گاۋھار ناعاشىبەك قىزىنىڭ ايتۋىنشا، ونىڭ 65 پەن 68 جاس ارالىعىنداعى اتا-اناسى وزدەرىن قاۋىپتى اۋرۋدان قورعاۋ ءۇشىن كوروناۆيرۋسقا قارسى ەكپەنى ءوز ەرىكتەرىمەن ءارى سانالى تۇردە العان. ال دارىگەردىڭ ءوزى جۇمىس ىستەيتىن فتيزيوپۋلمونولوگيا ورتالىعى ۇجىمىنىڭ ەكپە سالدىردى.
«مەنىڭ وتباسىم، دوستارىم، تانىستارىم دا ۆاكسينا الدى. ك ۆ ي- گە قارسى ەكپە الۋ - مەنىڭ سانالى تاڭداۋىم. مەن ءوزىمدى عانا ەمەس، اينالامداعى بارلىق ادامداردى، جاقىندارىمنىڭ قاۋىپسىزدىگىنە جاۋاپتىمىن»، - دەدى دارىگەر.
ول بارشا قالا تۇرعىندارىنا، سونىڭ ىشىندە ك ۆ ي- مەن اۋىرعان ادامدارعا دا قايتادان دەرت جۇقتىرۋ قاۋپىنىڭ جوعارى ەكەنىن ايتتى. سونداي-اق پروفيلاكتيكالىق شارالاردى ەلەمەۋگە بولمايتىنىن تىلگە تيەك ەتتى. دارگەردىڭ ايتۋىنشا، ءوزىڭىزدى كوروناۆيرۋس ينفەكسياسىن جۇقتىرۋدان قورعاۋ ءۇشىن بارىنە بەلگىلى شارالاردى ساقتاۋ قاجەت: ادام كوپ جينالاتىن ورىندارعا، اسىرەسە جابىق ءۇي- جايلارعا بارماۋ؛
الەۋمەتتىك قاشىقتىقتى (كەمىندە ءبىر مەتر) ساقتاۋ، اسىرەسە رەسپيراتورلىق ينفەكسيانىڭ بەلگىلەرى بولسا؛
قورعانىس بەتپەردەسىن تاعۋ جانە ۋاقىتىلى اۋىستىرىپ وتىرۋ؛ قوعامدىق كولىكتە سيرەك قاتىناۋ جانە بولمەنى مۇمكىندىگىنشە ءجيى جەلدەتۋ. سونداي-اق قولدى ءسپيرتى بار ونىممەن تازا ۇستاۋ نەمەسە سابىنمەن جۋۋ قاجەت. مىسالى، قوعامدىق ورىندارعا بارعاندا ەسىك تۇتقالارى مەن كراندار جانە تەلەفون ديسپلەيلەرىن ۇستاعاندا سانيتارلىق ەرەجەنى ساقتاۋ قاجەت.
«ءوز دەنساۋلىعىڭىزدى نىعايتىپ، يممۋنيتەتتى كوتەرۋ ءۇشىن قاراپايىم ەرەجەلەردى ورىنداۋ جەتكىلىكتى: دۇرىس تاماقتانۋ، ۋاقىتىلى ۇيىقتاۋ، پوزيتيۆتى پسيحولوگيالىق كوزقاراس قاجەت. سونىمەن قاتار تازا اۋادا سەرۋەندەۋ كەرەك. سونداي-اق جاتتىعۋ جاساپ، سپورتپەن اينالىسۋ كەرەك. وسى قاراپايىم شارالار يممۋنيتەتتىڭ كۇشتى بولۋىنا ءارى كەز كەلگەن ينفەكسيامەن كۇرەسۋگە كومەكتەسەدى»، - دەدى ەپيدەميولوگ.
سونداي-اق سپيكەر كوروناۆيرۋس جۇقتىرعاننان كەيىن اعزانى قالپىنا كەلتىرۋ بويىنشا ءوزىنىڭ كاسىبي ۇسىنىستارىن ايتتى. ونىڭ ايتۋىنشا، اۋرۋدىڭ تارالۋى، ادامنىڭ قالاي تاماقتاناتىنىنا، يممۋنيتەتىنە، بەلسەندى نەمەسە پاسسيۆتى ءومىر سالتىنا بايلانىستى. COVID-19 دەرتىمەن اۋىرعان جانە پوستكويدتى بەلگىلەرى بار ءاربىر ناۋقاسقا دارىگەردىڭ بەلگىلى ءبىر ۇسىنىستارى بەرىلەدى. كوروناۆيرۋستى قالپىنا كەلتىرۋ جەكە جۇرەدى. ءبىراق بارىنە يممۋنيتەتتى نىعايتۋ، دۇرىس تاماقتانۋ جانە فيزيكالىق بەلسەندىلىك سياقتى شارالار ەسكەرتىلەدى. دارىگەر مەگاپوليستە حالىقتى COVID-19 دەرتىنە قارسى ۆاكسينالاۋ قاجەتتىلىگى جايلى اقپاراتتاندىرۋ بويىنشا بەلسەندى جۇمىس جۇرگىزىلگەنىن جەتكىزدى.
«ءبىزدىڭ قالادا ۆاكسينا پۋنكتى بارلىق جەردە بار جانە ول قولجەتىمدى. ادام كوپ جينالماس ءۇشىن ەمحانالار مەن س و س و- دا ۋاقىتشا موبيلدى پۋنكتتەر اشىلدى. سونداي- اق قوسىمشا ارقىلى ۆاكسينا ءراسىمىنىڭ كۇنى مەن ۋاقىتىن بەلگىلەۋگە بولادى. ەكپە كابينەتى مەن پۋنكتتەرىندە ايماققا ءبولۋ ءۇشىن الەۋمەتتىك قاشىقتىق تالاپتارى ساقتالادى. ءاربىر ناۋقاس مىندەتتى تەكسەرۋدەن ءوتىپ، دارىگەردىڭ رۇقساتىنان كەيىن ۆاكسينا الادى. ۆاكسينادان كەيىن ءار ناۋقاس 30 مينۋت دارىگەردىڭ باقىلاۋىندا بولادى. كەيىن ونىڭ دەنساۋلىق جاعدايى بەكىتىلگەن ەمحانانىڭ باقىلاۋىنا وتەدى»، - دەدى ول.
دارىگەردىڭ ايتۋىنشا، كوروناۆيرۋس ينفەكسياسىنا قارسى ۆاكسينا قاۋىپسىزدىكتىڭ بەلگىسى. ەگەر ادام ۆاكسينا السا، وندا ول اۋرۋدان قورعالىپ قانا قويمايدى، سونىمەن قاتار باسقا ادامدارعا جۇقتىرمايدى. سونىڭ ىشىندە جاڭا «دەلتا» شتامىنا قاتىستى ۆاكسينا اۋرۋ مەن ءولىمنىڭ اۋىر تۇرلەرىنەن قورعايدى. بۇل جاعدايدا پرەپاراتتىڭ ەكى دوزاسىن دا الۋ كەرەك. ءبىرىنشى دوزا انتيدەنەلەردىڭ از مولشەرىنە بايلانىستى قورعانىس اسەرىن بەرەدى، ەكىنشى دوزا ءبىرىنشىسىنىڭ اسەرىن كۇشەيتەدى ءارى نىعايتادى.
«ك ۆ ي ۆاكسيناسى - بۇل جاڭا اۋرۋعا قارسى ءدارى. بۇل ۆيرۋستى زەرتتەگەنىمىزگە ءبىر جارىم جىل ءوتتى. سونداي- اق ۆاكسينا قىسقا مەرزىمدە جاسالدى. بۇل الەم بويىنشا كوروناۆيرۋستىڭ تارالۋىن تومەندەتەتىن قۇرال. اقپان ايىندا جاپپاي ۆاكسينا باستالعان كەزدە مەديتسينا قىزمەتكەرلەرى ۆاكسيناعا الاڭداۋشىلىق ءبىلدىردى. كەيىننەن كوپ ەلدەردە جاناما اسەر بولماعانىن كوردى. قازىر ادامداردىڭ سەنىمى پايدا بولدى. تانىستار، تۋىستار، كورشىلەر ۆاكسينانىڭ قايسىسى جاقسى دەپ سۇرايدى. ال ۆاكسينادان قورقاتىن قالا تۇرعىندارى ءتۇرلى قاۋەسەتتەر مەن جالعان اقپاراتتارعا سەنەدى. سوندىقتان ءبىز قىزمەتكەرلەر مەن ناۋقاستارعا ۆاكسينا تۋرالى تۇسىندىرمە جۇمىستارىن جۇرگىزۋدەمىز. سوندا عانا ادام ءتيىستى شەشىم قابىلداي الادى. بۇگىندە ۆاكسينا جايلى كۇردەلى ماسەلە جوق، حالىقتى قامتۋ پروتسەسى قارقىندى ءجۇرىپ جاتىر»، - دەدى سپيكەر.
ءسوز سوڭىندا دارىگەر قالا تۇرعىندارى مەن قوناقتارىن قوعامدىق ورىنداردا دەمالۋدان باس تارتۋعا شاقىردى. كوروناۆيرۋس دەرتىن جۇقتىرماس ءۇشىن سانيتارلىق قاۋىپسىزدىك شارالارىن، سونىڭ ىشىندە بەتپەردە رەجيمى مەن الەۋمەتتىك قاشىقتىقتى ساقتاۋدى ۇسىندى. سونداي-اق كوروناۆيرۋستان قورعانۋدىڭ جالعىز ءارى سەنىمدى ءادىسى ۆاكسينا ەكەنىن تاعى دا ەسكەرتتى.