بۇل تۋرالى ول Qasqa Jol Youtube ارناسىنا بەرگەن سۇحباتىندا ايتتى.
«الاشا حاننىڭ ۇلتىنا قاتىستى كوپتەگەن پىكىرتالاس بار. نامىسقا تيەدى. ەكسكۋرسوۆودتار ونى «وزبەكتىڭ بيلەۋشىسىنىڭ بالاسى، ءۇستى الا-الا بولعاسىن ۇيىنەن شىعارىپ تاستاعان. سوسىن قازاق جەرىنە كەلىپ، ۇلكەن بيلىككە جەتتى» دەپ ءتۇسىندىرىپ ءجۇر.
ەكىنشى بىرەۋلەر بويى الاسا بولعاسىن «الاسا حان» دەپ، كەيىن الاشا اتالىپ كەتكەن دەپ جاتادى. سوندا ءبىز ونى قازاقتىڭ باتىرى، حانى دەپ ماقتانارلىق دەرەكتەر المايمىز با؟»، - دەدى ارىستانبەك مۇحامەدي ۇلى.
ەكس-مينيستر ۇلىتاۋ جەرىندەگى الاشا حان كەسەنەسىنە مامانداردى جيناپ، ونىڭ تەگىنە قاتىستى حالىقارالىق زەرتتەۋ جۇمىستارىن باستاماق.
«سول سەبەپتى ءقازىر الاشا حان جايلى ۇلكەن دەرەكتەردى جيناپ جاتىرمىز. مامىر ايىندا مازارىنا بارىپ، ارنايى ۆيدەوماتەريالدار ءتۇسىرىپ، ءۇش تىلدە تاراتامىز. الەم عالىمدارىنا ۇندەۋ جاسايمىز. وسىدان كەيىن شەتەل ماماندارى كەلىپ، زەرتتەيدى. سوندا قازاقتىڭ تاريحى مۇلدەم باسقاشا بولادى»، - دەيدى ارىستانبەك مۇحامەدي ۇلى.
ايتا كەتەيىك، قازاق جەرىندە بيلىك قۇرعان الاشا حاننىڭ شىققان تەگى مەن ەسىمىنە بايلانىستى ءتۇرلى دەرەكتەر مەن اڭىز اڭگىمەلەر بار. كوبىنە «الاش» ەتنونيمىنىڭ شىعۋى الاشا حان اتىمەن بايلانىستىرىلادى. ەگەر زەرتتەۋلەر ارقىلى دايەكتى مالىمەتتەر شىقسا، قازاق مەملەكەتىنىڭ قالىپتاسۋ تاريحى مەن مەرزىمىندە وزگەرىستەر بولۋى عاجاپ ەمەس. كەي عالىمدار الاشا حان كەسەنەسىندە جاتقان شىڭعىس حان ەكەنىن دە العا تارتادى.
«نەلىكتەن ءامىر تەمىر ۇلكەن جورىققا شىعار الدىندا ۇلىتاۋعا كەلىپ، تاسقا قاشاپ «مەن اسكەرىممەن التىن وردانى قيراتۋعا بارا جاتىرمىن. سول ءۇشىن ۇلىتاۋعا كەلدىم» دەپ جازىپ كەتكەن؟ سەبەبى ۇلىتاۋ قاسيەتتى جەر. سول جازۋ قاشالعان تاس ەرميتاجدىڭ ەڭ ءبىر ادەمى جەرىندە تۇر. حالىقارالىق عالىمدار وسى ماسەلەنى دە زەرتتەۋى قاجەت»، - دەيدى ۇلتتىق مۋزەي ديرەكتورى.