استانادا ءاربىر ءتورتىنشى قىلمىستىق ءىس قازاق تىلىندە قارالادى
استانا. KAZINFORM - ەلوردادا قىلمىستىق ىستەردى مەملەكەتتىك تىلدە جۇرگىزۋدىڭ الگوريتمى قالاي جۇمىس ىستەيدى؟ بىلتىر قانشا قىلمىستىق ءىس قازاق تىلىندە جۇرگىزىلدى؟ وسى جانە وزگە دە سۇراقتارعا استانا قالاسىنىڭ سوتتارىندا مەملەكەتتىك ءتىلدى قولدانۋ اياسىن كەڭەيتۋ جانە دامىتۋ جۇمىستارىن ۇيلەستىرۋ كوميسسياسىنىڭ ءتوراعاسى، سۋديا ايسۇلۋ سلامبەكوۆا جاۋاپ بەردى.
«قازىر مەملەكەتتىك تىلدە ءىس جۇرگىزۋ جۇمىستارى بىرنەشە باعىتتا جۇرگىزىلىپ جاتىر. ول قىلمىستىق، قۇقىقبۇزۋشىلىق، ازاماتتىق جانە اكىمشىلىك. 2022-جىلعى 14-جەلتوقساندا ەلوردادا قىلمىستىق جانە اكىمشىلىك قۇقىق بۇزۋشىلىق تۋرالى ىستەردى قارايتىن اۋداندىق سوتتارعا مەملەكەتتىك ءتىلدى قولدانۋ جونىندە الگوريتم جولداندى. الگوريتم بويىنشا سۋديا ورىس تىلىندە تۇسكەن ءىستى ايىپتالۋشىنىڭ ۇلتى قازاق بولسا، انا تىلىندە ءىس جۇرگىزۋ قۇقىعىن ءتۇسىندىرىپ، كەلىسكەن جاعدايدا قازاق تىلىنە ءوتۋى قاجەت»، - دەدى ايسۇلۋ سلامبەكوۆا ەلوردادا وتكەن جيىندا.
ونىڭ ايتۋىنشا، كوپ جاعدايدا، ايىپتالۋشى ەكى ءتىلدى دە تۇسىنگەنىمەن، سوتتا انا تىلىندە جاۋاپ بەرۋدى سۇرايدى. سوندىقتان ءىس بويىنشا تەرگەۋ ماتەريالدارىن قازاق تىلىنە اۋدارۋدىڭ قاجەتتىلىگى جوق.
ودان ءارى سۋديا وتكەن جىلعى ستاتيستيكا مەن تەرگەۋشىلەردىڭ ءىس جۇرگىزۋ تىلىنە توقتالدى.
«قىلمىستىق ىستەر بويىنشا 2023-جىلى قازاق تىلىندە تۇسكەن جانە ورىس تىلىنەن قازاق تىلىنە اۋىستىرىلعان ىستەردىڭ ورتاشا كورسەتكىشى & نەمەسە ءاربىر 4-قىلمىستىق ءىس قازاق تىلىندە قارالعان. وعان تىكەلەي ىقپال ەتىپ جاتقان سوتتاردىڭ ءتىل ماسەلەسىنە قاتىستى جەكە قاۋلى شىعارىلۋى. جاسىراتىنى جوق، تەرگەۋشىلەردىڭ دەنى ۇلتى قازاق بولا تۇرا، انا ءتىلىن جەتىك بىلمەگەندىكتەن، وزىنە ىڭعايلى بولۋ ءۇشىن كۇدىكتىدەن ءىستى ورىسشا جۇرگىزۋ تۋرالى ارىز جازدىرىپ الادى. ال، سوتتا سۋديا جاۋاپ الا باستاعان كەزدە، ايىپتى ورىس تىلىندە جاۋاپ بەرە الماي قينالادى. سوندىقتان، سۋديا ەڭ ءبىرىنشى وسى ماسەلەنى شەشىپ الۋى ءتيىس»، - دەيدى ول.
ايتا كەتەيىك، بۇگىن استانادا قالالىق سوتتىڭ ۇيىمداستىرۋىمەن «سوت تورەلىگىن مەملەكەتتىك تىلدە جۇزەگە اسىرۋ ماسەلەلەرى» اتتى دوڭگەلەك ۇستەل ءوتتى. شاراعا سۋديالار، ادۆوكاتتار، ءماجىلىس دەپۋتاتتارى مەن ءتىل ماماندارى قاتىستى.