باستى نازار مەملەكەت باسشىسى – ق ر قارۋلى كۇشتەرىنىڭ جوعارعى باس قولباسشىسى بەرگەن ارميانى كەشەندى جاڭعىرتۋ جونىندەگى تاپسىرمالاردى ىسكە اسىرۋعا اۋدارىلدى. بۇل رەتتە زاماناۋي قاۋىپ- قاتەرلەر، قارۋلى قاقتىعىستاردىڭ تاجىريبەسى، اسكەري تەحنولوگيالاردىڭ قارقىندى دامۋى جانە اسكەري قىزمەتتىڭ قاۋىپسىزدىگىن قامتاماسىز ەتۋ ماسەلەلەرى ەسكەرىلەدى.
نەگىزگى باسىمدىق اسكەرلەردىڭ ناقتى جاۋىنگەرلىك ازىرلىگىن ارتتىرۋعا، باسقارۋ جۇيەسىن جەتىلدىرۋگە، جاۋىنگەرلىك دايارلىقتىڭ ساپاسىن كوتەرۋگە جانە قارۋ-جاراق پەن اسكەري تەحنيكانى دامىتۋعا باعىتتالاتىن بولادى.
اسكەري قىزمەتشىلەردىڭ مورالدىق جانە جاۋىنگەرلىك رۋحىن نىعايتۋ وزگەرىستەردىڭ ماڭىزدى باعىتتارىنىڭ ءبىرى رەتىندە ايقىندالىپ وتىر. كومانديرلەرگە اسكەري ۇجىمداردا سالاۋاتتى مورالدىق- پسيحولوگيالىق احۋال قالىپتاستىرۋ، تاربيە جۇمىسىنىڭ ساپاسىن ارتتىرۋ، سونداي-اق جەكە قۇرامنىڭ قىزمەت ەتۋ جاعدايلارىن جاقسارتۋ جونىندە مىندەتتەر جۇكتەلدى. اسكەري قىزمەتتىڭ قاۋىپسىزدىگىن قامتاماسىز ەتۋگە، جارعىعا جات قارىم-قاتىناستاردىڭ الدىن الۋعا جانە ولارعا قاتاڭ تۇردە جول بەرمەۋگە ەرەكشە نازار اۋدارىلۋى ءتيىس.
مينيستر اسكەري قىزمەتشىلەردى دايارلاۋ تاسىلدەرىن قايتا قاراۋدىڭ قاجەتتىگىن اتاپ ءوتتى. وقىتۋ قازىرگى زامانعى ۇرىس قيمىلدارىن جۇرگىزۋ جاعدايىنا بارىنشا سايكەس كەلىپ، پراكتيكالىق تاجىريبەگە، زاماناۋي قاقتىعىستاردى تالداۋعا نەگىزدەلۋى كەرەك. سونىمەن قاتار ۇشقىشسىز جۇيەلەردى، راديوەلەكتروندىق كۇرەس قۇرالدارىن، بارلاۋ، بايلانىس جانە باسقا دا جاڭا تەحنولوگيالاردى قولدانۋدىڭ زاماناۋي تاسىلدەرى ەسكەرىلۋى قاجەت.
اسكەري بولىمشەلەردى وزدەرىنە جۇكتەلگەن مىندەتتەردى ورىنداۋعا دايىنداۋعا ەرەكشە نازار اۋدارىلدى. كومانديرلەرگە جەكە قۇرامنىڭ جوعارى دەڭگەيدەگى دايارلىعىن، بولىمشەلەردىڭ ۇيلەسىمدى ءىس-قيمىلىن جانە ءارتۇرلى جاعدايلاردا ارەكەت ەتۋگە تۇراقتى ازىرلىگىن قامتاماسىز ەتۋ تاپسىرىلدى.
اسكەرلەردى باسقارۋ جۇيەسىن جەتىلدىرۋ دە رەفورمانىڭ جەكە باعىتىنا اينالماق. بۇل رەتتە ۇدەرىستەردى ودان ءارى سيفرلاندىرۋ، باسى ارتىق اكىمشىلىك راسىمدەردى، ەسەپتىلىك پەن پراكتيكالىق ماڭىزى جوق كەڭەستەردى قىسقارتۋ كوزدەلىپ وتىر. بوساتىلعان رەسۋرستار اسكەرلەردىڭ جاۋىنگەرلىك قابىلەتىن ارتتىرۋعا تىكەلەي باعىتتالۋى ءتيىس.
ارميانى ماتەريالدىق-تەحنيكالىق قامتاماسىز ەتۋ جۇيەسىن جەتىلدىرۋ جۇمىستارى جالعاسا بەرەدى. بۇل رەتتە ساتىپ الۋ جانە رەسۋرستاردى ءبولۋ اسكەرلەردىڭ ناقتى قاجەتتىلىكتەرى مەن جاۋىنگەرلىك دايارلىقتىڭ باسىم باعىتتارىن ەسكەرە وتىرىپ، جۇزەگە اسىرىلۋى ءتيىس. مينيستر بيۋدجەت قاراجاتىن ۇتىمدى ءارى ءتيىمدى پايدالانۋدى قامتاماسىز ەتۋدى، ءتيىمسىز شىعىندارعا جول بەرمەۋدى جانە قابىلداناتىن شەشىمدەردىڭ اشىقتىعىن ارتتىرۋدى تاپسىردى.
- ارميا ەسەپتىك كورسەتكىشتەر مەن كوزبوياۋشىلىق ءىس-شارالار ءۇشىن ەمەس، ناقتى ناتيجەگە قول جەتكىزۋ ءۇشىن دامۋى كەرەك. ءاربىر ۇدەرىس، ءاربىر شەشىم جانە بولىنگەن ءاربىر رەسۋرس پراكتيكالىق ناتيجەگە يە بولىپ، قارۋلى كۇشتەردىڭ جاۋىنگەرلىك قابىلەتىن ارتتىرۋعا باعىتتالۋى ءتيىس. ءاربىر سارباز ءوزىن قاۋىپسىز سەزىنۋى كەرەك، - دەپ اتاپ ءوتتى قورعانىس ءمينيسترى.
كەڭەس بارىسىندا مەملەكەت باسشىسىنىڭ تاپسىرماسى بويىنشا جۇرگىزىلىپ جاتقان قورعانىس مينيسترلىگىنىڭ قىزمەتىنە كەشەندى تەكسەرۋ بارىسى دا قارالدى. قۇرىلىمدىق بولىمشەلەردىڭ باسشىلارىنا كوميسسيا جۇمىسىنا قاجەتتى قولداۋ كورسەتىپ، تالاپ ەتىلگەن بارلىق اقپاراتتى ۇسىنۋ تاپسىرىلدى.
ەسكە سالايىق، 2026 -جىلعى 24-قىركۇيەكتە كاسپيدەگى اسكەري وقۋ-جاتتىعۋ كەزىندە 9 اسكەري قىزمەتشى قازا تاپقانىن حابارلاعانبىز. ءۇش اسكەري قىزمەتشى قۇتقارىلدى. ولاردىڭ بىرەۋى اۋرۋحاناعا جاتقىزىلدى.
كەيىننەن كاسپيدە قازا بولعان اسكەري قىزمەتشىلەردىڭ سانى 12 گە جەتىپ، ەكەۋى ىزدەستىرىلىپ جاتقانى حابارلاندى.
25-قىركۇيەكتە، ساعات 9:15 شاماسىندا ۇزدىكسىز جۇرگىزىلگەن ىزدەستىرۋ-قۇتقارۋ جۇمىستارى ناتيجەسىندە ەكى ساربازدىڭ دەنەسى سۋدان شىعارىلدى. وسىلايشا تەڭىز-اسكەري كۇشتەرىنىڭ 14 اسكەري قىزمەتشىسى قازا بولدى.
پرەزيدەنت قورعانىس مينيسترلىگىندەگى جاعدايدى تەكسەرەتىن كوميسسيا قۇرعان ەدى. كوميسسيا جۇرگىزىلگەن جۇمىستىڭ العاشقى ناتيجەلەرى تۋرالى جەتى كۇن ىشىندە بايانداۋعا ءتيىس.
قىزمەتكە سالعىرت قارادى، كورابل جۇرگىزۋ قاعيدالارىن بۇزۋ بويىنشا اۋىر زارداپتارعا اكەپ سوققان قىلمىستىق قۇقىق بۇزۋشىلىقتار جاسادى دەگەن كۇدىكپەن قازاقستان رەسپۋبليكاسى قارۋلى كۇشتەرىنىڭ جوعارى جانە اعا كوماندالىق قۇرامىنداعى جاۋاپتى لاۋازىمدى تۇلعالار ۇستالعان بولاتىن.
26-قىركۇيەكتە ماڭعىستاۋ جۇرتى قازا تاپقان ساربازداردى سوڭعى ساپارعا شىعارىپ سالدى.
پرەزيدەنت داۋرەن قوسانوۆتى قورعانىس ءمينيسترى لاۋازىمىنان بوساتتى. ونىڭ ورنىنا ايدوس مىرزاحمەتوۆ قورعانىس ءمينيسترى بولىپ تاعايىندالدى. توقايەۆ جاڭا مينيسترگە اسكەري باسقارۋ جۇيەسىن جەتىلدىرۋدى تاپسىردى.