«سىزدەردى 1- ورتالىق ازيا مەديا فورۋمىنىڭ اشىلۋىمەن قۇتتىقتايمىن! بۇقارالىق كوممۋنيكاتسيالار قارقىندى دامىعان قازىرگى زاماندا مەديا سالاسىندا تاجىريبە الماسۋ جانە وڭىردەگى مادەني- گۋمانيتارلىق ىنتىماقتاستىق اياسىن كەڭەيتە ءتۇسۋ ايرىقشا ماڭىزدى. ايماقتاعى تانىمال جۋرناليستەردىڭ، ساراپشىلار مەن مەديا مەنەدجەرلەردىڭ باسىن قوسقان فورۋم مامانداردىڭ كاسىبي پايىمدارىن بىرلەسە تالقىلاۋعا مۇمكىندىك بەرەتىن بىرەگەي پىكىرتالاس الاڭى. وسى ولكەدەگى مەملەكەتتەردىڭ جان- جاقتى ىقپالداستىعى باۋىرلاس حالىقتاردىڭ باي تاريحى مەن ورتاق مۇراسىنا نەگىزدەلگەن. بيىل اعايىن ەلدەردىڭ اراسىندا ديپلوماتيالىق قارىم- قاتىناس ورناعانىنا 30 جىل تولىپ وتىر»، - دەلىنگەن پرەزيدەنت قۇتتىقتاۋىندا.
مەملەكەت باسشىسى 21- عاسىردا ورتالىق ازيانى بىرلەسە دامىتۋدى كوزدەيتىن دوستىق، تاتۋ كورشىلىك جانە ىنتىماقتاستىق تۋرالى شارتقا قول قويۋ ءراسىمىنىڭ وسى مەرەيلى جىلدا ءوتۋىنىڭ زور سيمۆولدىق ءمانى بار ەكەندىگىنە نازار اۋدارتادى.
سونىمەن قاتار ستراتەگيالىق قۇجات ورتالىق ازيا ەلدەرىنىڭ جان- جاقتى سەرىكتەستىگىن نىعايتۋعا تىڭ سەرپىن بەرەتىندىگىنە سەنىم بىلدىرەدى.
«مەنىڭ ورتالىق ازيا مەملەكەتتەرى باسشىلارىنىڭ 4-كونسۋلتاتيۆتىك كەزدەسۋىندە ەلدەرىمىز تۋرالى حابار تاراتاتىن ورتاق تەلەارنا اشۋدى نەمەسە ارنايى سايت قۇرۋدى ۇسىنعانىمدى بىلەسىزدەر. بۇگىنگى فورۋمدا بۇل ماسەلە دە جەكە تالقىلانباق. ءبىز جاھاندانۋ داۋىرىندە وڭىرلىك اقپاراتتىق كەڭىستىكپەن شەكتەلىپ قالماۋىمىز كەرەك. بىرلەسكەن مەديا ونىمدەر جاساپ، ورتاق قۇندىلىقتاردى حالىقارالىق دەڭگەيدە دارىپتەۋ اسا ماڭىزدى. سول ارقىلى ورتالىق ازيا ەلدەرىنىڭ جاسامپاز يدەيالارى مەن جارقىن ىستەرىن جەر جۇزىنە تانىتامىز. بۇگىنگى القالى جيىن مازمۇندى ءارى ماعىنالى ءوتىپ، ەلدەرىمىزدىڭ سان سالالى بايلانىسىن نىعايتا تۇسەتىن ءداستۇرلى باسقوسۋعا اينالادى دەپ سەنەمىن»، - دەپ اتاپ وتەدى قاسىم- جومارت توقايەۆ.
اۆتور
مارلان جيەمباي