اۋىز سۋمەن قامتاماسىز ەتۋ جوبالارىنا ءوڭىردىڭ ءبىرىنشى باسشىلارى تىكەلەي جاۋاپ بەرەدى - بەكتەنوۆ
استانا. KAZINFORM - 2026 -جىلى توپتىق سۋ قۇبىرلارى ءبىرىڭعاي كەشەندەر رەتىندە اكىمدىكتەردىڭ بالانسىنا بەرىلمەك. مۇنداي تاپسىرمانى بۇگىن ۇكىمەت وتىرىسىندا پرەمەر- مينيستر ولجاس بەكتەنوۆ بەردى.
- ءوڭىر اكىمدىكتەرى جىل سوڭىنا دەيىن اۋىز سۋمەن قامتاماسىز ەتۋ بويىنشا قولدانىستاعى بارلىق جوبالاردى ىسكە قوسۋدى قامتاماسىز ەتسىن. بۇعان وڭىرلەردىڭ ءبىرىنشى باسشىلارى تىكەلەي جاۋاپ بەرەدى. قارجى مينيسترلىگى بەكىتىلگەن قاراجاتتى جەرگىلىكتى اتقارۋشى ورگاندارعا جەدەل تارتىپپەن اۋدارۋى قاجەت، - دەدى ولجاس بەكتەنوۆ.
سونىمەن قاتار ول ونەركاسىپ مينيسترلىگى جەلىلەردى جاڭعىرتۋ كەزىندە قولدانىستاعى كارىز تازارتۋ قۇرىلىستارىنىڭ ونىمدىلىگىن ۇلعايتۋعا جانە اعىندى سۋلاردى تازارتۋ ساپاسىن ارتتىرۋعا باسا نازار اۋدارۋى كەرەكتىگىن ايتتى. وسى ورايدا ۆەدومستۆوعا اكىمدىكتەرمەن بىرلەسىپ، 1- قىركۇيەككە قاراي ەنەرگەتيكالىق جانە كوممۋنالدىق سەكتورلاردى جاڭعىرتۋدىڭ ۇلتتىق جوباسىن ىسكە اسىرۋ جونىندەگى ينۆەستيتسيالىق باعدارلامالاردى ازىرلەۋدى تاپسىردى.
- سۋ رەسۋرستارى مينيسترلىگى وسى جىلدىڭ سوڭىنا دەيىن توپتىق سۋ قۇبىرلارىن سالۋ جانە جاڭعىرتۋ جوبالارىن اياقتاۋدى قامتاماسىز ەتسىن. قارجى مينيسترلىگىمەن بىرلەسىپ، 2026 -جىلى توپتىق سۋ قۇبىرلارىن ءبىرىڭعاي كەشەندەر رەتىندە اكىمدىكتەردىڭ بالانسىنا بەرۋدى قامتاماسىز ەتسىن. ۇلتتىق ەكونوميكا مينيسترلىگى مۇددەلى مەملەكەتتىك ورگاندارمەن بىرلەسىپ، مۇلىكتى رەسپۋبليكالىق مەنشىكتەن كوممۋنالدىق مەنشىككە بەرۋ ماسەلەلەرىن رەتتەيتىن نورماتيۆتىك قۇقىقتىق اكتىلەرگە وزگەرىستەر مەن تولىقتىرۋلار ەنگىزسىن، - دەدى ۇكىمەت باسشىسى.
پرەمەر-مينيستر سۋ رەسۋرستارى مينيسترلىگى ونەركاسىپ مينيسترلىگىمەن بىرلەسىپ، سۋ وبەكتىلەرىنىڭ سيفرلىق پاسپورتتارى مەن ينتەللەكتۋالدىق سۋ كاداسترىن ەنگىزۋ ماسەلەسىن پىسىقتاۋعا تيىستىگىن باسا ايتتى.
- ۇلتتىق ەكونوميكا مينيسترلىگى قارجى مينيسترلىگىمەن جانە «بايتەرەك» حولدينگىمەن بىرلەسىپ، ۇلتتىق جوبا اياسىندا كوزدەلگەن ينۆەستيتسيالىق جوبالاردى قارجىلاندىرۋدى قامتاماسىز ەتسىن، - دەدى ول.
بۇعان دەيىن ولجاس بەكتەنوۆ ىسكە اسىرىلۋ مەرزىمى سوزىلىپ كەتكەن تازا اۋىز سۋ جوبالارىن اتاعان ەدى.