جاڭارتىلعان قۇجات قازاقستاننان تىس جەردە تۇراقتى جانە ۋاقىتشا تۇراتىن ازاماتتاردى ەسەپكە قويۋ مەن ەسەپتەن شىعارۋ ءتارتىبىن، سونداي-اق وسى باعىتتاعى مەملەكەتتىك قىزمەتتەردى كورسەتۋ تالاپتارىن ايقىندايدى.
شەتەلدەگى قازاقستاندىقتاردى ەسەپكە الۋدى ءتيىستى كونسۋلدىق وكرۋگ اۋماعىنداعى قازاقستاننىڭ شەتەلدىك مەكەمەلەرى جۇرگىزەدى. بۇل تالاپ شەتەلدىك ازاماتتار اسىراپ العان قازاقستان ازاماتى بولىپ سانالاتىن بالالاردى ەسەپكە الۋ جاعدايلارىنا قولدانىلمايدى.
ەسەپكە الۋ نە ءۇشىن قاجەت؟
شەتەلدە جۇرگەن قازاقستان ازاماتتارىن ەسەپكە الۋدىڭ نەگىزگى ماقساتى - ولاردىڭ قۇقىقتارى مەن زاڭدى مۇددەلەرىن قورعاۋ. سونىمەن قاتار ازاماتتاردىڭ ءوزى جۇرگەن ەلدىڭ زاڭناماسى، قازاقستان مەن سول مەملەكەت قاتىساتىن حالىقارالىق شارتتار جانە حالىقارالىق نورمالار اياسىندا بەرىلگەن قۇقىقتارىن پايدالانۋىنا جاردەم كورسەتۋ كوزدەلگەن.
تۇراقتى تۇراتىن ازاماتتار قانداي قۇجات تاپسىرادى؟
قازاقستاننان تىس جەردە تۇراقتى تۇراتىن ازامات ەسەپكە تۇرۋ ءۇشىن شەتەلدەگى مەكەمەگە جەكە باسىن كۋالاندىراتىن قۇجاتتى نەمەسە سيفرلىق قۇجاتتار سەرۆيسىندەگى ەلەكتروندىق قۇجاتتى ۇسىنادى.
بۇدان بولەك، قازاقستاننان شەتەلگە تۇراقتى تۇرۋعا كەتۋگە قۇجاتتاردى راسىمدەۋ تۋرالى شەشىم نەمەسە تۇراقتى تۇرۋ ءۇشىن شەتەلگە شىعۋعا رۇقسات راسىمدەلگەنى تۋرالى حابارلاما قاجەت. سونداي-اق شەتەلدە تۇراقتى تۇراتىن قازاقستان ازاماتىنىڭ ەسەپكە الۋ كارتوچكاسى تولتىرىلادى.
ۋاقىتشا تۇراتىندارعا قانداي تالاپ قويىلادى؟
شەتەلدە ۋاقىتشا جۇرگەن ازاماتتارعا قۇجاتتار ءتىزىمى جەڭىلدەۋ. ولار جەكە باسىن كۋالاندىراتىن قۇجاتتى نەمەسە ونىڭ تسيفرلىق نۇسقاسىن ۇسىنىپ، ۋاقىتشا تۇراتىن قازاقستان ازاماتتارىنا ارنالعان ەسەپكە الۋ كارتوچكاسىن تولتىرۋى كەرەك.
ۋاقىتشا تۇراتىن ازاماتتار قاتارىنا قازاقستاننىڭ شەتەلدەگى مەكەمەلەرىنىڭ قىزمەتكەرلەرى، شەتەلدە ۋاقىتشا ەڭبەك ەتىپ جۇرگەن ازاماتتار، حالىقارالىق ۇيىمدارداعى قازاقستانعا بولىنگەن كۆوتا بويىنشا قىزمەت اتقاراتىندار، بەيبىتشىلىك پەن قاۋىپسىزدىقتى قامتاماسىز ەتۋ جونىندەگى حالىقارالىق مىندەتتەمەلەردى ورىنداۋعا جىبەرىلگەن اسكەري قىزمەتشىلەر كىرەدى.
سونداي-اق شەتەلدە ءبىلىم الىپ جۇرگەن ستۋدەنتتەر، ەمدەلۋگە بارعاندار، تۋريستىك نەمەسە جەكە ساپارمەن جۇرگەندەر، ۇيىمدار مەن جەكە تۇلعالاردىڭ شاقىرۋىمەن بارعان ازاماتتار جانە قىزمەتتىك ءىس ساپارداعى قازاقستاندىقتار دا وسى ساناتقا جاتادى.
قۇجاتتا قاتە بولسا نە بولادى؟
ەگەر وتىنىشتە نەمەسە ۇسىنىلعان قۇجاتتاردا قاتە نە سايكەسسىزدىك انىقتالسا، سونداي-اق قۇجاتتار تولىق ۇسىنىلماسا، ءوتىنىش سيفرلىق كۇتۋ پاراعى ارقىلى قابىلدانادى. بۇل جاعدايدا ءوتىنىش بەرۋشىگە ءتيىستى قولحات بەرىلەدى.
شەتەلدەگى مەكەمە كەلىپ تۇسكەن قۇجاتتاردى ءبىر جۇمىس كۇنى ىشىندە قارايدى. ودان كەيىنگى جۇمىس كۇنى قاجەتتى مالىمەتتەر «بۇركىت» ءبىرىڭعاي سيفرلىق جۇيەسىنە ەنگىزىلەدى. ءوتىنىش بەرۋشىنىڭ پاسپورتىنا ءتيىستى ءمور قويىلعان ارنايى قوسىمشا پاراق بەكىتىلەدى.
وسىلايشا، جاڭا قاعيدالار شەتەلدە ۇزاق مەرزىمگە قونىستانعان ازاماتتارعا عانا ەمەس، وقۋ، جۇمىس، ەمدەلۋ، تۋريزم، جەكە ساپار نەمەسە قىزمەتتىك ءىس ساپارمەن ۋاقىتشا جۇرگەن قازاقستاندىقتارعا دا قاتىستى.