بۇل تۋرالى ق ر سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى سيفرلىق ترانسفورماتسيالاۋ دەپارتامەنتىنىڭ ديرەكتورى نازگۇل باجايەۆا ءمالىم ەتتى، دەپ حابارلايدى قازاقپارات ءتىلشىسى.
«بيىل 15-شىلدەدە مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە يننوۆاتسيالاردى ىنتالاندىرۋ، سيفرلاندىرۋدى دامىتۋ، اقپاراتتىق قاۋىپسىزدىك جانە ءبىلىم بەرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىنا قول قويدى. اتالعان زاڭ اياسىندا سيفرلىق قۇجاتتاردى قولدانۋ ىسكە قوسىلدى. ونىڭ قاتارىندا ازاماتتاردىڭ جەكە كۋالىگى دە بار. ياعني ءسىز EGovMobile موبيلدىك قوسىمشاسى ارقىلى جەكە كۋالىگىڭىزدىڭ ەلەكتروندى نۇسقاسىن جۇكتەپ الاسىز. ودان ءارى QR كود ارقىلى جەكە باسىڭىزدى راستاي الاسىز»، - دەدى نازگۇل باجايەۆا «AMANAT» پارتياسى الاڭىندا وتكەن باسپا ءسوز ءماسليحاتىندا.
ونىڭ ايتۋىنشا، بۇگىندە QR كود ارقىلى جەكە كۋالىكتى راستاۋ جۇمىس ىستەپ تۇر. ياعني قازاقستاندىقتار ەندىگى ۋاقىتتا جەكە كۋالىكتىڭ ەلەكتروندى نۇسقاسىن قولدانا الادى.
«بۇعان دەيىن جەكە كۋالىكتىڭ ەلەكتروندىق نۇسقاسى تەك مەملەكەتتىك قىزمەت العان كەزدە حالىققا قىزمەت كورسەتۋ ورتالىقتارىندا عانا قولدانىلعان ەدى. جاڭا زاڭعا سايكەس ەندى بارلىق جەردە جەكە كۋالىكتى QR كود ارقىلى كورسەتسە جاراپ جاتىر»، - دەيدى ول.
اۆتور: داۋلەت ىزتىلەۋ