ءماجىلىس قازاقستان مەن قىتاي اراسىنداعى مادەني بايلانىستارعا قاتىستى قۇجاتتى قابىلدادى

استانا. KAZINFORM - بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ ۇكىمەتى مەن قىتاي حالىق رەسپۋبليكاسىنىڭ ۇكىمەتى اراسىنداعى مادەني ورتالىقتاردى ءوزارا قۇرۋ تۋرالى كەلىسىمدى راتيفيكاتسيالاۋ تۋرالى» زاڭى قابىلداندى.

«مەملەكەت باسشىسىنىڭ قىتاي حالىق رەسپۋبليكاسىمەن دوستىق پەن ارىپتەستىككە نەگىزدەلگەن ساياساتىنىڭ اياسىندا قازىر ءبىرقاتار ۇلكەن باستامالار كوتەرىلىپ وتىر. سونىڭ ءبىرى - استانا مەن بەيجىڭدە ءوزارا مادەني ورتالىقتار اشۋ تۋرالى شەشىم. وسى ورايدا قازاقستاننىڭ قىتايداعى مادەني ورتالىعى تاريحىمىزدا العاش رەت ۇلتىمىزدى بۇل ەلدە كەڭىنەن تانىتۋدىڭ، ەكى ەل اراسىنداعى رۋحاني بايلانىستى جاڭا دەڭگەيگە كوتەرۋدىڭ، ءوزارا حالىقارالىق مادەني-گۋمانيتارلىق جوبالاردى ىسكە اسىرۋدىڭ ءىرى ءارى تولىققاندى وشاعىنا اينالدىرۋ كوزدەلىپ وتىر»، - دەدى قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالايەۆا.

ونىڭ ايتۋىنشا، قازىرگى مينيسترلىك بۇل ورتالىقتىڭ كونسەپتسياسىن جاساپ، مازمۇنىن ايقىندادى. اتاپ ايتقاندا ول جەردە:

- كينو كورسەتىلىمدەرى مەن كونسەرتتىك قويىلىمدارعا ارنالعان كوپ فۋنكسيونالدى زال؛

- ءبىلىم بەرۋ كۋرستارى، ترەنينگتەر، شىعارماشىلىق كەزدەسۋلەر وتكىزەتىن ارنايى كەڭىستىگى بار كوۆوركينگ ورتالىعى؛

- كورمەلەر وتكىزۋگە قولايلى ەكسپوزيتسيالىق مۋلتيمەديالىق الاڭ؛

- ەلىمىزدىڭ تۋريستىك الەۋەتىن كورسەتەتىن ارنايى تۋريزم بۇرىشى ورنالاسادى.

«مىنە، وسىلاردى ويداعىداي ىسكە اسىرۋ ءۇشىن مينيسترلىك «ءوزارا مادەني ورتالىقتاردى قۇرۋ» تۋرالى زاڭ جوباس نازارلارىڭىزعا ۇسىنىپ وتىر. ماسەلەنىڭ ەلىمىز ءۇشىن ءمان-ماڭىزىن ەسەكەرە وتىرىپ، وسى زاڭ جوباسىن قولداۋلارىڭىزدى سۇرايمىن»، - دەدى مينيستر.

جالپى وتىرىس بارىسىندا دەپۋتاتتار بۇل قۇجاتتى تالقىلىپ، قابىلدادى.

اۆتور
رۋسلان عابباسوۆ