بۇگىن ماجىلىستە وتكەن باسپا ءسوز ءماسليحاتىندا تىلشىلەر باس پروكۋروردىڭ ورىنباسارىنان بۇرىنعى توتەنشە جاعدايلار ءمينيسترى يۋري يليننەن، ەكولوگيا ءمينيسترى ءزۇلفيا سۇلەيمەنوۆادان، اباي وبلىسىنىڭ اكىمى نۇرلان ۇرانحايەۆتان، شىعىس قازاقستان وبلىسىنىڭ اكىمى دانيال احمەتوۆتەن ورمان ورتىنە قاتىستى جاۋاپ الۋ مۇمكىندىگى تۋرالى سۇراق قويدى.
«قازىر بۇل قىلمىستىق ءىس بويىنشا ەشكىمنىڭ دە ءىس-ارەكەتى ءالى سارالانبادى. تەرگەۋ جاقىندا عانا باستالدى. سوندىقتان لاۋازىم يەلەرى مەن باسقا دا قىزمەتكەرلەرگە قاتىستى قىلمىستىق ءىس بويىنشا ستاتۋسى، ءىس- ارەكەتى سارالانعان جوق»، - دەدى جاندوس ومىراليەۆ
ونىڭ ايتۋىنشا، قىلمىستىق ءىس بويىنشا تەرگەۋ ەكى ايعا سوزىلادى.
«ءدال قازىر تەرگەۋ امالدارىنا تارتىلۋى ءتيىس ادامدار ءورت سوندىرۋگە جۇمىلدىرىلعان. ءبىزدىڭ باستى ماقساتىمىز - ءورتتى ءسوندىرۋ. سوندىقتان قازىر ءبىز ولاردىڭ نەگىزگى جۇمىسىنا ارالاسپايمىز. كەيىننەن ولاردان مىندەتتى تۇردە جاۋاپ الىنادى. قازىرگى كەزدە باسقا دا تەرگەۋ امالدارى ەسكەرىلگەن»، - دەدى باس پروكۋراتۋرا وكىلى.
بۇل تۇرعىدا ول ءتيىستى تەرگەۋ جوسپارى بار ەكەنىن، تەرگەۋشىلەر وسى جۇمىسپەن اينالىسىپ جاتقانىن ايتتى.
«لاۋازىم يەلەرىنەن جاۋاپ الۋدان بۇرىن، ءبىز باسقا دا ءبىرقاتار ءمان- جايدى انىقتاپ، ناقتىلاۋىمىز قاجەت. سونىمەن قاتار، قاتارداعى قىزمەتكەرلەردەن جاۋاپ الۋىمىز كەرەك. جالپى، ىسكە قاتىستى ادامداردىڭ بارلىعى تەرگەلەدى»، - دەدى ول.
«اباي وبلىسىنداعى اۋقىمدى ورتكە قاتىستى قىلمىستىق كودەكستىڭ 292-بابى 3- بولىگى بويىنشا ءىس قوزعالدى. مەملەكەت باسشىسىنىڭ تىكەلەي تاپسىرماسى اياسىندا اتالعان ءىستىڭ تەرگەلۋى باس پروكۋراتۋراعا جۇكتەلدى. وسى ورايدا قۇقىق قورعاۋ ورگاندارىنىڭ بىلىكتى تەرگەۋشىلەرى مەن جەدەل ۋاكىلدەردى جۇمىلدىرا وتىرىپ، ءتيىستى تەرگەۋ توبى قۇرىلدى. قازىر تەرگەۋ توبى اباي وبلىسىنداعى اپات اۋماعىندا جۇمىسىن باستاپ كەتتى»، - دەدى ج. ومىراليەۆ.
ونىڭ ايتۋىنشا، اتالعان قىلمىستىق ءىستى باس پروكۋرور ءوز باقىلاۋىنا الدى.
«ءورتتىڭ سالدارىن، قورشاعان ورتاعا كەلتىرىلگەن زالالدى، 14 ادامنىڭ ءوز قىزمەتتىك بورىشىن وتەۋ بارىسىندا قازا بولۋىن ەسكەرە وتىرىپ، تاعى ءبىر قىلمىستىق ءىس قوزعالدى. قىزمەتىنە سالعىرت قاراۋ بابى بويىنشا ءوز قىزمەتىن ءتيىستى دەڭگەيدە اتقارماعان، اۋىر زارداپقا جول بەرگەن بارلىق لاۋازىم يەلەرى قىلمىستىق جاۋاپقا تارتىلادى»، - دەدى باس پروكۋراتۋرا وكىلى.