«ەكسپو» قاراجاتىن شەتەلگە شىعارۋ فاكتىلەرىن انىقتاۋ ءۇشىن تەرگەۋ ءجۇرىپ جاتىر - باس پروكۋراتۋرا

استانا. KAZINFORM - «ەكسپو» قاراجاتىن جىمقىرۋعا قاتىسى بار بارلىق ادامدى انىقتاۋ ءۇشىن تەرگەۋ ارەكەتتەرى جۇرگىزىلىپ جاتىر. بۇل تۋرالى ءماجىلىس دەپۋتاتتارىنىڭ ساۋالىنا باس پروكۋرور بەرىك اسىلوۆتىڭ جاۋابىندا ايتىلعان.

- سىبايلاس جەمقورلىققا قارسى قىزمەتتىڭ ءىس جۇرگىزۋىندە «ەكسپو» قاراجاتىن جىمقىرۋ فاكتىسى بويىنشا جەكە باسى انىقتالماعان ادامدارعا قاتىستى قىلمىستىق ءىستىڭ بار ەكەنىن حابارلايمىز. وسى تەرگەپ-تەكسەرۋ اياسىندا ىسكە قاتىسى بار بارلىق ادامدى، ونىڭ ىشىندە شەت ەلدەگى وفشورلىق كومپانيالارعا اقشانى شىعارۋ فاكتىسىن انىقتاۋعا باعىتتالعان كەشەندى جەدەل-تەرگەۋ ارەكەتتەرى جۇرگىزىلىپ جاتىر، - دەدى بەرىك اسىلوۆ جاۋابىندا.

ونىڭ اتاپ وتۋىنشە، «استانا ەكسپو-2017» ۇلتتىق كومپانياسىنىڭ اقشا قاراجاتتارىن جىمقىرعانى ءۇشىن 23 ادام ءارتۇرلى مەرزىمدەرگە باس بوستاندىقتارىنان ايىرۋعا سوتتالعان.

- سوتتالعانداردىڭ كىناسى تۋرالى سوتتىڭ تۇجىرىمى جان-جاقتى زەرتتەلگەن شىنايى جانە جول بەرىلەتىن دالەلدەمەلەرگە نەگىزدەلگەن، - دەدى ول.

«استانا ەكسپو-2017» ۇ ك» ا ق- تىڭ بۇرىنعى ءتوراعاسى تالعات ەرمەگيايەۆ الماتى قالاسى، الماتى جانە جەتىسۋ وبلىستارى بويىنشا ق ا ج دەپارتامەنتى قاۋىپسىزدىگى ورتاشا № 57 مەكەمەسىندە جازاسىن وتەپ جاتىر. 2016 -جىلدىڭ ماۋسىمىندا ول 14 جىلعا سوتتالىپ، مۇلكى تاركىلەندى.

اۆتور

مارلان جيەمباي