باسقارۋ جۇيەسىندەگى جاڭعىرۋعا پرەزيدەنتتىك جاستار كادر رەزەرۆى لەپ بەرەدى - ءاليحان بايمەنوۆ

استانا. KAZINFORM - سوڭعى ۋاقىتتا قوعامدا تۇبەگەيلى وزگەرىستەر مەن جاڭارۋ ءۇردىسى جالعاسىپ جاتىر.

ەلىمىز «ادىلەتتى قازاقستان»، «جاڭا قازاقستان» دەگەن باتىل ۇرانمەن العا بيىك ماقساتتار قويىپ، جاھاندانۋدىڭ داڭعىل جولىندا نىق قادام جاساپ كەلەدى. وسى رەتتە، قازاقستاننىڭ مەملەكەت قايراتكەرى، استانا مەملەكەتتىك قىزمەت حابى (ACSH) باسقارۋشى كوميتەتىنىڭ ءتوراعاسى ءاليحان بايمەنوۆ اگەنتتىك تىلشىسىنە پرەزيدەنتتىك جاستار كادر رەزەرۆى جايلى ءوز ويىن ايتتى.

ونىڭ ايتۋىنشا، تابيعاتتىڭ دا، قوعامنىڭ دا، كەز كەلگەن جۇيەنىڭ دە جاڭارىپ، جاڭعىرىپ وتىرۋى - دامۋدىڭ شارتى.

- بۇل - جاڭا زامانعا بەيىمدەلۋدىڭ زاڭدىلىعى. قازاق «ەلۋ جىلدا ەل جاڭا» دەسە، ۇلى اباي «ءداستۇردىڭ وزىعى بار، توزىعى بار» دەيدى. ياعني، توزىعى جەتكەن داستۇردەن ارىلىپ تۇرۋ كەرەك. ەندەشە قوعام جاڭعىرىپ وتىرعاندا سوعان ساي قوعامنىڭ ورتاق ىسىمەن اينالىساتىن مەملەكەت قىزمەتتىڭ دە جاڭعىرۋ قاجەتتىلىگى تۋىندايدى. بۇل ءبىر جاعىنان كۇندەلىكتى ءوز كەزەڭىمەن ءجۇرىپ جاتاتىن كونكۋرستار ارقىلى جۇزەگە اسادى. ءيا، بوساعان ورىنداردى جاڭا ادامدار تولىقتىرىپ، زەينەتكە شىققانداردىڭ ورنىنا جاڭا ادامدار كەلەدى. ءبىراق، كەيبىر تاريحي بەتبۇرىس ساتتەرىندە جاڭا لەپتى كوبىرەك الىپ كەلۋ مەملەكەتتەر تاجىريبەسىندە بار شەشىم. وسى تۇرعىدا پرەزيدەنتتىك جاستار كادرى رەزەرۆى جوباسىن اتاپ وتۋگە بولادى، - دەدى ءاليحان بايمەنوۆ.

مەملەكەت باسشىسى ءوز سوزىندە: «پرەزيدەنتتىك جاستار كادر رەزەرۆىنىڭ نەگىزگى كوزدەگەن ماقساتى - مەملەكەتتىك اپپاراتتى جەتىلدىرۋ جانە باسشىلاردىڭ جاڭا بۋىنىنا جول اشۋ. بۇگىنگى جاستار - مەملەكەتتىك باسقارۋ جۇيەسىنىڭ بولاشاعى. ءارقايسىڭىزدان ەلدى دامىتۋعا تىڭ سەرپىن بەرەتىن جاڭا يدەيا مەن ناتيجەلى جۇمىس كۇتەمىز» دەپ جاستارعا زور سەنىم ارتقان بولاتىن.

ءاليحان بايمەنوۆ بۇل جوبا بۇعان دەيىن مەملەكەتتىك قىزمەت جۇيەسىندە قالىپتاسقان ىرىكتەۋ، جوعارىلاتۋ تەتىكتەرىنە بالاما ەمەس ەكەنىن اتاپ ءوتتى.

- بۇل جوبا سونى تولىقتىرادى دەسەك بولادى. ياعني، بۇعان دەيىنگى ىرىكتەۋ جۇيەلەرىندە ءتۇرلى سەبەپتەرمەن، مۇمكىن ساياسي دۇنيەتانىمدىق سەبەپتەرمەن مەملەكەتتىك قىزمەتكە بارعىسى كەلمەي جۇرگەن، جەرگىلىكتى جەردە ياكي ورتالىقتا بولعان ءتۇرلى توسقاۋىلدارعا تاپ بولعان ازاماتتارعا تاماشا مۇمكىندىك. بۇل - حالىقارالىق تاجىريبەدە بار تەتىك. دارىنى، كۇش- قۋاتى بار، ءوزىن ءىرى ىستەردى مەڭگەرۋگە لايىق سانايتىن ازاماتتار كۇردەلى ىرىكتەۋدەن وتەدى. جالپى، بۇل جۇيەنى دۇرىس پايدالانا بىلسە ماڭىزدى تەتىك ەكەنىن اتاپ وتكەن ءجون، - دەيدى ول.

ايتا كەتەيىك، بۇگىندە پرەزيدەنتتىك جاستار كادر رەزەرۆىندە 400 مامان بار. سونىڭ 280 ءى، ياعني 70 پايىزى ورتالىق جانە جەرگىلىكتى اتقارۋشى ورگانداردا جاۋاپتى لاۋازىمدارعا تاعايىندالدى. ءبىرقاتارى كۆازيمەملەكەتتىك سەكتوردا جانە بيزنەس سالاسىندا ەڭبەك ەتىپ ءجۇر.