ۆەدومستۆو ءتيىستى تۇزەتۋلەر جوباسىن قوعامدىق تالقىلاۋعا شىعاردى. قۇجات 2026-جىلعى 19-قازانعا دەيىن تالقىلانادى. جاڭا وزگەرىستەردىڭ نەگىزگى باعىتى - جۇرگىزۋشىلەردىڭ مەديتسينالىق تەكسەرۋ ناتيجەلەرىن سيفرلاندىرۋ.
مەديتسينالىق تەكسەرۋ ناتيجەلەرى ءبىرىڭعاي بازاعا ەنگىزىلەدى
ۇسىنىلىپ وتىرعان وزگەرىستەرگە سايكەس، جۇرگىزۋشىلەردىڭ مەديتسينالىق تەكسەرۋدەن وتكەنى تۋرالى اقپارات ءبىرىڭعاي اۆتوماتتاندىرىلعان دەرەكتەر بازاسىنا بەرىلمەك.
جۇرگىزۋشىنىڭ كولىك باسقارۋىنا مەديتسينالىق رۇقساتى جانە مەديتسينالىق قورىتىندىمەن راستالعان قارسى كورسەتىلىمدەرى تۋرالى مالىمەتتەر اقپاراتتىق جۇيەگە اۆتوماتتى تۇردە ەنگىزىلەدى.
بۇل مەملەكەتتىك ورگاندار اراسىنداعى اقپارات الماسۋدى جەڭىلدەتىپ، جۇرگىزۋشىنىڭ مەديتسينالىق رۇقساتىنىڭ جارامدىلىعىن جەدەل تەكسەرۋگە مۇمكىندىك بەرەدى. سونداي-اق جاڭا جۇيە ەسكىرگەن نەمەسە شىنايى ەمەس مەديتسينالىق مالىمەتتەردى پايدالانۋ قاۋپىن ازايتۋعا باعىتتالعان.
65 جاستان اسقان جۇرگىزۋشىلەرگە قانداي تالاپ بار؟
جۇرگىزۋشىلەردى مەديتسينالىق تەكسەرۋدەن وتكىزۋ تارتىبىندەگى وزگەرىستەر 65 جاستان اسقان ازاماتتارعا قاتىستى تالاپتاردى دا كۇن تارتىبىنە شىعاردى.
قازاقستاندا 65 جاستان اسقان جۇرگىزۋشىلەردىڭ مەديتسينالىق تەكسەرۋدەن ەكى جىلدا ءبىر رەت ءوتۋى ءتيىس دەگەن تالاپ 2014-جىلدان بەرى قولدانىستا.
25-تامىزدان باستاپ بۇل تالاپتىڭ ورىندالۋىنا بايلانىستى جۇرگىزۋشى كۋالىگىن ۋاقىتشا توقتاتۋدىڭ جاڭا ءتارتىبى كۇشىنە ەندى. ەگەر جۇرگىزۋشى مىندەتتى مەديتسينالىق تەكسەرۋدەن بەلگىلەنگەن مەرزىمدە وتپەسە، ونىڭ كولىك باسقارۋ قۇقىعى اۆتوماتتى تۇردە ۋاقىتشا توقتاتىلۋى مۇمكىن.
ىشكى ىستەر مينيسترلىگىنىڭ تۇسىندىرۋىنشە، مۇندا مەديتسينالىق تەكسەرۋدەن ءوتۋ تالابىنىڭ ءوزى جاڭالىق ەمەس. وزگەرىس مەملەكەتتىك ورگاندار اراسىنداعى مالىمەت الماسۋ تارتىبىنە قاتىستى.
مەديتسينالىق تەكسەرۋدەن قاشان ءوتۋ كەرەك؟
65 جاسقا دەيىنگى جۇرگىزۋشىلەرگە قاتىستى ءبىرقاتار تۇسىنىسپەۋشىلىك تۋىنداعان بولاتىن. ءى ءى م تۇسىندىرۋىنشە، 65 جاسقا تولماعان ازاماتتارعا مەديتسينالىق تەكسەرۋدەن ءوتۋ ءۇشىن شۇعىل تۇردە ەمحاناعا بارۋدىڭ قاجەتى جوق. العاشقى مىندەتتى مەديتسينالىق تەكسەرۋدەن 67 جاسقا قاراي ءوتۋ قاجەت.
ودان كەيىن مەديتسينالىق انىقتاما ەكى جىل بويى جارامدى بولادى. كەلەسى تەكسەرۋ 69 جاستا، ودان كەيىن 71 جاستا جانە وسىلايشا ءار ەكى جىل سايىن جۇرگىزىلەدى. ياعني جۇرگىزۋشى 65 جاسقا تولعان بويدا ەمەس، بەلگىلەنگەن جاس شەگىنە جەتكەن كەزدە ءتيىستى مەديتسينالىق تەكسەرۋدەن ءوتۋى ءتيىس.
مۇمكىندىگى شەكتەۋلى جۇرگىزۋشىلەرگە دە ەكى جىلدىق مەرزىم
جوبا اياسىندا 65 جاستان اسقان جۇرگىزۋشىلەرمەن قاتار، مۇگەدەكتىگى بار جۇرگىزۋشىلەر ءۇشىن دە قايتالاما مەديتسينالىق تەكسەرۋدەن ءوتۋ مەرزىمى ناقتىلانادى. ولار مەديتسينالىق تەكسەرۋدەن ەكى جىلدا ءبىر رەت ءوتۋى ءتيىس.
بۇل تالاپ «جول ءجۇرىسى تۋرالى» زاڭدا بۇرىننان قاراستىرىلعان. سوندىقتان ۇسىنىلىپ وتىرعان تۇزەتۋلەر جاڭا مىندەت ەنگىزۋدەن گورى قولدانىستاعى قاعيدالاردى زاڭ تالاپتارىنا سايكەستەندىرۋگە باعىتتالعان.
نەگىزگى وزگەرىس - اقپارات الماسۋ جۇيەسىندە
دەنساۋلىق ساقتاۋ مينيسترلىگى ۇسىنىپ وتىرعان تۇزەتۋلەردىڭ نەگىزگى ءمانى - جۇرگىزۋشىلەرگە جاڭا مەديتسينالىق تالاپ ەنگىزۋ ەمەس، مەديتسينالىق مالىمەتتەردى مەملەكەتتىك اقپاراتتىق جۇيەلەر ارقىلى جەدەل الماسۋدى قامتاماسىز ەتۋ.
مەديتسينالىق تەكسەرۋ ناتيجەلەرى سيفرلىق فورماتتا قولجەتىمدى بولعان جاعدايدا، مەملەكەتتىك ورگاندار جۇرگىزۋشىنىڭ كولىك باسقارۋعا مەديتسينالىق رۇقساتىنىڭ بار-جوعىن جانە ونىڭ وزەكتى ەكەنىن جىلدام انىقتاي الادى.
بۇل ءتاسىل جول قوزعالىسى قاۋىپسىزدىگىن ارتتىرۋعا جانە مەديتسينالىق تالاپتاردىڭ ورىندالۋىن باقىلاۋدى اۆتوماتتاندىرۋعا باعىتتالعان.
قاعيدالارعا ەنگىزىلەتىن وزگەرىستەر ازىرگە جوبا كۇيىندە. قۇجات 2026-جىلعى 19-قازانعا دەيىن قوعامدىق تالقىلاۋدا بولادى. تالقىلاۋ قورىتىندىسى بويىنشا ونىڭ جەكەلەگەن نورمالارى وزگەرۋى نەمەسە تولىقتىرىلۋى مۇمكىن.