قاسىم- جومارت توقايەۆقا «استانا» حالىقارالىق قارجى ورتالىعىنىڭ (ا ح ق و) بىلتىرعى اتقارعان جۇمىستارىنىڭ قورىتىندىسى، سونداي- اق شەتەلدىك يۋريسديكتسيادان قازاقستان رەسپۋبليكاسىنا كاپيتالدى قايتارۋ جانە كومپانيالاردى ەلىمىزگە قايتا تىركەۋ جونىندەگى تاپسىرمالاردىڭ ورىندالۋى تۋرالى ەسەپ بەرىلدى.
پرەزيدەنت اتالعان ۇدەرىستەردىڭ اسا ماڭىزدى ەكەنىنە نازار اۋدارىپ، ولاردىڭ جۇزەگە اسىرىلۋى قازاقستانعا ءىرى اكتيۆتەردىڭ قايتارىلۋىن قامتاماسىز ەتىپ قانا قويماي، سونىمەن قاتار قارجى ورتالىعىنىڭ ايماقتىق دەڭگەيدەگى باسەكەگە قابىلەتتىلىگىن كورسەتەتىنىن اتاپ ءوتتى.
قايرات كەلىمبەتوۆتىڭ ايتۋىنشا، قازىرگى كەزدە ا ح ق و- دا الەمنىڭ 63 ەلىنەن 1236 كومپانيا تىركەلگەن. وسى ورتالىق ارقىلى تارتىلعان ينۆەستيتسيالاردىڭ جالپى كولەمى 6,2 ميلليارد دوللاردى قۇرايدى. ا ح ق و- نىڭ Astana International Exchange (AIX) بيرجاسى ارقىلى 321 ميلليون دوللارعا جۋىق اكسيونەرلىك كاپيتال مەن 1,65 ميلليارد دوللاردى قۇرايتىن بورىشكەرلىك كاپيتال تارتىلعان. 18 قازاقستاندىق جانە 11 حالىقارالىق بروكەر ا ح ق و بيرجاسىنىڭ ساۋدا جونىندەگى مۇشەسى سانالادى.
مەملەكەت باسشىسىنا ا ح ق و- نىڭ قارجى قىزمەتتەرىن رەتتەۋ كوميتەتىنەن ليتسەنزيا العان كومپانيالاردىڭ سانى بىلتىر ەكى ەسە ءوسىپ، 46-عا جەتكەنى تۋرالى مالىمەت بەرىلدى. وتكەن جىلى AFSA يسلام بانكىنە جانە يسلام قارجىلاندىرۋ كومپانياسىنا العاش رەت ليتسەنزيا بەردى. بۇدان بولەك ا ح ق و سوتى جانە حالىقارالىق اربيتراج ورتالىعى بىرلەسە وتىرىپ، 1000-نان استام داۋلى ىستەردى قاراعان.