عىلىم جانە جوعارى ءبىلىم مينيسترلىگى اگەنتتىكتىڭ رەسمي ساۋالىنا بەرگەن جاۋابىندا «عىلىم قورى» ا ق عىلىمي جانە عىلىمي-تەحنيكالىق قىزمەت ناتيجەلەرىن كوممەرتسيالاندىرۋعا باعىتتالعان جوبالاردى گرانتتىق قارجىلاندىرىپ، ولاردىڭ وندىرىسكە ەنگىزىلۋىنە قولداۋ كورسەتەتىندىگىن اتاپ ءوتتى. سونىمەن قاتار قوردىڭ قولداۋىمەن جۇزەگە اسقان بىرنەشە جوبا ناقتى ونىمگە اينالعانىن مىسالعا كەلتىردى.
ۆانادي اككۋمۋلياتورلارىنا ارنالعان تەحنولوگيا ازىرلەندى
قىزىلوردا وبلىسىندا ۆاناديي اعىندى اككۋمۋلياتورلارىنا قاجەتتى ەلەكتروليتتى وندىرۋگە ارنالعان ۆاناديدىڭ ارالاس وكسيدتەرىن الۋ تەحنولوگياسى ەنگىزىلدى. جوبا اياسىندا ازىرلەنگەن قۇرعاق ۆانادي ەلەكتروليتى اعىندى اككۋمۋلياتورلاردى پايدالانۋ كەزىندە سۇيىق ەلەكتروليتتى تاسىمالداۋ قاجەتتىلىگىن جويادى. ەلەكتروليتتى اككۋمۋلياتور پايدالانىلاتىن جەردە دايىنداۋعا بولادى.
وتاندىق ۆانادي شيكىزاتى مەن ەلەكتروليت ءوندىرۋ تەحنولوگياسى باسەكەگە قابىلەتتى ۆانادي اككۋمۋلياتورلارىن شىعارۋعا مۇمكىندىك بەرەدى. كومپانيا الەمدەگى ءىرى ۆانادي اككۋمۋلياتورلارىن وندىرۋشىلەرمەن، ونىڭ ىشىندە VRB جانە Invinity كومپانيالارىمەن ىنتىماقتاستىق ورناتقان. سونىمەن قاتار ۆانادي پەنتوكسيدىن اۆستريا مەن رەسەيگە ەكسپورتتاۋ جولعا قويىلعان.
شارۋالارعا ۇسىنىلعان جاڭا بيداي سۇرپى
سولتۇستىك قازاقستان وبلىسىندا «سەمەنوۆنا» جازدىق جۇمساق بيدايىنىڭ جاڭا سورتى نارىققا شىعارىلدى. عىلىمي ازىرلەمەنى سولتۇستىك قازاقستان اۋىل شارۋاشىلىعى تاجىريبە ستانتسياسى جاساپ، كوممەرتسيالاندىرعان.
جاڭا سورت قورشاعان ورتانىڭ قولايسىز فاكتورلارىنا بەيىمدەلگەن. ول قۇرعاقشىلىققا، جوعارى تەمپەراتۋراعا جانە ماساقتىڭ جاتىپ قالۋىنا ءتوزىمدى. ۆەگەتاتسيالىق كەزەڭى 82-85 تاۋلىكتى قۇرايدى. جاڭا سورتتى وندىرىسكە ەنگىزۋ ناتيجەسىندە سولتۇستىك قازاقستان وبلىسىنداعى شارۋاشىلىقتاردا سورت الماستىرۋ جۇرگىزىلىپ، بيداي ەگىستىگىنىڭ ونىمدىلىگى ارتقان.
وسىمدىكتەردى قورعاۋعا ارنالعان پرەپارات
ستەپنوگورسك قالاسىندا وسىمدىكتەردى قورعاۋ قۇرالدارى مەن تىڭايتقىشتاردىڭ تيىمدىلىگىن ارتتىرۋعا ارنالعان وتاندىق «بيوليپ» بيوپرەپاراتى كوممەرتسيالاندىرىلدى.
«ecoSave» ج ش س ازىرلەگەن ءونىم تابيعي پوليمەرلەر نەگىزىندەگى جابىسقاق قاسيەتى بار پرەپارات. ول وسىمدىكتەردى قورعاۋ قۇرالدارى مەن تىڭايتقىشتاردىڭ جاپىراق بەتىنە جاقسى بەكىتىلۋىنە جانە سىڭۋىنە ىقپال ەتەدى. وسىمدىكتەردى قورعاۋدىڭ نەگىزگى ادىستەرىنىڭ ءبىرى - ولارعا پەستيتسيدتەر مەن باسقا دا پرەپاراتتاردى بۇركۋ. قالىپتى تاجىريبەدە وسىمدىكتەردى قورعاۋ قۇرالدارى مەن تىڭايتقىشتاردىڭ باسىم بولىگى جاپىراقتار مەن ساباقتار بويىمەن اعىپ، توپىراققا ءسىڭىپ كەتەدى. اتالعان پرەپارات وسىمدىكتەردى قورعاۋ قۇرالدارى مەن جاپىراقتان قورەكتەندىرۋدىڭ جاپىراق بەتىمەن جاناسۋ اۋدانىن ۇلعايتادى. دەمەك، جۇمىس ەرىتىندىلەرى كومپونەنتتەرىنىڭ (پەستيتسيدتەر مەن تىڭايتقىشتاردىڭ) اسەر ەتۋ تيىمدىلىگىن ايتارلىقتاي ارتتىرادى. وسىلايشا، «بيوليپ» وڭدەۋ تيىمدىلىگىن جوعالتپاي، اگروحيميكاتتاردىڭ ۇسىنىلعان ەڭ از دوزالارىن پايدالانۋعا مۇمكىندىك بەرەدى. سول ارقىلى اگروحيميكاتتاردى ساتىپ الۋ شىعىندارىن ازايتادى.
بۇل رەتتە اتاپ وتەتىن جايت، قازىرگى ۋاقىتتا قازاقستان نارىعىنداعى بارلىق جابىسقاق پرەپاراتتار شەتەلدەن يمپورتتالادى. سوندىقتان جاڭا، ءارى قولجەتىمدىرەك وتاندىق ونىمگە سۇرانىس جوعارى جانە بۇگىنگى تاڭدا جاڭا «بيوليپ» پرەپاراتىن ساتۋدان تۇسكەن سوما بولىنگەن گرانت كولەمىنەن اسىپ ءتۇستى.
برۋتسەللەزگە قارسى وتاندىق ۆاكسينالار وندىرىلە باستادى
الماتى وبلىسىندا اۋىل شارۋاشىلىعى جانۋارلارىنىڭ برۋتسەللەزىنە قارسى «BRUVAC®» جانە «BRUCON®» ۆاكسينالارىن GMP حالىقارالىق ستاندارتتارىنا سايكەس ونەركاسىپتىك ءوندىرۋ جولعا قويىلدى.
جوبا «انتيگەن» عىلىمي-وندىرىستىك كاسىپورنى بازاسىندا جۇزەگە اسىرىلعان. كاسىپورىن ۆەتەريناريالىق يممۋنوبيولوگيالىق پرەپاراتتار، ۆاكسينالار جانە دياگنوستيكالىق تەست-جۇيەلەر ازىرلەپ وندىرۋمەن اينالىسادى.
جوبا اياسىندا قويلار مەن ەشكىلەردىڭ برۋتسەللەزىنە قارسى «BRUVAC®»، سونداي-اق ءىرى قارا مالدىڭ برۋتسەللەزىنە قارسى «BRUCON®» ۆاكسينالارىن ءوندىرۋ جانە ساتۋ ۇيىمداستىرىلدى. ۆاكسينالار كونيۋنكتيۆالدى ادىسپەن قولدانۋعا ارنالعان.
ايتا كەتەرلىگى، تەرى استىنا يممۋنيزاتسيالاۋ ارقىلى برۋتسەللەزدىڭ الدىن الۋ ءادىسىن حالىقارالىق ەپيزووتيالىق بيۋرو مەن ب ۇ ۇ- نىڭ ازىق-تۇلىك جانە اۋىل شارۋاشىلىعى ۇيىمى قولدامايدى. سەبەبى بۇل ۆاكسيناتسيادان كەيىنگى انتيدەنەلەردىڭ ۇزاق ساقتالۋىنا اكەلىپ، اۋرۋ جانۋارلاردى ۆاكسيناتسيالانعانداردان اجىراتۋدى قيىنداتادى. ۆاكسيناتسيانىڭ كونيۋنكتيۆالدى ءادىسى ۆاكسيناتسيادان كەيىنگى سەرولوگيالىق رەاكسيالاردىڭ قارقىندىلىعى مەن ۇزاقتىعىن ايتارلىقتاي تومەندەتەدى. بۇل ۆاكسينانى پايدالانۋ حالىقارالىق ەپيزووتيالىق بيۋرو ۇسىنعان برۋتسەللەزگە قارسى كۇرەس باعدارلاماسىمەن ۇيلەسەدى.
جىلقىعا ارنالعان وتاندىق ۆەتەريناريالىق پرەپارات
الماتى قالاسىندا جىلقى پارازيتتەرىنە قارسى «يۆەرگەل» پرەپاراتى ازىرلەنىپ، ونىڭ ءوندىرىسى ۇيىمداستىرىلدى. «بيوۆەت ع ءو و» ج ش س شىعارعان پرەپارات اۋىز ارقىلى قولدانىلاتىن گەل تۇرىندە ۇسىنىلعان. ول جىلقىلارداعى اسقازان-ىشەك جانە وكپە نەماتودتارى، سونداي-اق باسقا دا پارازيتتەردەن تۋىندايتىن اۋرۋلاردى ەمدەۋ جانە الدىن الۋ ءۇشىن قولدانىلادى. پرەپارات اعزانى پارازيتتەردەن تازارتادى. بۇل تاماق قاۋىپسىزدىگى ستاندارتتارىنىڭ تالاپتارىنا جاۋاپ بەرەتىن مال شارۋاشىلىعى ونىمدەرىن الۋعا، سونداي-اق جىلقىلاردىڭ دەنساۋلىعىن ساقتاۋعا ىقپال ەتەدى. مۇنان بولەك، جىلقى باسىنىڭ كوبەيۋىنە جول اشادى.
«يۆەرگەل» پرەپاراتىن ءوندىرۋ شەتەلدەن اكەلىنەتىن ۆەتەريناريالىق پرەپاراتتارعا ايتارلىقتاي باسەكەلەستىك تۋدىردى. سول ارقىلى يمپورت كولەمىن تومەندەتۋگە جانە ەلىمىزدىڭ ەكونوميكالىق تاۋەلسىزدىگى مەن بيولوگيالىق قاۋىپسىزدىگىن ارتتىرۋعا مۇمكىندىك بەرەدى.