسىن دامىتۋ مەن سيفرلاندىرۋ ماسەلەلەرى مەن يۋنەسكو اياسىندا مادەني مۇرانى ساقتاۋ جانە ىلگەرىلەتۋ شارالارى قارالعان. وندا ەنەرگەتيكا ءمينيسترى ەرلان اقكەنجەنوۆ ءىرى ينفراقۇرىلىمدىق جوبالار مەن گاز ەسەپتەۋ جۇيەلەرىن سيفرلاندىرۋ بارىسىنا توقتالدى. وسى ورايدا پرەمەر-مينيستر ولجاس بەكتەنوۆ قازاقستان ءوزىنىڭ گاز قورىن ءتيىمدى يگەرۋ ءۇشىن ءتيىستى مينيسترلىكتەر جۇيەلى جۇمىس ىستەپ، ۇزاق مەرزىمدى ستراتەگيا قۇرا ءبىلۋى كەرەكتىگىن باسا ايتتى.

- ءبىزدىڭ ەلىمىزدىڭ «كوگىلدىر وتىن» بويىنشا الەۋەتى زور. تابيعي گاز قورىنىڭ راستالعان كولەمى شامامەن 4 تريلليون تەكشە مەتر. الايدا، ونى يگەرۋ ءۇشىن جۇيەلى تاسىلدەر مەن جاڭا ينۆەستيسيالار، زاماناۋي ينفراقۇرىلىم جانە ۇزاقمەرزىمدى ستراتەگيا قاجەت، - دەدى ول.

ال مادەنيەت جانە اقپارات ءمينيسترى ايدا بالايەۆا ەلىمىزدىڭ تاريحي-مادەني مۇراسىن زامانعا ساي جاڭعىرتۋ جونىندە مەملەكەت باسشىسىنىڭ ۇلتتىق قۇرىلتايدا بەرگەن تاپسىرماسى اياسىندا ىستەلىپ جاتقان جۇمىستار تۋرالى باياندادى.

وسى ماسەلەگە قاتىستى ۇكىمەت باسشىسى ولجاس بەكتەنوۆ مادەنيەت مينيسترلىگىنە يۋنەسكو اياسىندا مادەني مۇرانى ساقتاۋ جانە ىلگەرىلەتۋ جونىندەگى الداعى كەزەڭگە ارنالعان كەشەندى جوسپار جوباسىن ازىرلەپ، 1-قىركۇيەككە دەيىن ۇكىمەت قاراۋىنا ەنگىزۋدى تاپسىردى. سونداي-اق، مادەنيەت مينيسترلىگى مۇددەلى ورگاندارمەن جانە اكىمدىكتەرمەن بىرلەسىپ، تاريح جانە مادەنيەت ەسكەرتكىشتەرىنە تۇگەندەۋ جۇرگىزىپ، بيىلعى 1-تامىزعا دەيىن ءتيىستى قۇجاتتاردى يۋنەسكو-عا جىبەرۋى قاجەت. تۇركىستان، جامبىل، الماتى جانە جەتىسۋ وبلىستارىنىڭ اكىمدىكتەرى 15-قىركۇيەككە دەيىن دۇنيەجۇزىلىك مۇرا وبەكتىلەرىنىڭ ايماقتارىن مەملەكەتتىك جەر كاداسترىنىڭ اقپاراتتىق جۇيەسىنە ەنگىزۋگە ءتيىس.

- تۋريزم مينيسترلىگى مادەنيەت مينيسترلىگىمەن بىرگە مادەني مۇرا وبەكتىلەرى مەن ەلەمەنتتەرىن ەسكەرەتىن تۋريستىك مارشرۋتتاردى ازىرلەپ، ىسكە قوسسىن. سونداي-اق، سيفرلاندىرۋ مينيسترلىگىمەن بىرلەسىپ، يۋنەسكو تىزىمدەرىنە ەنگىزىلگەن وبەكتىلەر مەن ەلەمەنتتەر بويىنشا سيفرلىق تانىمدىق ونىمدەر جاساۋى قاجەت، − دەدى ولجاس بەكتەنوۆ.

ايتا كەتەلىك كەشە قانات بوزىمبايەۆ «ەنەرگەتيكا جانە كوممۋنالدىق سەكتورلاردى جاڭعىرتۋ» ۇلتتىق جوباسىن جۇزەگە اسىرۋ بارىسىن تەكسەرگەن ەدى.

اۆتور

مارلان جيەمباي