دەپۋتاتتىڭ ايتۋىنشا، ەلدە بالا تۋعان كەزدەگى تولەمدەردەن باستاپ كوپبالالى وتباسىلارعا ارنالعان جاردەماقىلارعا دەيىن كوپ دەڭگەيلى قولداۋ جۇيەسى قۇرىلعان. دەگەنمەن، سمولياكوۆانىڭ ايتۋىنشا، كومەك ءارقاشان تەز جانە ءدال كورسەتىلمەيدى، اسىرەسە ەرەكشە قاجەتتىلىكتەرى بار بالا تاربيەلەپ وتىرعان وتباسىلار قينالادى.
- مەن بۇل ماسەلەنى كەزدەسۋلەردە بىرنەشە رەت كوتەردىم، قازىرگى تاڭدا ءبىز ءبىر شەشىمگە كەلە باستادىق. ول - «بالا باعدارى» دەپ اتالاتىن ءبىرىڭعاي سيفرلىق مودۋل. ول دەنساۋلىق ساقتاۋ، اعارتۋ، ەڭبەك جانە الەۋمەتتىك قورعاۋ مينيسترلىكتەرىنىڭ دەرەكقورلارىن بىرىكتىرەدى جانە ەرەكشە قاجەتتىلىكتەرى بار بالالاردى تۋعاننان باستاپ 18 جاسقا دەيىن قولداۋ كورسەتەدى. مودۋل بالا ءبىر قۇرىلىمنان ەكىنشىسىنە اۋىسقان كەزدە «كوزدەن تاسا قالماۋىن» قاداعالايدى، وتباسىلاردا جەكە باعدار، سيفرلىق وڭالتۋ كۇندەلىگى جانە مامانداردان ونلاين كەڭەس الۋ مۇمكىندىگى بولادى. بۇل اسىرەسە شالعاي اۋىلدارداعى وتباسىلار ءۇشىن ماڭىزدى، - دەپ ءتۇسىندىردى ەكاتەرينا سمولياكوۆا.
سونىمەن قاتار، دەپۋتات ءاربىر قولداۋ شاراسىنا بيۋجەتتەن وراسان قاراجات ءبولىنىپ، مەملەكەتتىڭ قاتاڭ مىندەتتەمەلەرى بولاتىنىن اتاپ ءوتتى.
- بالاسى ءۇش جاسقا تولعانعا دەيىن جۇمىس ورنىن ساقتاي وتىرىپ دەمالىسقا شىعۋ، تەگىن مەديتسينا، تۋعاننان باستاپ تولەنەتىن تولەمدەر، «ۇلتتىق قور - بالالارعا» باعدارلاماسى - كوپتەگەن كورسەتكىش بويىنشا ءبىز ءتىپتى الەمدەگى ەڭ ءىرى ەكونوميكالاردان دا الدامىز. ءبىز ءۇشىن ۇيرەنشىكتى جاعداي، ءبىراق الەمنىڭ كوپ ەلىندە مۇنداي مۇمكىندىك جوق، - دەدى ول.
دەپۋتات ەڭ ماڭىزدىسى وتباسىلارعا بولاشاققا سەنىم بەرەتىن شارالار ەكەنىن تىلگە تيەك ەتتى.
- ءبىز ۇسىنعان مودەلدىڭ كۇشتى تۇسى - ول جۇكتىلىك جانە بوسانۋ، بالانىڭ تۋىلۋى، ءبىر جارىم جاسقا دەيىن بالا كۇتىمى، كوپبالالى بولۋ جانە مۇگەدەك بالانى تاربيەلەۋ سەكىلدى بىرنەشە ومىرلىك جاعدايلاردى بىردەن قامتيدى. ءبىرىنشى، ەكىنشى جانە ءۇشىنشى بالا تۋعاندا 164350 تەڭگە، ال ءتورتىنشى جانە ودان كەيىنگى ءار بالا ءۇشىن 272475 تەڭگە تولەنەدى. بۇل ايماقتاعى ەڭ جوعارى تولەمدەردىڭ ءبىرى. حالىقارالىق تاجىريبەمەن سالىستىرساق، بىزدە جاقسى بازا بار، ءبىراق كەيدە يكەمدىلىك جەتپەي جاتادى. ءار وتباسى ءارتۇرلى، سوندىقتان قولداۋ شارالارىن ازىرلەۋگە مۇنى ەسكەرۋ كەرەك، - دەپ اتاپ ءوتتى سمولياكوۆا.
دەپۋتات «ۇلتتىق قور - بالالارعا» باعدارلاماسىن سوڭعى جىلدارداعى ەڭ كورەگەن باستامالاردىڭ ءبىرى دەپ سانايدى.
- بالا ەلدىڭ ۇلتتىق بايلىعىندا ءوز ۇلەسى بار ەكەنىن ءبىلىپ وسسە، ونىڭ ەلگە جانە بولاشاعىنا دەگەن كوزقاراسى وزگەرەدى. بۇل بولاشاق ۇرپاققا سالىنعان ينۆەستيتسيا. جىل سايىن 6,8 ميلليوننان استام بالانىڭ شوتىنا تولەمدەر ءتۇسىپ تۇر، ال باعدارلاما باستالعالى ءۇش جىل ىشىندە جالپى اۋدارىمدار 2,5 ميلليارد دوللاردان استى. قازاقستان پوستكەڭەستىك كەڭىستىكتە بولاشاق ۇرپاققا تىكەلەي تولەمدەردى زاڭمەن بەكىتكەن العاشقى ەل بولدى، - دەپ اتاپ ءوتتى ول.
سمولياكوۆانىڭ ايتۋىنشا، باعدارلامانىڭ قارجىلىق ىقپالىنان بولەك، تاربيەگە دە وڭ اسەرى بار.
- مەن باعدارلامانىڭ تاربيەلىك ماڭىزىن دا كورىپ وتىرمىن: بالالار ۇلتتىق بايلىقتىڭ وزدەرىنە تيەسىلى ەكەنىن تۇسىنەدى جانە ونى باعالاۋدى ۇيرەنەدى. بۇل ۇزاق مەرزىمدى جانە دۇرىس باستاما، - دەدى ول.
سونىمەن قاتار، دەپۋتات مەكتەپتەگى تەگىن ىستىق تاماق بويىنشا جۇمىس ىستەپ جاتقانىن جەتكىزدى. ءماجىلىستىڭ VIII شاقىرىلىمىندا ول پارلامەنتتىك ساۋالنامالار جولداپ، مەكتەپ تاعامدارىن ۇسىناتىن كاسىپكەرلەرمەن كەزدەسۋلەر وتكىزگەن.
- مىنانى ءتۇسىنۋ ماڭىزدى: قازاقستاندا 1-4-سىنىپ وقۋشىلارىنىڭ بارلىعى وتباسى تابىسىنا قاراماستان تەگىن ىستىق تاماقپەن قامتىلعان. كوپتەگەن باتىس ەلدەرىندە مۇنداي تاماق تەك كەدەيلىكتى راستايتىن قۇجاتپەن عانا بەرىلەدى، بۇل كوبىنەسە تەڭسىزدىك پەن بۋللينگكە اكەپ سوقتىرادى. بىزدە بۇل ماسەلە وڭ شەشىمى تاپقان - بارلىق بالا تەڭ. پرەزيدەنت ءتىپتى دامىعان سوتسياليزم كەزىندە دە بۇنداي بولماعانىن، سونىمەن قاتار ءبىز بۇدان دا ارتىق جۇمىس ىستەۋىمىز كەرەك دەپ قاداپ ايتتى. مەن مۇنى ءوز جۇمىسىمدا سەزىنەمىن - ماسەلە كۇردەلى، ءبىراق شەشۋگە بولادى، باستىسى، وعان تىڭ كوزقاراسپەن قاراۋ قاجەت، - دەدى سمولياكوۆا.
دەپۋتات سونىمەن قاتار ەلدە قولدانىلىپ جۇرگەن الەۋمەتتىك قولداۋ شارالارىن باعالاۋ مەن كەڭەيتۋدىڭ ماڭىزدىلىعىن، ولاردى قوعامنىڭ وزگەرمەلى قاجەتتىلىكتەرىنە بەيىمدەۋ كەرەك ەكەنىن اتاپ ءوتتى.
- قولداۋ ءبىر رەتتىك باستاما ەمەس؛ بۇل ۇزدىكسىز جۇمىس. ءبىز سۋپەرالەۋمەتتىك مەملەكەتپىز، ءارى ءومىر شىندىعىنا اينالعان بۇل جەتىستىكتەردى باعالاۋ جانە مولايتۋ كەرەك، - دەپ ءسوزىن تۇيىندەدى دەپۋتات.
وسىعان دەيىن قۇرىلتاي دەپۋتاتى زاحيرا بەگاليەۆا قازاقستاندا الەۋمەتتىك قولداۋدىڭ بىرنەشە ءتۇرى قاتار كورسەتىلەتىنى تۋرالى جازعان بولاتىن.