اسكەري مانيەۆرلەر بارىسىندا اسكەري قىزمەتشىلەر بىرلەسكەن مانيەۆر جاساۋ، ىزدەستىرۋ-قۇتقارۋ جۇمىستارىن ۇيىمداستىرۋ، سونداي-اق بازالىق پۋنكتتە جانە قورعالماعان رەيدتە اسيممەتريالىق قاتەرلەرگە تويتارىس بەرۋ ءىس-قيمىلدارىن پىسىقتادى.
— بۇل وقۋ-جاتتىعۋ اسكەري-تەڭىز كۇشتەرىنىڭ جوعارى جاۋىنگەرلىك ازىرلىگىن قامتاماسىز ەتۋدىڭ ماڭىزدى قۇرامداس بولىگى. ول كومانديرلەردىڭ پراكتيكالىق دايارلىعىن جانە جەكە قۇرامنىڭ تەڭىزدە ارەكەت ەتۋ ماشىعىن جەتىلدىرۋگە، سونداي-اق جاۋىنگەرلىك ءىس- قيمىلداردى ۇيىمداستىرۋ كەزىندە باسقارۋ ورگاندارىنىڭ ءوزارا ءىس-قيمىلىن ارتتىرۋعا باعىتتالعان. ءارتۇرلى جاعدايدا اسكەري تەڭىزشىلەر ەكيپاجداردىڭ ءوزارا ءىس-قيمىلىن جانە نىسانالاردى انىقتاۋ مەن جويۋدىڭ زاماناۋي قۇرالدارىن قولدانۋدى پىسىقتادى، - دەدى اسكەري-تەڭىز كۇشتەرىنىڭ باس قولباسشىسى 1- دارەجەلى كاپيتان قانات نيازبەكوۆ.
وقۋ- جاتتىعۋدا ۇشقىشسىز ۇشۋ اپپاراتتارىن قولدانۋ جانە ولارعا قارسى ءىس- قيمىل جاساۋعا ەرەكشە نازار اۋدارىلدى. اسكەري قىزمەتشىلەر سۋاستى ديۆەرسياسىنا قارسى قورعانىس، اۋە شابۋىلى قۇرالدارىن انىقتاۋ جانە اۋە شابۋىلىنا قارسى قورعانىستى ۇيىمداستىرۋ بويىنشا ءىس- قيمىلداردى پىسىقتادى.
«حازار قورعانى — 2026» اسكەري- تەڭىز وقۋ- جاتتىعۋى قازاقستان اسكەري- تەڭىز كۇشتەرىنىڭ جاۋىنگەرلىك دايارلىعىن جەتىلدىرۋ، بولىمشەلەردىڭ ءوزارا ءىس- قيمىلىن كۇشەيتۋ جانە جەكە قۇرامنىڭ ەلدىڭ تەڭىز شەپتەرىن قورعاۋ مىندەتتەرىن ورىنداۋعا ازىرلىگىن ارتتىرۋ باعىتىنداعى كەزەكتى كەزەڭ بولدى.
بۇعان دەيىن قازاقستاننىڭ كاسپي تەڭىزى سەكتورىندا اسكەري- تەڭىز كۇشتەرىنىڭ جوسپارلى وقۋ- جاتتىعۋلارى وتكەن بولاتىن.