- بۇگىن ءارقايسىمىزعا ۇلكەن مارتەبە ءارى زور جاۋاپكەرشىلىك جۇكتەلىپ وتىر. ءبىز سان قىرلى قازاقستاندىق قوعامنىڭ مۇددەسىن بىلدىرەتىن جاڭا ساياسي ينستيتۋتتىڭ ءبىر بولىگىنە اينالدىق. سوندىقتان الدىمىزدا تاريحي ماڭىزى زور مىندەت تۇر - وسى ينستيتۋتتىڭ مازمۇنىن ناقتى ىستەرمەن تولىقتىرۋىمىز كەرەك، - دەدى ەرلان قوشانوۆ.
ونىڭ ايتۋىنشا، حالىق كەڭەسىنە كونستيتۋتسيالىق مارتەبە بەرىلۋى مەملەكەت باسشىسىنىڭ نەگىزگى ۇستانىمىن تاعى ءبىر مارتە ايعاقتايدى: حالىق - مەملەكەتتىڭ باستى ستراتەگيالىق سەرىكتەسى. وسى ۇستانىم مەملەكەت باسشىسى جۇزەگە اسىرىپ كەلە جاتقان اۋقىمدى رەفورمالاردىڭ بارلىعىندا كورىنىس تاۋىپ كەلەدى.
- ارينە، حالقىمىز قولداعان جاڭا اتا زاڭىمىزدا ايقىندالعان قۇندىلىقتار مەن باسىمدىقتار جۇمىسىمىزدىڭ نەگىزگى وزەگىنە اينالادى. مۇنىڭ ءبارى حالىق كەڭەسىنىڭ قىزمەتىنە باعىت-باعدار بەرەدى. بىرلەسكەن كۇش-جىگەرىمىزدىڭ ارقاسىندا حالىق كەڭەسى وزىنە جۇكتەلگەن مىندەتتەردى بىلىكتى ءارى ابىرويمەن اتقارادى دەپ سەنەمىن. بۇل - ەل شەجىرەسىندەگى العاشقى حالىق كەڭەسى. ونىڭ جاۋاپكەرشىلىگى ەرەكشە، جۇكتەلەتىن مىندەت تە بولەك. وزدەرىڭىزبەن بىرگە حالقىمىزدىڭ جانە پرەزيدەنتىمىزدىڭ سەنىمىن اقتايمىز دەپ سەنەمىن، - دەدى حالىق كەڭەسىنىڭ ءتوراعاسى.
بۇعان دەيىن پرەزيدەنت قاسىم-جومارت توقايەۆ قازاقستان حالىق كەڭەسى ءتوراعاسى قىزمەتىنە ە. قوشانوۆتىڭ كانديداتۋراسىن ۇسىنعان ەدى.
ەسكە سالا كەتسەك، جىل باسىندا پرەزيدەنت قاسىم-جومارت توقايەۆ قىزىلورداداعى V ۇلتتىق قۇرىلتايدا حالىق كەڭەسى ينستيتۋتىنىڭ زاڭدىق مارتەبەسى قانداي بولاتىنىن ايتىپ بەردى.
قازاقستان حالىق كەڭەسىنىڭ ءبىرىنشى سەسسياسى 23-24-قىركۇيەك كۇندەرى وتەدى.