استانا فورۋمىنا جۇمسالعان 4,5 ميلليارد تەڭگە كەمىندە 4,5 ميلليارد دوللار بوپ قايتۋى مۇمكىن

استانا. KAZINFORM - سىرتقى ىستەر ءمينيسترىنىڭ ورىنباسارى الىبەك قۋانتىروۆ استانا حالىقارالىق فورۋمىنىڭ كۋلۋارىندا ءىس-شارانى وتكىزۋگە كەتكەن شىعىندار تۋرالى پىكىر ءبىلدىردى.

- مەندە فورۋمدى ۇيىمداستىرۋعا جۇمسالاتىن قاراجاتتىڭ ناقتى سانى بەلگىسىز. ءسىز 4,5 ميلليارد تەڭگە دەپ وتىرسىز. وسى 4,5 ميلليارد تەڭگە جاقىن ارادا 4,5 ميلليارد دوللار بولىپ قايتۋى مۇمكىن. ارينە، بۇل مۇمكىن. مەن سىزگە ەڭ كەمىندە دەگەن ەسەپپەن ايتىپ وتىرمىن. مەنىڭ پايىمىمشا، ودان دا ارتىق ينۆەستيتسيا كەلەدى، 7-10 ميلليارد دوللار ارالىعىندا ينۆەستيتسيا تارتۋعا بولادى، - دەدى ول جۋرناليستىڭ سۇراعىن بەرگەن جاۋابىندا.

ونىڭ ايتۋىنشا، ەلگە ІТ-كومپانيالاردىڭ ينۆەستيتسيا قىزىعۋشىلىعى جوعارى.

- باستالىپ جاتقانى بۇگىن عانا. ەكى كۇننىڭ ىشىندە ءبىراز كەزدەسۋلەر، تالقىلاۋلار بولادى. ءتىپتى كەيبىرىنىڭ ناتيجەسىندە كەيىن ناقتى كەلىسىمشارتتارعا قول قويىلۋى مۇمكىن. فورۋم اياسىندا ارىپتەستىك ورناتۋى مۇمكىن ءىرى ІТ - كومپانيالار بار، - دەدى الىبەك قۋانتىروۆ.

ايتا كەتەيىك، ەلوردادا مەملەكەت باسشىسى قاسىم-جومارت توقايەۆتىڭ قاتىسۋىمەن استانا حالىقارالىق فورۋمى ءوتىپ جاتىر.

فورۋمعا 7000-نان استام قاتىسۋشى تىركەلگەن. ەۋروپا، ورتالىق ازيا، تاياۋ شىعىس پەن افريكا ەلىنەن ب ۇ ۇ، ا ا ۇ، ح ك ۇ جانە د ز م ۇ سياقتى جەتەكشى حالىقارالىق ۇيىمداردىڭ اتىنان 160 تان استام سپيكەر شاقىرىلعان. ەكى كۇن بويى ولار ءتۇرلى سالانىڭ ساراپشىلارىمەن بىرلەسىپ، مەملەكەتارالىق ىنتىماقتاستىق مودەلىن، جاڭا جاھاندىق ارىپتەستىك قۇرۋدىڭ كەلەشەگىن تالقىلايدى.

بۇعان دەيىن فورۋمنىڭ مارتەبەلى مەيماندار قاتارىندا رۋاندا رەسپۋبليكاسىنىڭ پرەزيدەنتى پول كاگامەن، البانيا پرەمەر-ءمينيسترى ەدي رامانى، حورۆاتيا رەسپۋبليكاسىنىڭ پرەمەر-ءمينيسترى اندرەي پلەنكوۆيچتى، قاتار پرەمەر-ءمينيسترى-سىرتقى ىستەر ءمينيسترى شەيح مۇحاممەد بەن ابدۋلراحمان ءال ءتاني بار ەكەنى حابارلانعان بولاتىن.

اۆتور

ەسىمجان ناقتىباي