عالىمدار قازاق تىلىندەگى مەديتسينالىق تەرميندەردىڭ سوزدىگىن شىعارماقشى
استانا. KAZINFORM - سەمەي قالاسىندا ق ر دەنساۋلىق ساقتاۋ مينيسترلىگىنىڭ مەديتسينالىق تەرمينولوگيا كوميسسياسى مەن سەمەي مەديتسينا ۋنيۆەرسيتەتى بىرلەسىپ رەسپۋبليكالىق تەرمينولوگيالىق كونفەرەنسيا وتكىزدى. بۇل تۋرالى ۆەدومستۆونىڭ باسپا ءسوز قىزمەتى ءمالىم ەتتى.
كونفەرەنتسيانىڭ كۇن تارتىبىندە بەكىتىلگەن مەديتسينالىق تەرميندەردىڭ ءبىرىڭعاي سوزدىگىن ازىرلەۋ، دەنساۋلىق ساقتاۋ سالاسىنداعى نورماتيۆتىك قۇقىقتىق اكتىلەردىڭ تەرمينولوگيالىق بازاسىن قالىپتاستىرۋ جانە وزەكتى مەديتسينالىق تەرمينولوگيا سوزدىگىن جاساۋ ماسەلەلەرى قارالدى.
- كونفەرەنسيا بارىسىندا جاس عالىمدار مەديتسينالىق تەرمينولوگياعا قاتىستى وزەكتى ماسەلەلەردى تالقىلادى. ولار عىلىمي جاريالانىمدارداعى اببريەۆياتۋرالاردى، نورماتيۆتىك قۇقىقتىق اكتىلەردەگى تەرميندەردى جانە عىلىمي-مەديتسينالىق ءتىلدىڭ جۇيەلەنۋىن تالداۋعا ەرەكشە نازار اۋداردى. بولەك تاقىرىپ رەتىندە سالالىق جاساندى ينتەللەكتتى ەنگىزۋ ماسەلەسى كوتەرىلدى، ونىڭ ىشىندە KAZHealthGPT جۇيەسىن ازىرلەۋ دە بار، - دەلىنگەن حابارلامادا.
سونىمەن قاتار، قاتىسۋشىلار «مەملەكەتتىك تىلدەگى 100 مەديتسينالىق وقۋلىق» جوباسىنىڭ بولاشاعىنا سەنىم ءبىلدىردى.
موتيۆاتسيا رەتىندە قازاق تىلىندە ورىندالعان عىلىمي جۇمىستاردى ىنتالاندىرۋدى جانە عىلىمي جۋرنالدارداعى ۇزدىك جاريالانىمدار ءۇشىن سىياقىلار تاعايىنداۋدى ۇسىندى. جاس عالىمدار بۇل باستامالاردىڭ تابىستى بولۋىنا مەملەكەتتىك ءتىلدىڭ عىلىم سالاسىنداعى ءرولىنىڭ ارتۋى سەبەپ بولادى دەپ سانايدى.
ولار قازاق ءتىلى تەك كۇندەلىكتى ومىردە عانا ەمەس، عىلىمدا دا لايىقتى ورىن الۋى ءتيىس ەكەنىن اتاپ ءوتتى.
بۇعان دەيىن حابارلانعانداي، ەلىمىزدە رەسپۋبليكالىق تەرمينولوگيالىق كوميسسيا قۇرىلدى.