- جاقىندا كەڭەستىڭ وڭىرلىك دامۋ جانە جەرگىلىكتى ءوزىن-ءوزى باسقارۋ كوميتەتىنىڭ العاشقى وتىرىسى ءوتتى. وتىرىستا كەڭەس مۇشەلەرى بىرنەشە باعىت بويىنشا جۇمىس ىستەيتىن سالالىق كوميسسيالارعا ءبولىندى. اتاپ ايتقاندا، وڭىرلىك دامۋ مەن كاسىپكەرلىكتى قولداۋ، ەكولوگيا جانە الەۋمەتتىك جاۋاپكەرشىلىك ماسەلەلەرى نازارعا الىندى.
كوميتەت وتىرىسىندا الداعى جۇمىستىڭ نەگىزگى باعىتتارى دا ايقىندالىپ، سالالىق كوميسسيالاردىڭ ەرەجەلەرى بەكىتىلدى. ەندى كەڭەس مۇشەلەرى ناقتى سالالار بويىنشا جۇمىس ىستەپ، قوعامداعى وزەكتى ماسەلەلەردى كوتەرۋگە جانە ولاردى شەشۋگە باعىتتالعان ۇسىنىستار ازىرلەمەك. بۇل رەتتە قوعامدىق كەڭەستەرمەن ءوزارا ءىس-قيمىلدى كۇشەيتۋ دە ماڭىزدى مىندەتتەردىڭ ءبىرى بولماق، - دەدى جاندوس اقتايەۆ.
كەڭەستىڭ جۇمىس باعىتتارى كەڭ بولعانىمەن، ولاردىڭ بارلىعى ازاماتتاردىڭ كۇندەلىكتى ومىرىنە اسەر ەتەتىن ماسەلەلەرمەن تىكەلەي بايلانىستى. وسى رەتتە سپيكەر جاستاردىڭ باسپانالى بولۋى مەن سيفرلىق الاياقتىققا قارسى كۇرەستى الداعى جۇمىستا نازار اۋدارۋدى قاجەت ەتەتىن ماسەلەلەردىڭ ءبىرى رەتىندە اتادى.
ۆيدەودان الىنعان كادر
- جاستاردىڭ باسپانالى بولۋى ءۇشىن مەملەكەت ءتۇرلى مەحانيزمدەردى ۇسىنىپ جاتىر. ءبىراق ولاردىڭ ءوزى ماسەلەنى تولىق شەشپەي جاتىر. الداعى ۋاقىتتا وسىنى نىساناعا الۋ كەرەك. ەكىنشى ماسەلە - سيفرلىق الاياقتىق. وتكەن جىلى كيبەرالاياقتار قازاقستاندىقتارعا 29 ميلليارد 6 ميلليون تەڭگە شىعىن كەلتىردى. سوندىقتان سيفرلىق قاۋىپسىزدىكتى كۇشەيتۋ كەرەك، كيبەرساۋاتتىلىقتى ارتتىرۋ ماڭىزدى، - دەدى ول.