پرەزيدەنتكە ەلدەگى سىبايلاس جەمقورلىققا قارسى قابىلدانىپ جاتقان شارالار جونىندە ەسەپ بەرىلدى.
ولجاس بەكتەنوۆتىڭ ايتۋىنشا، بيىل 11 ايدا مەملەكەتكە قۇنى 600 ميلليارد تەڭگەدەن استام زاڭسىز يەلەنگەن مۇلىك اكتيۆتەرى مەن قاراجات قايتارىلدى.
بۇدان بولەك، ەلىمىزدە جانە شەتەلدە جالپى سوماسى 360 ميلليارد تەڭگەدەن اساتىن جىلجىمايتىن مۇلىك، اۆتوموبيلدەر مەن قاراجات انىقتالدى جانە ولار جاقىن ارادا مەملەكەتكە قايتارىلادى.
مەملەكەت باسشىسىنىڭ تاپسىرماسىمەن سىبايلاس جەمقورلىققا قارسى ءىس-قيمىل اگەنتتىگى تەرگەپ-تەكسەرگەن قىلمىستىق ىستەردەن تاركىلەنگەن قارجى قازىردىڭ وزىندە مەكتەپ قۇرىلىسىنا جۇمسالىپ جاتىر.
«اقتوبە» ا ك ك- گە قاتىستى قىلمىستىق ءىس اياسىندا كىنالى تۇلعالار 197 ميلليون تەڭگە شىعىندى وتەدى. قاراجاتتىڭ نەگىزگى بولىگى اۋىل مەكتەبىنىڭ قۇرىلىسىن اياقتاۋعا جۇمسالدى.
پرەزيدەنتكە سونداي-اق سىبايلاس جەمقورلىققا قاتىستى قىلمىستاردى بولدىرماۋعا باعىتتالعان الدىن الۋ شارالارى تۋرالى اقپارات بەرىلدى.
ولجاس بەكتەنوۆ كولىكتىك باقىلاۋ، جەر قويناۋىن پايدالانۋ، مەملەكەتتىك قورعانىس تاپسىرىسى سالالارىنا، كوشى-قون قىزمەتىنىڭ، الەۋمەتتىك-كاسىپكەرلىك كورپوراتسيالاردىڭ جانە «قازاقستان تەمىر جولى» ا ق جۇمىسىنا سىرتقى تالداۋ اياقتالعانىن جەتكىزدى.
ونىڭ قورىتىندىسى بويىنشا سىبايلاس جەمقورلىق تاۋەكەلدەرىن جويۋعا باعىتتالعان 2 مىڭنان استام ۇسىنىس ازىرلەندى.
مەملەكەت باسشىسى ەلىمىزدە سىبايلاس جەمقورلىق دەڭگەيىن تومەندەتۋ جونىندەگى جۇمىستاردى جالعاستىرۋدى تاپسىردى.