بۇل تۋرالى ۇكىمەت وتىرىسىنان كەيىنگى باسپا ءسوز ءماسليحاتىندا عىلىم جانە جوعارى ءبىلىم ءمينيسترى ساياسات نۇربەك مالىمدەدى.
باسپا ءسوز ءماسليحاتى بارىسىندا جۋرناليستەر مەملەكەت باسشىسىنىڭ عىلىم سالاسىنا قاتىستى سىنى جونىندە سۇراق قويدى. مينيستر بۇل سىننىڭ ورىندى ەكەنىن ايتتى.
- مەملەكەت باسشىسى كوتەرگەن ماسەلە ورىندى. قازىرگى تاڭدا ساراپتاۋ سۇزگىلەرى مەن جوبالاردى ىرىكتەۋ تەتىكتەرى تولىق جۇمىس ىستەمەي وتىرعان تۇستار بار. سونىڭ سالدارىنان عىلىمي جاڭالىعى بار، نەگىزدەلگەن جوبالاردىڭ ءبارى بىردەي قارجىلاندىرۋ كەزەڭىنە جەتە بەرمەيدى. سوندىقتان بۇل باعىتتا اۋقىمدى جۇمىس جۇرگىزىلىپ جاتىر، - دەدى ول.
مينيستردىڭ ايتۋىنشا، 2023-جىلدان بەرى مينيسترلىك، عىلىم قورى، ۆەدومستۆولىق ۇيىمدار جانە عىلىم كوميتەتى شامامەن 15 رەت تەكسەرۋدەن وتكەن. سونىڭ ىشىندە سوڭعى تەكسەرۋدى باس پروكۋراتۋرا جۇرگىزگەن.
- بارلىق انىقتالعان كەمشىلىكتەر ەسكەرىلىپ، بىرنەشە جۇمىس جوسپارى ازىرلەندى. سونىمەن قاتار 2023-جىلى سىبايلاس جەمقورلىققا قارسى ءىس-قيمىل اگەنتتىگىمەن بىرلەسىپ، تاۋەكەلدەرگە سىرتقى تالداۋ جۇرگىزىلدى. ناتيجەسىندە 1344 تارماقتان تۇراتىن جوسپار ازىرلەندى، - دەدى مينيستر.
ونىڭ ايتۋىنشا، «عىلىم تۋرالى» زاڭعا تۇزەتۋلەر ماجىلىسكە ەنگىزىلىپ، قازىر قارالىپ جاتىر. قۇجات قابىلدانعاننان كەيىن كوپتەگەن راسىمدىك ماسەلەلەر قايتا قارالادى.
ساياسات نۇربەك عىلىمي قاۋىمداستىق جيى كوتەرەتىن ماسەلەلەردىڭ ءبىرى - كونكۋرس راسىمدەرىنىڭ ۇزاقتىعىنا دا توقتالدى.
- اشىعىن ايتقاندا ءبىز عالىمداردىڭ ۋاقىتىن جوعالتىپ وتىرمىز. سوندىقتان ەندى عىلىمي جوبالار بويىنشا مىندەتتەمەلەر كەلىسىمشارتقا قول قويىلعان ساتتەن باستاپ ەسەپتەلەدى. مىسالى، كەلىسىمشارت قازان ايىندا جاسالسا، 36 ايلىق مەرزىم سول ۋاقىتتان باستالادى، - دەدى ول.
ءمينيستردىڭ ايتۋىنشا، مۇنداي جۇيەلى شەشىمدەر عىلىم سالاسىنداعى پروبلەمالاردى ازايتۋعا مۇمكىندىك بەرەدى.
ايتا كەتەيىك، بۇعان دەيىن ۇكىمەت وتىرىسىندا عىلىمي جەتىستىكتەر كورسەتكىشىن ءوڭىر اكىمدەرىنىڭ رەيتينگىنە قوسۋ قاجەتتىگى ايتىلعان ەدى.