بۇل تۋرالى ق ر پارلامەنتى سەناتىنىڭ ءتوراعاسى ماۋلەن اشىمبايەۆتىڭ Facebook تە جازدى، دەپ حابارلايدى قازاقپارات ءتىلشىسى.
«كەشە قاسيەتتى جۇما كۇنى وزبەكستانعا جاساعان ساپار اياسىندا تولە ءبي بابامىزدىڭ كەسەنەسىنە ارنايى بارىپ، زيارات ەتتىك. تاشكەنت قالاسىندا ورنالاسقان بۇل كەشەن شاھارداعى كورىكتى جەرلەردىڭ ءبىرى سانالادى. سوندىقتان مۇندا ورتالىق ازيادان، ونىڭ ىشىندە قازاقستاننان جانە باسقا دا شەت ەلدەردەن كەلەتىن تۋريستەردىڭ قاتارى كوپ. تولە ءبيدىڭ قازاق تاريحىندا الاتىن ورنى ەرەكشە. اسىرەسە، حاندىق تۇسىندا مەملەكەتتىك ىستەرگە ارالاسىپ، ماڭىزدى شەشىمدەر قابىلداۋعا بەلسەنە اتسالىستى.
جاۋگەرشىلىك زاماندا حالىقتىڭ بىرلىگى مەن ەلدىڭ تۇتاستىعىن ساقتاۋعا ۇلكەن ۇلەس قوستى. ءداستۇرلى ادەت-عۇرىپتارىمىز بەن زاڭدارىمىزدىڭ جيناعى «جەتى جارعىنىڭ» جازىلىپ، قابىلدانۋىنا دا زور ەڭبەك سىڭىرگەنى تاريحتان بەلگىلى.
ايگىلى ابىلاي حاننىڭ ەل تىزگىنىن ۇستايتىن تۇلعا بولىپ قالىپتاسۋىندا تولە ءبيدىڭ ءرولى ەرەكشە بولعانىن بىلەمىز. اقىل-پاراساتىمەن ءادىل شەشىمدەر شىعارىپ، ۇلكەن داۋلاردىڭ الدىن الىپ وتىرعان بابامىز بار قازاقتىڭ باسىن قوسۋدى باستى ماقسات تۇتقان ەدى. تولە ءبي ايتقان سوزدەر بۇگىندە بۇكىل ۇلتىمىز ءۇشىن ۇلگى-ونەگە ەكەنى داۋسىز»، - دەپ جازدى سەنات ءتوراعاسى.
وسى ورايدا م. اشىمبايەۆ قازىرگى تاڭدا ەلىمىزدە مەملەكەت باسشىسىنىڭ تاپسىرماسى بويىنشا تاريحي سانامىزدى جاڭعىرتۋ جانە ۇلتتىق قۇندىلىقتارىمىزدى دارىپتەۋ جۇمىستارىنا باسىمدىق بەرىلىپ وتىرعانىن اتاپ ءوتتى.
«وسى تۇرعىدان كەلگەندە، تولە ءبي بابامىزدىڭ ءومىرى مەن وسيەتتەرىنە دە ەرەكشە نازار اۋدارعانىمىز ءجون. بۇل تاريحىمىزدى تانۋ جانە شەجىرەمىزدى زەرتتەۋ جولىنداعى ماڭىزدى قادامداردىڭ ءبىرى بولارى انىق. سوندىقتان الداعى ۋاقىتتا تاريحشىلارىمىز وسى باعىتقا دا باسىمدىق بەرەدى دەپ سەنەمىز»، - دەدى سەنات سپيكەرى.
ەسكە سالا كەتەيىك، 4- ماۋسىم كۇنى قازاقستان پارلامەنتى سەناتىنىڭ ءتوراعاسى ماۋلەن اشىمبايەۆ وزبەكستانعا رەسمي ساپارى اياسىندا وسى ەلدىڭ پرەزيدەنتى شاۆكات ميرزيەيەۆپەن كەزدەستى.